Ludzi pjuć mienš piva — Heineken skaračaje da 6 tysiač supracoŭnikaŭ
Adzin z najbujniejšych vytvorcaŭ piva ŭ śviecie rychtujecca da surjoznych źmien: kampanija pierahladaje płany na bližejšyja hady i pačynaje maštabnuju aptymizacyju. Kiraŭnictva pryznaje, što rynak źmianiŭsia, i ciapier treba šukać novyja sposaby zarablać i ekanomić.
Hałandski pivavarny hihant Heineken abviaściŭ pra namier skaracić da 6000 pracoŭnych miescaŭ pa ŭsim śviecie na praciahu nastupnych dvuch hadoŭ. Jak adznačaje The Guardian, heta składaje amal 7% ad ahulnaj kolkaści piersanału kampanii. Kampanija idzie na hety krok na fonie źnižeńnia popytu na piva i składanaj situacyi na rynkach.
Vytvorca brendaŭ Heineken, Amstel i Tiger paviedamiŭ, što skaračeńni zakranuć jak vytvorčyja padraździaleńni, tak i administracyjny piersanał u miežach jaho 87‑tysiačnaha hłabalnaha štatu. Pavodle kiraŭnictva, miery buduć realizoŭvacca ŭ Jeŭropie i inšych rehijonach prysutnaści kampanii. Častka zvalnieńniaŭ źviazanaja z raniej abvieščanaj rearhanizacyjaj łancužkoŭ pastavak, hałaŭnoha ofisa i rehijanalnych padraździaleńniaŭ.
Druhaja pa vieličyni ŭ śviecie pivavarnaja kampanija (pa rynkavym košcie) taksama paniziła prahnozy rostu prybytku na 2026 hod. U hetym hodzie Heineken čakaje rost prybytku ŭ dyjapazonie ad 2% da 6%, što značna nižej za raniej prahnazavanyja na 2025 hod pakazčyki ŭ 4—8%.
Pa vynikach minułaha hoda ahulnyja abjomy prodažaŭ piva skaracilisia na 1,2% u paraŭnańni z 2024 hodam. Kampanija i jaje kankurenty zmahajucca sa spadam prodažaŭ, asabliva ŭ Jeŭropie i Paŭnočnaj Amierycy.
Analityki adznačajuć, što na situacyju ŭpłyvajuć niekalki faktaraŭ. Pa-pieršaje, ludzi skaračajuć vydatki z-za rostu koštu žyćcia. Pa-druhoje, častka spažyŭcoŭ śviadoma pamianšaje ŭžyvańnie ałkaholu ź mierkavańniaŭ zdaroŭja. Dadatkova na pavodziny ludziej paŭpłyvali źmieny ładu žyćcia i dyjety, u tym liku šyrokaje vykarystańnie preparataŭ dla źnižeńnia vahi.
«My robim heta dziela ŭmacavańnia našaj apieracyjnaj dziejnaści i dla taho, kab mieć mahčymaść inviestavać u rost», — rastłumačyŭ žurnalistam finansavy dyrektar Harald van den Bruk paśla publikacyi hadavoj spravazdačy.
Naviny pra aptymizacyju vydatkaŭ byli stanoŭča ŭspryniaty inviestarami: akcyi Heineken na biržy ŭ Amsterdamie padskočyli amal na 4% i dasiahnuli najvyšejšaha ŭzroŭniu za apošnija šeść miesiacaŭ.
Jak adznačaje vydańnie, situacyja ŭ kampanii ŭskładniajecca i źmienami ŭ kiraŭnictvie. U studzieni niečakana abviaściŭ pra adstaŭku hienieralny dyrektar Dołf van den Brynk, jaki kiravaŭ Heineken šeść hadoŭ. Jon pakinie pasadu ŭ mai. Pavodle źviestak, na jaho ŭzmacniaŭsia cisk z boku inviestaraŭ, jakija patrabavali bolš vysokich tempaŭ rostu i pavyšeńnia efiektyŭnaści pry abmiežavanych resursach.
Pakul kampanija nie nazvała imia pierajemnika. Analityki ličać, što novy kiraŭnik atrymaje kampaniju, u jakoj užo pryniatyja klučavyja, ale niaprostyja rašeńni, i pierad im paŭstanie zadača viarnuć piŭnamu hihantu dynamiku raźvićcia va ŭmovach źmienlivaha spažyvieckaha popytu.
«Čamu my pavinny niejak uščemlivać siabie?». Dyrektarka RTBD patłumačyła, čamu pastaviła śpiektakl pavodle Puškina ŭ adnym z apošnich teatraŭ krainy, jaki pracavaŭ pa-biełarusku5757
Kamientary