Sa skaładromam i załaj boksa. Kompleks «Dynama» na vulicy Daŭmana adkryjuć u mai paśla rekanstrukcyi
Znakamitaha knižnaha kirmašu tut nie budzie. Nie budzie i vystaŭ žyvioł.
U spartyŭnym kompleksie «Dynama», raźmieščanym na vulicy Daŭmana, paśla rekanstrukcyi buduć zajmacca kala 2 000 dziaciej sa spartyŭnych škoł «Dynama» pa 12 vidach sportu, pišuć «Minsk-Naviny».
Rekanstrukcyja spartkompleksu pačałasia ŭ mai 2024 h. Da apošniaha momantu tut treniravalisia pradstaŭniki pravaachoŭnych viedamstvaŭ, vychavancy spartyŭnych škoł Biełaruskaha fizkulturna-spartyŭnaha tavarystva «Dynama», paralimpijcy. Usiaho zajmalisia kala paŭtary tysiačy spartsmienaŭ, nie ličačy prychilnikaŭ aktyŭnaha ładu žyćcia.
Pierš za ŭsio całkam zamianili kamunikacyi. Praviali pierapłaniroŭku.
Ad raniejšaha budynka zastaŭsia tolki karkas: budynak zachavaŭ raniejšyja habaryty, ale napaŭnieńnie stała sučasnym.
Pavialičyłasia kolkaść placovak, źjaviłasia mahčymaść zajmacca novymi vidami sportu. A na fasadzie budynka krasujecca firmovaja litara «D» u rombie.
Na vulicy, akramia futbolnaha pola i tenisnych kortaŭ, źjaviłasia varkaŭt-placoŭka. Jość jašče adna — univiersalnaja, jakuju možna vykarystoŭvać dla mini-futboła, valejboła i baskietboła. Razhladajecca mahčymaść uźviadzieńnia pobač sa spartkompleksam asobnaha budynka cira: jon nieabchodny dla padrychtoŭki prafiesijnych spartsmienaŭ, vychavancaŭ SDIUŠAR, pradstaŭnikoŭ siłavych struktur. Taksama vyvučajecca pierśpiektyva ŭładkavańnia kortaŭ dla novaha i papularnaha napramku — padeł-tenisa.
Źmianilisia i sami zały. U lohkaatletyčnym maniežy ciapier možna pravodzić treniroŭki pa vaśmi vidach sportu. Na «jadry» ŭkładziena parkietnaje pakryćcio i naniesiena raźmietka dla hulniavych vidaŭ: mini-futboła, handboła, valejboła, baskietboła.
Tut dźvie placoŭki pamieram 20 × 40 m, ich raździalaje śpiecyjalnaja sietka. Pamiaškańnie pryznačana dla zaniatkaŭ amal usimi lohkaatletyčnymi dyscyplinami, za vyklučeńniem kidkovych. Daŭžynia biehavych darožak (ich čatyry) składaje standartnyja 400 m, jość jama dla skačkoŭ i siektar dla skačkoŭ u vyšyniu. Abstalavany fiechtavalnyja darožki: dźvie ź ich znachodziacca na pieršym paviersie, jašče niekalki — na druhim.
Junyja rapirysty ŭžo trenirujucca.
Jašče adno novaŭviadzieńnie — skaładrom. Pierš za ŭsio na im buduć treniravacca dzieci. Novym abstalavańniem, jak čakajecca, skarystajucca vychavancy adnoj ź minskich sportškoł, a krychu paźniej (jość takija płany) u SDIUŠAR «Dynama» adkryjuć adździaleńnie pa skałałažańni i praviaduć nabor u hrupy, bo heta alimpijski vid sportu.
Što da adzinaborstvaŭ, źjaviłasia mahčymaść asobna pracavać z baraćbitami i ŭdarnikami — raniej było tolki adno pamiaškańnie. Na druhim paviersie ŭkładzieny dyvany-maty: tam adpracoŭvajuć pryjomy i abaronu ad ich. Na pieršym paviersie adkryłasia zała boksa: ustalavany stacyjanarny rynh i ŭsio nieabchodnaje abstalavańnie. Tut buduć udaskanalvać navyki i ŭ słužbova-prykładnych vidach, naprykład u rukapašnym bai.
Zała mastackaj himnastyki adkryłasia adnoj ź pieršych: padrychtoŭka junych hracyj adnaviłasia z sakavika. Da hetaha dziaŭčaty treniravalisia ŭ «Čyžoŭka-Arenie». Dla ich uładkavany novyja pamosty i dyvany.
Univiersalnuju zału płanujuć vykarystoŭvać jak dla trenirovak, tak i dla aficyjnych matčaŭ pa mini-futbole, handbole, baskietbole i valejbole. Žadajučych zajmacca tut šmat — kažuć, čas užo raśpisany navat na poźni viečar.
U «Dynama» stvorana biezbarjernaje asiarodździe. Paralimpijcy treniravalisia tut i raniej, a kab zabiaśpiečyć im dostup na druhi pavierch, ustalavali dva lifty. Akramia taho, va ŭsich załach źjavilisia infarmacyjnyja tablički sa šryftam Brajla.
Znakamity načny knižny kirmaš u spartkompleks «Dynama» nie vierniecca.
Nie buduć tut pravodzić i vystavy žyvioł. Abjekt całkam zadziejničajuć dla zaniatkaŭ sportam.
Ciapier čytajuć
26‑hadovaha supracoŭnika elitnaha padraździaleńnia mytni asudzili na 16 hadoŭ pa nabory palitartykułaŭ. Siarod ich i «zdrada dziaržavie»6
Kamientary