Kreml pakazaŭ, jak Pucin vitajecca z «vypadkovym prachožym». Im akazaŭsia «svoj» čałaviek
Žurnalisty vykryli čarhovuju pastanoŭku z udziełam rasijskaha prezidenta. U videaroliku, jaki raspaŭsiudziŭ Kreml, Uładzimir Pucin nibyta vypadkova sustrakaje minaka ŭ chole haścinicy — toj vychodzić ź lifta ŭ choł, kali tam jakraz Pucin z achovaj. Prezident RF ź im zdaroŭkajecca i pytaje pra žyćcio i nadvorje.
Pres-słužba Kramla ŭ paniadziełak apublikavała videa sustrečy Uładzimira Pucina sa svajoj školnaj nastaŭnicaj Vieraj Hurevič u haścinicy na Arbacie. Pucin, jak pakazana na videa, asabista zajechaŭ pa nastaŭnicu ŭ hatel, kab advieźci jaje na viačeru ŭ Kreml.
Padčas hetaj sustrečy prezident RF vitajecca ź nibyta vypadkovym mužčynam. Analiz «Ahienctva» pakazaŭ, što hetuju rolu syhraŭ Alaksandr Bazarny, jaki pracavaŭ u kampanii, što kiruje viłami Pucina i maci jaho spadarožnicy Aliny Kabajevaj.
U videa Pucin na pazadarožniku Aurus sam za rulom zajazdžaje ŭ nienazvanuju haścinicu i prachodzić u choł atela. Tam jaho čakaje Viera Hurevič.
Paśla hetaha jany razam nakiroŭvajucca da mašyny.
Pa darozie Pucin sustrakaje žychara Sočy, ciśnie jamu ruku i pytajecca pra nadvorje i jaho ŭražańni ad Maskvy. Paśla hetaha, jak vynikaje z pres-relizu, prezident z nastaŭnicaj adpraŭlajucca na viačeru ŭ Kreml.
Zhodna z analizam «Ahienctva», Bazarny sapraŭdy žyvie ŭ Sočy.
U 2010—11 hadach pracavaŭ achoŭnikam u krasnadarskim pradpryjemstvie «Hazstroj biaśpieka», «Svod internešnł». Jon taksama pracavaŭ u kampanii «Hros hrup dzi», vierahodna, kiroŭcam.
Kampanija «Hros hrup dzi», jak pisaŭ «Prajekt» u 2022 hodzie, naležyć firmie «Uładańnie-V», źviazanaj z byłym raźviedčykam Siarhiejem Trehubam. Trehub kiruje aktyvami ŭ intaresach kiraŭnika «Hazprama» Alaksieja Milera i vykonvaje dalikatnyja daručeńni kiraŭnictva krainy.
Kampanija «Svod internešnł» paźniej była pierajmienavana ŭ «Hazpram Palanu», jakaja kiruje adnajmiennym kurortam.
«Svod Internešnł» taksama absłuhoŭvała šale «Ačypse» kala kurorta Krasnaja palana. Hetaje šale nazyvali adnoj z rezidencyj prezidenta Rasii Uładzimira Pucina. Kampanija taksama kiravała inšymi elitnymi katedžami ŭ Krasnaj palanie, siarod arandataraŭ jakich byli maci Aliny Kabajevaj i syn kiraŭnika Rashvardyi Viktara Zołatava.
Kamientary