«Pryviazali da turnika, hałavu abmatali skotčam». Blizkija vajskoŭcaŭ u «DNR» paskardzilisia na katavańni
Akramia blizkich Illi, jašče niekalki svajakoŭ vajskoŭcaŭ paviedamlali pra katavańni ŭ hetaj čaści.
Svajaki 30‑hadovaha Illi V. z Krasnadarskaha kraju raspaviali «Ostorožno, novosti», što jon słužyŭ sapioram pa kantrakcie ŭ v/č 52892 u Horłaŭcy (DNR).
Naprykancy 2025 hoda Illa atrymaŭ kantuziju, kali razam z sasłužyŭcami najechaŭ na minu. Pavodle słoŭ blizkich, kamandavańnie na prośby dapamahčy nie reahavała, Illa sam rabiŭ bajcam pieraviazki na praciahu troch dzion. Paśla hetaha jon vyrašyŭ pakinuć čaść i źjechać u Danieck, kab adnavicca.
Unačy baćku Illi patelefanavaŭ mužčyna, jaki pradstaviŭsia staršynioj inžynierna-sapiornaj roty Michaiłam. Jon paprasiŭ pahavaryć i pierakanać Illu viarnucca ŭ čaść, kab jaho nie abviaścili samavolna pakinuŭšym častku. Taksama jon dasłaŭ baćku vajskoŭca rapart ab uznaharodžańni syna i zapeŭniŭ, što daść jamu adpačynak praź niekalki tydniaŭ: «Skazaŭ baćku, maŭlaŭ, chaj adpačnie paru dzion, i my pa jaho pryjedziem. Dadaŭ, što zrabiŭ peŭnyja vysnovy i ŭśviadomiŭ svaje pamyłki ŭ adnosinach da bajcoŭ».
Praź dzień Illu vyvieźli ŭ čaść. U toj ža dzień staršyna vydaliŭ usiu pierapisku ŭ miesiendžary i zabłakavaŭ baćkoŭ mužčyny. Illa źnik z suviazi, a paźniej z čužoha numara patelefanavaŭ blizkim i raspavioŭ, što ŭ toj dzień u jaho zabrali i raźbili telefon, a taksama parvali dakumienty, nibyta «bolš Illu jany nie spatrebiacca».
«Jaho advieźli ŭ niejki padvał, dzie ŭ spalnikach lažali inšyja vajskoŭcy. Im było zahadana nie razmaŭlać adzin z adnym. Tam u Illi ŭziali analiz DNK, a paźniej siarod nočy jaho vyvieli ŭ asobny pakoj, nadzieli kajdanki i pryviazali da turnika. Hałavu abmatali skotčam, u rot zasunuli šapku i dubinkami adbivali myšcy na praciahu hadziny».
U padvale, pavodle słoŭ blizkich, Illi pakazali jašče adzin vajenny kantrakt (termin dziejańnia papiaredniaha kantrakta skončyŭsia za niekalki tydniaŭ da hetaha), jaki niechta padpisaŭ zamiest jaho. Na nastupnuju ranicu Ilju razam ź inšymi bajcami, jak śćviardžajuć svajaki, z padvała adpravili na šturm. Kab zafiksavać paboi i paviedamić pra złačynstvy suprać jaho i inšych bajcoŭ, Ilja vyrašyŭ pakinuć zadańnie i adpravicca ŭ Danieck. Tudy da jaho pryjechali blizkija: «My źbiralisia vyvieźci jaho dadomu pa miescy žycharstva, prapiski i dalej źviarnucca va ŭsie pravaachoŭnyja orhany».
Na adnym z KPP Illu zatrymali supracoŭniki FSB. Siamja raspaviała pra situacyju, supracoŭniki zapeŭnili, što pryniali zajavu i nakirujuć zatrymanaha ŭ Śledčy kamitet i vajskovuju kamiendaturu dla dalejšych razhladaŭ. Blizkim Illi paabiacali, što ŭ čaść jaho nie adpraviać. Paźniej svajaki pajechali dadomu ŭ Krasnadarski kraj. Illa patelefanavaŭ im z vajskovaj kamiendatury ŭ horadzie Amvrosijeŭka (DNR), a paśla źnik.
Pa telefonie ŭ kamiendatury adkazali, što 26 śniežnia jaho ŭnačy zabrali nazad u čaść. Praź niekalki dzion patelefanavaŭ nampalit čaści i paviedamiŭ, što Illa pajšoŭ na bajavoje zadańnie i z 29‑ha ličycca źnikłym bieź viestak.
Akramia blizkich Illi, jašče niekalki svajakoŭ vajskoŭcaŭ paviedamlali pra katavańni ŭ hetaj čaści. Siemji bolš jak 100 bajcoŭ, abvieščanych źnikłymi bieź viestak, prosiać dapamahčy z pošukam rodnych.
«Dyk dadomu zabiary ałkaša abascanaha i vychodžvaj». Małady zahadčyk adździaleńnia balnicy nie strymlivaje siabie ŭ vyrazach u sacsietkach23
Kamientary
nu i słavno. połučił rovno to, čto zasłužił.
normalnym ludiam dažie maraťsia nie prišłoś.