U Kitai pačali baraćbu za maralnaść, u vyniku my možam kuplać vydatnaje vino tańniej
Kampanija Piekina za «čyściniu noravaŭ» siarod dziaržaŭnych słužboŭcaŭ stała niečakanym i balučym udaram pa suśvietnaj industryi vinarobstva. Strohaja zabarona na spažyvańnie ałkaholu padčas aficyjnych mierapryjemstvaŭ u spałučeńni z ahulnym ekanamičnym spadam pieratvaryli Kitaj z hałoŭnaha ruchavika suśvietnaha vinnaha handlu ŭ zonu hłybokaha kryzisu. Hetaja situacyja ŭžo vymušaje vytvorcaŭ ad Jeŭropy da Aŭstralii prymać radykalnyja miery — ad vykarčoŭvańnia łoz da źniščeńnia ŭradžaju, jaki ciapier niama kamu pradavać.
Z padrabiaznaściami znajomić The Wall Street Journal.
Historyja niečakanaha ŭzdymu Kitaja jak klučavoha rynku dla suśvietnaha vinarobstva pačałasia ŭ siaredzinie 2000‑ch hadoŭ. Za karotki čas kraina pieratvaryłasia ŭ mahutny ruchavik haliny, pavialičyŭšy svaju dolu ŭ suśvietnym imparcie ź mienš čym 1% da 8% da 2017 hoda.
U hety pieryjad, jaki publicysty nazyvali druhoj «čyrvonaj revalucyjaj», vytvorcy z Čyli, Aŭstralii, Kalifornii i Francyi atrymlivali kałasalnyja prybytki. Adzin z samych viadomych kitajskich baskietbalistaŭ Jaa Min pačaŭ raźlivać vino ŭ kalifarnijskaj dalinie Napa, a bahatyja kitajskija pakupniki nabyli kala 100 vinakurniaŭ u francuzskim Bardo.
Pik spažyvańnia byŭ dasiahnuty ŭ 2018 hodzie, kali Kitaj zakupiŭ zamiežnaha vina na sumu amal 3 miljardy dalaraŭ. U 2019 hodzie čverć ekspartu vina z Bardo išła ŭ Kitaj.
Adnak nieŭzabavie rynak sutyknuŭsia z šeraham ciažkich vyprabavańniaŭ. Spačatku pandemija COVID-19 istotna skaraciła mahčymaści dla zastollaŭ, a zatym maštabny abvał cen na nieruchomaść u Kitai prymusiŭ zamožnych hramadzian adčuć siabie biadniejšymi i admovicca ad pradmietaŭ raskošy. Bahatyja kitajskija ŭładalniki pačali pazbaŭlacca ad svaich francuzskich majontkaŭ.
Da ekanamičnych prablem dadałosia hieapalityčnaje supraćstajańnie. U 2020 hodzie Kitaj uvioŭ vysokija pošliny na aŭstralijskaje vino, što stała mocnym udaram dla znakamitaha aŭstralijskaha brenda Penfolds (u Kitai viadomy jak «Beń Fu», što aznačaje «imknieńnie da roskvitu»), jaki naležyć adnoj z najbujniejšych vinnych karparacyj — Treasury Wine Estates. Choć u 2024 hodzie pošliny byli admienieny i Penfolds pasprabavaŭ viarnuć pazicyi, nakiravaŭšy ŭ krainu vialikija partyi tavaru, situacyja na rynku ŭžo niezvarotna źmianiłasia.
Apošni ŭdar
Kančatkovy ŭdar pa handli naniesła kampanija lidara Si Czińpina za «maralnuju čyściniu» i žorstkuju ekanomiju. U mai 2025 hoda Piekin aficyjna zabaraniŭ užyvańnie ałkaholu na mierapryjemstvach urada i Kamunistyčnaj partyi. Kitajski orhan pa baraćbie z karupcyjaj pačaŭ pieraśled čynoŭnikaŭ, jakija sumiaščali bankiety ź dziaržaŭnymi spravami.
