Cana adnoj pajezdki: u Homieli asudzili dziaŭčynu, jakaja na samakacie źbiła piensijanierku. Jak pakarali?
U Homieli sud vynies prysud 24‑hadovaj dziaŭčynie, jakaja ŭ žniŭni minułaha hoda stała vinavataj u DTZ na piešachodnym pierachodzie — traŭmy atrymała 66‑hadovaja piensijanierka.
U žniŭni minułaha hoda kala poŭdnia dziaŭčyna, viartajučysia dadomu paśla kaśmietyčnych pracedur, vyrašyła skarystacca pasłuhaj arendy elektrasamakata. Dziaŭčyna arandavała samakat na vulicy Osipava, płanujučy dajechać da doma. Adnak zamiest taho kab ruchacca pa tratuary abo vieładarožcy, jak taho patrabujuć Praviły darožnaha ruchu, jana vyjechała na prajeznuju častku, pišuć «Homielskija viedamaści».
Ruchajučysia pa vulicy Narodnaha Apałčeńnia, dziaŭčyna nabliziłasia da nierehulavanaha piešachodnaha pierachoda. U hety čas pa «ziebry» pačała pierachodzić darohu žančyna. Pavodle słoŭ samoj abvinavačanaj, jana vyrašyła nie tarmazić, a abjechać tuju źleva. Adnak piešachod zrabiła krok u toj ža bok, i sutyknieńnia paźbiehnuć nie ŭdałosia.
Ad udaru abiedźvie ŭpali. U vyniku piensijanierka atrymała surjoznyja traŭmy: pierałom kości pravaj stapy, rvanuju ranu zapiaścia i hiematomu patyličnaj vobłaści. Miedycynskaja ekśpiertyza kvalifikavała hetyja paškodžańni jak mienš ciažkija — lačeńnie praciahvałasia bolš za čatyry miesiacy.
Vinavataja nie stała admaŭlać svaju vinu, adnak pamier kampiensacyi za fizičnyja i maralnyja pakuty paciarpiełaj vyklikaŭ sprečki.
Adrazu paśla zdareńnia dziaŭčyna nie schavałasia ź miesca DTZ. Razam ź minakom jana dapamahła paciarpiełaj padniacca i pravodziła da doma. Dziaŭčyna pakinuła svaje kantakty, a paźniej u toj ža dzień pa prośbie paciarpiełaj kupiła nieabchodnyja leki.
Paciarpiełaja nieŭzabavie adčuła siabie horš i vyklikała chutkuju, paśla čaho miedrabotniki paviedamili pra zdareńnie ŭ milicyju.
Sud ustanaviŭ, što ŭ momant DTZ samakat byŭ technična spraŭny, nadvorje było jasnym (bačnaść składała 30 kiłamietraŭ), a sama dziaŭčyna znachodziłasia ŭ ćviarozym stanie. U sudzie hamialčanka całkam pryznała svaju vinu i raskajałasia ŭ zroblenym.
Rašeńnie suda
Sud pryznaŭ dziaŭčynu vinavataj pa č. 1 art. 321 Kryminalnaha kodeksa (parušeńnie ŭdzielnikam darožnaha ruchu praviłaŭ biaśpieki ruchu, jakoje paciahnuła pa nieaściarožnaści pryčynieńnie mienš ciažkaha cialesnaha paškodžańnia).
Pry vyznačeńni pakarańnia byli ŭličany stanoŭčyja charaktarystyki i dapamoha paciarpiełaj adrazu paśla DTZ.
Vynikovyja spahnańni:
štraf: 70 bazavych vieličyń (3150 rubloŭ);
maralnaja škoda: 5000 rubloŭ na karyść paciarpiełaj;
dziaržpošlina: 135 rubloŭ.
Pytańnie ab pakryćci materyjalnaj škody (730 rubloŭ) budzie vyrašacca ŭ asobnaj hramadzianskaj vytvorčaści.
Da ŭstupleńnia prysudu ŭ siłu dziaŭčyna zastajecca pad padpiskaj ab niavyjeździe.
Ciapier čytajuć
Na poŭnačy Biełarusi isnavała vielizarnaje voziera — u 150 razoŭ bolšaje za Narač. Jano źnikła ŭ vyniku pryrodnaj katastrofy, ale ślady zaŭvažnyja i siońnia77
Kamientary