U hrodzienskaj turmie zabili źniavolenaha. Jaho pakarali susiedzi
40‑hadovy Jaŭhien Šypul mieŭ mientalny razład i kraŭ rečy ŭ susiedziaŭ pa kamiery.
Letam 2022 hoda ŭ hrodzienskaj turmie zabili 40‑hadovaha źniavolenaha Jaŭhiena Šypula. U prahułačnym dvoryku jaho źbili susiedzi ŭ kamiery, a administracyja, choć i bačyła, što situacyja idzie da kryvavaj raźviazki, nie zrabiła ničoha.
Pra hetu historyju raskazaŭ u novym vypusku svajho jutub-kanału były palitviazień i błohier Mikałaj Dziadok. Padrabiaznaści situacyi «Našaj Nivie» raspavioŭ były palitviazień Pavieł Vinahradaŭ, infarmacyju dapoŭniŭ Belpol.
Šypul naradziŭsia ŭ 1982 hodzie ŭ Lidskim rajonie, žyŭ u Lidzie. Nidzie nie pracavaŭ. U 2005 hodzie jamu prysudzili 20 hadoŭ źniavoleńnia za razboj z zabojstvam. Ź ciaham času Šypul trapiŭ u mahiloŭskuju turmu, dzie jamu prysudzili dadatkovy hod za niepadparadkavańnie administracyi. U vyniku jon trapiŭ u hrodzienskuju turmu.
Važny momant: u Šypula byŭ mocny mientalny razład. Jak kaža Vinahradaŭ, u jaho było adrazu niekalki «asobaŭ» — i kryminalny aŭtarytet, i niejkaja pryhažunia, i jašče niešta. Naturalna, heta stvarała pastajannyja prablemy ŭ kamunikacyi ź inšymi viaźniami, tamu Šypul u vyniku atrymaŭ «nizki status».
Praz svoj psichičny stan Šypul moh brać čužyja rečy abo ježu, što stanaviłasia pryčynaj kanfliktaŭ i pastajannaha źbićcia. U takoj situacyi jaho pavinny byli pieravieści ŭ adzinočnuju kamieru, ale, jak tłumačyć Vinahradaŭ, administracyja nie chacieła tak rabić: lahčej abaviazać susiedziaŭ pa kamiery pryhladać za im.
Dziadok adznačaje, što administracyja viedała, što taho źbivajuć.
«Jon z padbitymi vačyma stajaŭ na praviercy. Zachodziać mianty, jakija praviarajuć, korpusnyja, opier Syrovatkin. I im kazali, i Syrovatkinu kankretna kazali: «Zabiarycie jaho, bo budzie tut nadzvyčajnaje zdareńnie». A Syrovatkin adkazvaŭ: «Mnie po***»», — cytuje błohier słovy vidavočcaŭ.
U vyniku paśla čarhovaha kradziažu sukamierniki pačali źbivać Šypula ŭsioj hrupaj prosta ŭ prahułačnym dvoryku. Jak śćviardžaje Dziadok, źniavoleny atrymaŭ šmatlikija paškodžańni — u jaho adbyŭsia razryŭ sielazionki i ŭtvarylisia hiematomy ŭnutranych orhanaŭ, taksama jamu adbili nyrku.
Pakolki ŭ hrodzienskaj turmie, pa słovach błohiera, u lubych kanfliktach vinavatymi ličać usich udzielnikaŭ, źbitaha Šypula razam z napadnikami adpravili ŭ ŠIZA (štrafny izalatar).
Z surjoznymi traŭmami mužčyna prabyŭ u izalatary piać sutak. Uvieś hety čas administracyja ihnaravała jaho stohny i pakuty. Tolki kali situacyja stała krytyčnaj, Šypula advieźli ŭ balnicu. Dziadok adznačaje, što ŭ balnicy pa nieviadomych pryčynach mužčynu nie zrabili apieracyju i viarnuli ŭ turmu.
Da svajoj kamiery źniavoleny nie dajšoŭ. Pa słovach Dziadka, Šypul pamior prosta ŭ kalidory («na pradole»).
Kab schavać chałatnaść i abaranić svaich ahientaŭ siarod źniavolenych, kiraŭnictva turmy (u pryvatnaści, supracoŭnik apieratyŭnaha adździeła Syrovatkin i tahačasny načalnik apieratyŭnaha adździeła Alaksiej Taran) z usioj hrupy tych, chto źbivaŭ Šypula, abrali adnaho. Na jaho ŭskłali ŭsiu vinu za zabojstva, u vyniku čaho, pa słovach Dziadka, mužčyna atrymaŭ 14 hadoŭ asablivaha režymu ŭ dadatak da svajho asnoŭnaha terminu.
«Ledź nie pramym tekstam jany kažuć: «Čym bolš vas pamre, tym lepš dla kryminahiennaj abstanoŭki ŭ Biełarusi», — kaža Dziadok pra administracyju hrodzienskaj turmy.
Ciapier čytajuć
Pahladzieli film «Piaščotna da siabie», źniaty pa dzika papularnaj biełaruskaj knizie — pra zaciukanuju žančynu, jakuju chočuć zrabić dla ŭsich zručnaj22
Kamientary