U Minsku pjany mužčyna abrabavaŭ takuju ž žančynu. Ciapier budzie płacić štraf
U Minsku vynieśli prysud 44‑hadovamu mužčyny, jakoha abvinavačvali ŭ rabavańni niećviarozaj žančyny. Pry hetym sam rabaŭnik znachodziŭsia ŭ tym ža stanie, paviedamlaje ahienctva «Minsk-Naviny».
Jak vyśvietliłasia, u toj dzień mužčyna byŭ mocna pjany — jon vypiŭ kala 0,7 litra harełki, ale hetym nie zadavoliŭsia i nočču pajšoŭ na zapraŭku pa piva. Pa darozie nazad kala prypynku «Ščarbakova» jon zaŭvažyŭ žanočuju sumačku kala śmietnicy i zabraŭ jaje sabie.
Ale kali jon adyšoŭ u kusty i pačaŭ hladzieć źmieściva sumački, to pabačyŭ pobač žančynu, jakaja lažała na ziamli i nie mahła ŭstać — jana taksama była mocna pjanaja. Mužčyna zrazumieŭ, što ŭ jaho rukach jaje rečy. Ale spačatku jon navat dapamoh žančynie padniacca, paśla ž zapatrabavaŭ źniać i addać jamu załatyja zavušnicy. Žančyna biez supracivu addała ŭpryhožańni.
Paśla hetaha mužčyna zabraŭ sumačku i pajšoŭ dalej pa svaich spravach. U sumačcy byli dakumienty, telefon, kašalok z kartkami i hrašyma (129 dalaraŭ i 5 rubloŭ), kaśmietyka i inšyja rečy. Žančyna išła za rabaŭnikom i prasiła viarnuć majomaść, ale jon na jaje prośby nie źviartaŭ uvahi.
Paźniej jon patraciŭ hrošy na svaje patreby, zavušnicy addaŭ maci, a telefon pieradaŭ žoncy, skazaŭšy, što znajšoŭ jaho. Žonka potym viarnuła telefon uładalnicy.
Paciarpiełaja žančyna paśla incydentu źviarnułasia ŭ milicyju. Paśla taho, jak padazravanaha zatrymali, jon całkam pryznaŭ vinu, raskajaŭsia i kampiensavaŭ škodu. Mužčyna pracavaŭ na aŭtamyjcy i raniej užo mieŭ prablemy z zakonam.
Sud pryznaŭ jaho vinavatym u rabavańni. U vyniku jamu pryznačyli štraf u pamiery 100 bazavych vieličyń (4500 rubloŭ), a taksama abaviazali prajści prymusovaje lačeńnie ad chraničnaha ałkahalizmu.
Ciapier čytajuć
Pamiatajecie Daniiła z Ofisa Cichanoŭskaj, jakomu za dva dni sabrali hrošy na ankałahičnuju apieracyju? Jamu napisaŭ toj samy adnakłaśnik, jaki jaho ŭdaryŭ — z čaho ŭsio i pačałosia44
Kamientary