Vialikaja suma najaŭnych hrošaj, paŭtysiačy patronaŭ. Što viadoma pra spravu zatrymanaha ŭ Charkavie biełarusa-dobraachvotnika

Alaksandr Krasoŭski vajavaŭ spačatku ŭ pałku imia Kastusia Kalinoŭskaha, a potym — u padraździaleńni «Tur» u składzie 225‑ha asobnaha šturmavoha bataljona.

Krasoŭski maje vyšejšuju adukacyju, razam z žonkaj vychoŭvajuć dačku, jakaja maje druhuju hrupu invalidnaści. Radyjo Svaboda vyśvietliła niekatoryja detali jaho spravy.

Spravu rasśledujuć sa studzienia

Spravu, jakuju rasśleduje adzin z adździełaŭ Charkaŭskaj abłasnoj palicyi, zaviali sioleta 21 studzienia, a zatrymali biełarusa tolki praz amal dva miesiacy. Uvieś hety čas — ad uzbudžeńnia spravy da zatrymańnia — za im viali tajemnyja śledčyja dziejańni.

Uradženca Minska padazrajuć u samavolnym pakidańni vajskovaj častki (zhodna z č. 5 artykuła 407 karajecca pazbaŭleńniem voli na termin ad 5 da 10 hadoŭ), i ŭ našeńni, zachoŭvańni, nabyćci, pieradačy i zbycie biez praduhledžanaha zakonam dazvołu zbroi i bajavych prypasaŭ (zhodna z č. 1 artykuła 263 karajecca pazbaŭleńniem voli na termin ad troch da siami hadoŭ).

Ci było samavolnaje pakidańnie častki

Jak paviedamiła Svabodzie krynica, znajomaja z častkaj materyjałaŭ spravy, biełarus nie pryznaje, što biez pavažnych pryčyn nie viarnuŭsia na słužbu.

Jon adznačyŭ, što jašče ŭ žniŭni 2025 hoda paviedamiŭ kamandziru pra namier zvolnicca, ale toj jamu admoviŭ. U vyniku Alaksandr Krasoŭski ŭ kastryčniku 2025 hoda ŭziaŭ štohadovy adpačynak i napisaŭ rapart na imia kamandzira suchaputnych vojskaŭ ab zvalnieńni.

Z 30 kastryčnika da 7 listapada jon prachodziŭ miedycynski ahlad, a potym nibyta i atrymaŭ zahad ab zvalnieńni, tamu i nie viarnuŭsia ŭ rasparadžeńnie vajskovaj častki.

U vajskovaj častcy paćvierdzili, što Alaksandr Krasoŭski sapraŭdy na padstavie zahadu kamandzira vajskovaj častki z 25 kastryčnika 2025 hoda ŭziaŭ adpačynak da 10 listapada. Biełarus paviedamiŭ, što tady ž zdaŭ usiu majomaść i pasadu kamandziru. Ale praz čatyry dni toj adklikaŭ svoj zahad «z-za abvastreńnia bajavoj situacyi», na padstavie jakoha biełarus pavinien byŭ viarnucca ŭ vajskovuju častku da 30 kastryčnika. Hetaha Alaksandr nie zrabiŭ, i ŭ vajskovaj častcy pačali słužbovaje rasśledavańnie.

Kali vyrašałasia pytańnie ab aryšcie biełarusa, sud abapiraŭsia na infarmacyju, atrymanuju mienavita z vajskovaj častki.

Što znajšli padčas vobšukaŭ

Vobšuk pravodzili 14 sakavika. U arandavanym budynku znajšli 680 tysiač jeŭra ŭ kupiurach pa 50 i 100 jeŭra, 518 patronaŭ roznaha kalibru, dva zapały dla ručnoj hranaty i try hranaty.

Alaksandr Krasoŭski zajaviŭ, što hrošy pryznačalisia dla nabyćcia ciahačoŭ, aŭtamabilaŭ i inšaj techniki dla inšaj bryhady, u jakuju jon płanavaŭ iści słužyć paśla zvalnieńnia z papiaredniaj vajskovaj častki, a bojeprypasy naležać nie jamu, a inšamu vajskoŭcu.

Surazmoŭnik Svabody sapraŭdy paćvierdziŭ, što pa hetym epizodzie praviarajecca jašče adzin ukrainski vajskoviec.

Darečy, sud pieršapačatkova admoviŭ śledstvu ŭ aryšcie ŭsich znojdzienych padčas vobšuku rečaŭ — jak hrošaj, tak i bojeprypasaŭ, pakolki ŭ adpaviednym pazovie śledčaha nie było paznačana miesca ich zachavańnia. Sud daŭ 72 hadziny na vypraŭleńnie pamyłak, ale pakul dakładna nie ŭdałosia vyśvietlić, ci źviartalisia śledčyja z novym adpaviednym chadajnictvam.

Ciapier biełaruskaha dobraachvotnika ŭtrymlivajuć u Charkaŭskim śledčym izalatary. Tam jon budzie znachodzicca sama mienš da 12 traŭnia. Pry nieabchodnaści śledčyja bližej da hetaj daty mohuć źviarnucca pa padaŭžeńnie terminu ŭtrymańnia jaho pad vartaj.

• 3
• 0
• 0
• 5
• 3
• 1
• 3
• 0