«U svoj čas ja zrabiŭ pamyłku». Trochrazovy futbalist hoda Biełarusi Ihar Stasievič zapisaŭ pakajannaje videa
Na jutub-kanale Biełaruskaj fiederacyi futboła źjaviłasia videa, hieroj jakoha — viadomy futbalist Ihar Stasievič, jaki byŭ trojčy nazvany najlepšym hulcom Biełarusi. Siarod inšaha jon kajecca ŭ zroblenaj «u svoj čas» pamyłcy i havoryć pra toje, što moža prynosić karyść biełaruskaj dziaržavie i futbołu.
«Na žal, u svoj čas ja zrabiŭ pamyłku. A mnie b chaciełasia prynosić karyść svajoj krainie, biełaruskamu futbołu, dapamahać raźvivacca miascovym chłopcam, jakija maładyja, jakija tolki pačynajuć svoj šlach. Bo vopyt u mianie bahaty i, u pryncypie, ja mahu šmat im padkazać», — skazaŭ 40‑hadovy były futbalist BATE.
Paśla padziej 2020 hoda proźvišča Stasieviča trapiła ŭ čorny śpis. Choć jon zapisaŭ tak zvanaje pakajannaje videa, u 2022 hodzie jahonaje mahčymaje viartańnie ŭ minskaje «Dynama» było asabista zabaroniena tahačasnym ministram sportu Siarhiejem Kavalčukom.
U vyniku ciapier 40‑hadovy Stasievič vymušany byŭ praciahvać karjeru za miažoj — apošnim časam jon hulaŭ u kazachstanskim «Atyraŭ».
Stasievič za svaju karjeru paśpieŭ vystupić za BATE, minskaje «Dynama», «Atyraŭ», «Homiel», «Šachcior» i inšyja kamandy.
U jahonaj bijahrafii — 10 tytułaŭ čempijona Biełarusi, 5 pieramoh u Kubku krainy, zvańni najlepšaha futbalista čempijanatu (2014, 2015, 2016, 2018, 2019) i najlepšaha futbalista Biełarusi (2015, 2018, 2019). Jon taksama prymaŭ udzieł u hrupavych etapach Lihi čempijonaŭ i Lihi Jeŭropy, a ŭ siezonie 2018/2019 staŭ najlepšym asistentam u Lizie Jeŭropy.
U lipieni minułaha hoda Stasievič, pravioŭšy 732 matčy na prafiesijnym uzroŭni, staŭ absalutnym rekardsmienam Biełarusi. Jon abyšoŭ Alaksandra Hleba, jaki raniej utrymlivaŭ pieršynstvo ŭ Kłubie Siarhieja Alejnikava — asacyjacyi biełaruskich futbalistaŭ, što zhulali bolš za 500 aficyjnych matčaŭ na najvyšejšym uzroŭni.
Stasievič staŭ rekardsmienam Biełarusi pa kolkaści matčaŭ. Jamu padaryli łukašenkaŭski mierč, chacia doma futbalist u čornym śpisie
U Minsku pierad pačatkam futbolnaha matča kapitany kamandaŭ pabilisia vielikodnymi jajkami VIDEA
U Smarhoni ŭ pieršym matčy futbolnaha siezonu miač na pole dastavili na traktary VIDEA
«Bulba» z Oršy pajšoŭ vajavać za Rasiju — ciapier siastra šukaje jaho ci chacia b jaho pareštki7
Kamientary
Ihoŕ, my vsie poniali, nado idti dalšie.