Viadomaja rasijskaja śpiavačka i jaje biełaruski muž, daradca Kadyrava, pieraviali na lačeńnie trochhadovaj Ksiušy z SMA bolš za 100 tysiač jeŭra
Litaralna za dzień dabračynny rachunak u rasijskich rublach, adkryty dla zboru na ratavalny ŭkoł dla trochhadovaj Ksiušy z Mahilova, papoŭniŭsia amal na 100 tysiač jeŭra — pryčym adnoj tranzakcyjaj.
Za taki mahutny ryvok u zbory vałanciory padziakavali śpiavačcy Keci Tapuryja, salistcy hurta «A-Studyjo», i kampanii jaje muža. Havorka idzie pra Lva Dziańhova (Paŭła Huzbanda) — uradženca Minska, biznesmiena, jaki pry hetym źjaŭlajecca daradcam kiraŭnika Čačni Ramzana Kadyrava i dziaržsakratara Sajuznaj dziaržavy Dźmitryja Mieziencava.
«My chočam vykazać biaźmiežnuju, vielizarnuju padziaku našym hałoŭnym čaraŭnikam za hety mahutny ryvok — Keci Tapuryja, jaje mužu, ich kampanii i supracoŭnikam! Vy padaryli nam kryły i vieru ŭ toje, što ŭsio mahčyma. Dziakuj vam za vaša dobraje serca, za nieabyjakavaść i za toje, što vy z nami ŭ hetym nialohkim zmahańni», — napisali vałanciory ŭ akaŭncie, u jakim dzielacca navinami pa zbory.
Leŭ Dziańhoŭ — viadomaja fihura ŭ palityčnym i hramadskim žyćci Rasii, a ź niadaŭnich časoŭ — i ŭ bijatechnałahičnaj halinie. Jon skončyŭ škołu ŭ Minsku, ale vyšejšuju adukacyju atrymaŭ u Rasii i Niamieččynie. Jaho proźvišča stała šyroka viadomaje ŭ druhoj pałovie 2010‑ch u suviazi z asabistym udziełam u pracesie vyzvaleńnia z-za krat u Livii rasijskich i biełaruskich hramadzian.
U kancy 2022 hoda Leŭ Dziańhoŭ stvaryŭ kampaniju «Adam bija». Pa paviedamleńniach ŚMI, u pačatku 2023‑ha jana zaklučyła kantrakt na realizacyju pradukcyi BNBK na rasijskim rynku na sumu 11,82 młrd rasijskich rubloŭ (kala $150 młn). U pačatku hetaha ž hoda Leŭ Dziańhoŭ staŭ daradcam kampanij CITIC International Investments i CITIC Construction u Rasii i Biełarusi. Adna ź ich, SITIS International Investments, źjaŭlajecca adnym z zasnavalnikaŭ i klučavych akcyjanieraŭ BNBK. U stvareńni karparacyi brali taksama ŭdzieł biełaruskaja dziaržava i hrupa kampanij ź Vialikabrytanii i AAE (paźniej ich skład źviedaŭ źmieny).
Aficyjna kompleks vytvorčaści karmoŭ, premiksaŭ i aminakisłot, raźmieščany ŭ Puchavickim rajonie, byŭ zapuščany ŭ listapadzie 2022 hoda. Dla zabieśpiačeńnia jaho syravinaj BNBK byli pieradadzienyja haspadarki ŭ piaci rajonach krainy z ahulnym ziamielnym fondam zvyš 100 tys. ha.
Taksama Dziańhoŭ uvajšoŭ u radu dyrektaraŭ Biełaruskaj nacyjanalnaj bijatechnałahičnaj karparacyi.
U tym liku dziakujučy pieravodu Dziańhova i Tapuryi, na siońnia na ŭkoł dla Ksiušy zastałosia sabrać 30% ad ahulnaj sumy — krychu bolš za 510 tysiač dalaraŭ.
Kamientary
2) i čamu tak zvanaja "Sajuznaj dziaržavy" nie ŭ koskach ?