Rezanans vyklikaŭ vypadak u pravincyi Chenań, dzie paśla abiedziennaha zastolla pamior miascovy čynoŭnik, što pryviało da pakarańnia 9 jaho kaleh. U vyniku strach pierad parušeńniem praviłaŭ staŭ nastolki mocnym, što navat dziaržaŭnyja ałkaholnyja kampanii pierastali padavać śpirtnoje na svaich kanfierencyjach.
Dadatkovym faktaram stała źmiena spažyvieckich zvyčak u samim Kitai. Vino straciła svoj «areoł» modnaha napoju. Maładyja spažyŭcy asacyjujuć jaho sa stomnymi pracoŭnymi sustrečami i ličać niepryjemnym na smak.
Hetyja palityčnyja i sacyjalnyja źmieny pryviali da taho, što ŭ minułym hodzie impart vina ŭ Kitaj skaraciŭsia jašče na 11%, dasiahnuŭšy pałovy ad uzroŭniu 2018 hoda. Dla vinarobaŭ pa ŭsim śviecie, jakija spadziavalisia na Kitaj u toj čas, jak spažyŭcy ŭ inšych rehijonach, u tym liku ŭ Jeŭropie, stali pić mienš, heta stała sapraŭdnaj katastrofaj.
U listapadzie rehijanalnaja vinnaja asacyjacyja Riverland Wine na poŭdni Aŭstralii nakiravała ŭradu štata «Terminovy adkryty list», u jakim havaryłasia, što cana na vinahrad hatunku Šyraz u rehijonie źniziłasia bolš čym na dźvie traciny z momantu pačatku surjoznych prablem na kitajskim rynku ŭ 2020 hodzie. Čakajecca, što ŭ hetym hodzie ceny buduć jašče nižejšymi.
Siarod rehijonaŭ, jakija paciarpieli bolš za ŭsio, — Bardo. Spačatku kitajskija ŭładalniki pačali pazbaŭlacca ad svaich majontkaŭ u rehijonie, a ŭ minułym hodzie ekspart ź jaho ŭ Kitaj skaraciŭsia na 28%. Z 2023 hoda ŭ Bardo było vykarčavana kala 20% svaich vinahradnikaŭ.
Vinnaja karparacyja Treasury Wine Estates u śniežni 2025 hoda zajaviła, što na składach u Kitai zastalisia liški vina na 150 miljonaŭ dalaraŭ, i abviaściła pra skaračeńnie pastavak. Jeŭrapiejskija hihanty Pernod Ricard i Diageo taksama fiksujuć dvuchznačnaje padzieńnie prodažaŭ.
Asabliva baluča kryzis udaryŭ pa nievialikich vytvorcach. Pavodle Cima Makmalena, uładalnika aŭstralijskaj vinakurni Borambola Wines, u 2019 hodzie jon atrymlivaŭ 40% prybytku ad Kitaja, a za apošni hod nie zafiksavaŭ tam nivodnaha prodažu. Ciapier jon vymušany pakidać 30% uradžaju hnić na łozach i asabista vykonvać ciažkuju fizičnuju pracu, kab choć niejak skaracić vydatki.
Niekatoryja inšyja vytvorcy pradajuć vydatnaj jakaści viny tańniej, čym raniej.
Ciapier čytajuć
Fiaduta rezka adkazaŭ Kaleśnikavaj: Za što vy zmahalisia ŭ 2020 hodzie, nie cikavić nikoha, akramia miadźviedziaŭ ź bierlinskaha zaaparka, jakija vas atačajuć4848
Kamientary
Udakładnicie, kali łaska, dzie vino tańnieje stanovicca? Za apošnija 5 hadoŭ vino, katoraje ja zvyčajna kuplaju, padaražeła prykładna ŭ 3 razy. Heta ŭ Letuvie. Nie padobna, kab vytvorcy vina sapraŭdy namahalisia pradavać jaho liški, kab kampiensavać stratu kitajskaha rynku.