Mižnarodny sajuz sučasnaha piaciborja (UIPM) źniaŭ usie abmiežavańni dla biełaruskich spartsmienaŭ i kamandaŭ. Takoje rašeńnie arhanizacyja pryniała paśla novaj rekamiendacyi Mižnarodnaha alimpijskaha kamiteta.
Z nastupnaha tydnia biełaruskija atlety zmohuć udzielničać u turnirach UIPM pad čyrvona-zialonym ściaham, a taksama ź dziaržaŭnymi hierbam i himnam krainy. Taksama zbornyja Biełarusi atrymajuć prava aficyjna pradstaŭlać svaju dziaržavu na mižnarodnych spabornictvach.
Da hetaha, paśla rašeńnia MAK u 2023 hodzie, biełaruskija spartoŭcy vystupali tolki ŭ niejtralnym statusie — bieź dziaržaŭnaj simvoliki.
Novyja praviły pačnuć dziejničać adrazu i buduć raspaŭsiudžvacca na ŭsie turniry UIPM, za vyklučeńniem bližejšaha etapa Kubka śvietu ŭ bałharskim Pazardžyku. Pieršaje bujnoje spabornictva, dzie biełarusy zmohuć vystupić užo biez abmiežavańniaŭ, — Kubak śvietu ŭ Budapiešcie ŭ červieni 2026 hoda.
Pry hetym dla rasijskich spartoŭcaŭ niejtralny status pakul zastajecca ŭ sile.
Sučasnaje piaciborje stała jašče adnym vidam sportu, dzie mižnarodnyja arhanizacyi pastupova viartajuć biełaruskim atletam poŭny ŭdzieł u mižnarodnych spabornictvach. Raniej padobnyja rašeńni ŭžo prymalisia ŭ vodnych vidach sportu, handbole i inšych dyscyplinach.
Ciapier čytajuć
«Darahija, viesialiciesia, hulajcie i kuraleście. Niachaj na staraść u vas budzie zapas dobrych pieražyvańniaŭ». Apošni hod Śviatłany Kurs — u jaje dopisach88
Kamientary