Urołah patłumačyŭ, jak prajaŭlajecca mužčynski klimaks, čym jon niebiaśpiečny i što rabić

Tradycyjna ličyłasia, što mužčynski klimaks pačynajecca paśla 45 hadoŭ, a ŭzrovień testasteronu mienšaje pastupova, prykładna na 1—2% štohod. U adroźnieńnie ad žanočaha klimaksu hety praces adbyvajecca pavoli i biez rezkich skačkoŭ.

Adnak siońnia, pavodle nazirańniaŭ, situacyja źmianiłasia: prykmiety deficytu testasteronu ŭsio čaściej źjaŭlajucca ŭžo ŭ 30—35 hadoŭ. Asnoŭnaja pryčyna — małaruchomy ład žyćcia, mała fizičnych nahruzak i ježa na asnovie ultraapracavanych praduktaŭ.

Arhanizm čałavieka raźličany na toje, što kroŭ pieramiaščajecca nie tolki dziakujučy sercu, ale i dziakujučy pracy myšcaŭ noh, jakija «padšturchoŭvajuć» jaje ŭvierch. Kali ž čałaviek siadzić i siadzić, lažyć i lažyć, hety miechanizm faktyčna adklučajecca, kroŭ zastojvajecca ŭ vobłaści taza, što moža pryvodzić u tym liku da źnižeńnia ŭzroŭniu testasteronu.

Što jašče ŭpłyvaje na rańni mužčynski klimaks

Siarod inšych faktaraŭ, jakija paskarajuć harmanalnyja źmieny, daktary vyłučajuć:

lišniuju vahu — tłuščavaja tkanka spryjaje vypracoŭcy žanočych harmonaŭ (estrahienaŭ), što parušaje bałans;

prablemy ź piečańniu — hety orhan udzielničaje ŭ mietabaliźmie harmonaŭ, i jaho paškodžańnie viadzie da dysbałansu;

vysoki ŭzrovień stresu — harmon kartyzoł parušaje pracu sistemy, jakaja rehuluje vypracoŭku testasteronu.

Jak raspaznać deficyt testasteronu

Źnižeńnie ŭzroŭniu hetaha harmonu ŭpłyvaje nie tolki na seksualnaje žyćcio. Simptomy mohuć być značna šyrejšyja:

• pavyšanaja stomlenaść i parušeńni snu;
• pierapady nastroju, apatyja, strata zdolnaści atrymlivać zadavalnieńnie;
• źnižeńnie libida i prablemy z erekcyjaj;
• tachikardyja bieź vidavočnych pryčyn;
• źnižeńnie fizičnaj vynoślivaści i adsutnaść vyniku ad trenirovak;
• pavyšanaja patlivaść;
• vypadzieńnie vałasoŭ, pihmientnyja plamy na tvary;
• raźvićcio mietabaličnaha sindromu, jaki moža pryvieści da dyjabietu, atłuścieńnia i hipiertanii.

Zamknionaje koła: kali niama sił źmianić žyćcio

Jak tłumačyć śpiecyjalist, u niekatorych vypadkach uzrovień testasteronu možna pavysić bieź lekaŭ — praź źmianieńnie ładu žyćcia: źnižeńnie stresu, admova ad ałkaholu, rehularnyja fizičnyja nahruzki i zbałansavanaje charčavańnie.

Ale tut uźnikaje prablema: mienavita pry nizkim testasteronie čałavieku brakuje enierhii i matyvacyi, kab ukaranić hetyja źmieny. U vyniku ŭtvarajecca zamknionaje koła.

U takich situacyjach doktar moža pryznačyć lačeńnie — spačatku dla stymulacyi ŭłasnaj vypracoŭki harmonu, a kali heta niemahčyma, — harmanalnuju zamiaščalnuju terapiju.

Pry hetym, pavodle Hłavinskaha, strach pierad pabočnymi efiektami časta pierabolšany: ryzyki ad nizkaha testasteronu mohuć być bolš surjoznymi, čym ad samoha lačeńnia.

Čym niebiaśpiečny nizki testasteron

Deficyt testasteronu zakranaje ŭvieś arhanizm:

• uźnikaje mietabaličny sindrom i pavyšajecca ryzyka dyjabietu 2 typu;
• tłušč pačynaje nazapašvacca ŭ visceralnaj vobłaści — rastuć žyvot i baki. Hety tłušč mietabalična aktyŭny i vypracoŭvaje pra-zapalenčyja cytakiny, a taksama harmony, u tym liku leptyn, što moža pryvodzić da chraničnaha zapaleńnia i parušeńniaŭ abmienu rečyvaŭ;
• słabieje kaściavaja tkanka, pavialičvajecca ryzyka asteaparozu i pierałomaŭ;
• nizki ŭzrovień testasteronu niehatyŭna ŭpłyvaje na stan sasudaŭ: pavyšajecca ŭzrovień chalesterynu i ŭzrastaje ryzyka aterasklerozu;
• čałaviek chutčej stareje jak źniešnie, tak i ŭnutrana.

Nie hienietyka, a ład žyćcia

Doktar padkreślivaje: niama padstaŭ ličyć, što ŭzrovień testasteronu zaležyć ad nacyjanalnaści. Siarod pacyjentaŭ jość mužčyny, jakija i ŭ 70—80 hadoŭ zachoŭvajuć vysokuju aktyŭnaść — i jany taksama biełarusy.

Klučavuju rolu adyhryvajuć ład žyćcia i asiarodździe: charčavańnie, uzrovień fizičnaj aktyŭnaści, kolkaść vitaminu D i jodu, ahulny rytm žyćcia. Pry hetym prablemaj zastajecca niežadańnie mnohich mužčyn sačyć za zdaroŭjem.

Jakija analizy treba zdać abaviazkova

Kab svoječasova zaŭvažyć prablemu, varta prachodzić štohadovy čekap. U bazavy śpis uvachodziać:

• harmanalny profil (ahulny testasteron, prałaktyn, estradyjoł, TTH-tyratropny harmon, ŁH-luteinizujučy harmon, kartyzoł, insulin);
• bijachimičny analiz kryvi;
• HSPH (hłabulin, jaki źviazvaje pałavyja harmony);
• vitamin D;
• PSA (ahulny i svabodny) — dla mužčyn starejšych za 40 hadoŭ.

Nie treba žyć z adčuvańniem pastajannaj stomlenaści. Śpicie bolš, davajcie fizičnyja nahruzki, nie aščadžajcie na charčavańni, rabicie toje, što treba dla dušy. Žyćcio moža i pavinna być lepšym.

• 24
• 0
• 1
• 1
• 1
• 2
• 0
• 1