Były palitviazień i eks-kiraŭnik partyi «Zialonyja» Dźmitryj Kučuk adkryŭ biznes u Litvie

Dźmitryj raskazaŭ «Našaj Nivie», što abraŭ tuju ž śfieru, u jakoj pracavaŭ na radzimie — zbor adchodaŭ.

— U Biełarusi ŭ mianie była adna z samych bujnych kampanij. U tym liku jana zajmałasia zboram bytavoj techniki na pierapracoŭku. Kali ja vymušana apynuŭsia ŭ Litvie, to praź niejki čas vyrašyŭ, što varta stvarać kampaniju, jakaja budzie zajmacca tym samym.

Tydzień tamu Dźmitryj zarehistravaŭ u Litvie firmu. Pieršyja zamovy ŭžo jość.

— Kožny čałaviek pieryjadyčna dumaje, kudy padzieć stary mabilnik, kampjutar, chaładzilnik… Usio heta nielha prosta vykinuć, kab nie pakidać paśla siabie taki ekałahičny śled. Bytavuju techniku varta zdavać na pierapracoŭku, bo ź jaje mohuć zdabyć roznyja mietały, u tym liku kaštoŭnyja.

Pavialičyć

Havoračy prostaj movaj, kožny, chto choča vykinuć stary chaładzilnik, moža pakinuć zajaŭku Dźmitryju, i toj arhanizuje jaho vyvaz. U Vilni — u toj ža dzień, pa Litvie — ciaham tydnia.

— Praanalizavaŭ situacyju ŭ Litvie. Tut, kali da ciabie pryjazdžajuć pa techniku, nie płaciać ničoha. A kali čałaviek sam pryvozić na pryjomny punkt, płaciać nievialikuju kampiensacyju. My za bujnahabarytnuju techniku hatovy zapłacić simvaličnuju sumu — i sami ŭsio vyvieźci. Naš mikraaŭtobus — hety mabilny punkt zboru.

Pakul Dźmitryj abyšoŭsia biez kredytaŭ i inviestycyj — na toje, kab raspačać svaju spravu, vydatkavaŭ hrošy, jaki jak były palitviazień atrymaŭ ad «Bajsoła».

— Kali ja pryjechaŭ u Litvu, u mianie nie było ni kapiejki. Pakolki ŭ Biełarusi ja pryznany terarystam, usie rachunki majoj kampanii byli aryštavanyja. Atrymlivajecca, što moj biznes padtrymali biełarusy, jakija danacili byłym palitźniavolenym. Za tyja hrošy ja zrabiŭ sajt, arandavaŭ mikraaŭtobus, nu i apłaciŭ rekłamu.

Zarehistravać kampaniju ŭ Litvie možna dystancyjna. Dźmitryju dapamahali jurysty, bo jon chvalavaŭsia pra moŭny barjer. Adznačaje, što biełarusam moža być składana adkryć raźlikovy rachunak, bo banki praviarajuć usio z punktu hledžańnia biaśpieki.

— Ale tut jość inšy faktar, jaki vielmi važny dla biznesmenaŭ — heta inviestycyjny klimat. Ja parazmaŭlaŭ ź niekalkimi pradprymalnikami. Jany kažuć, što, kali vy dapuskajecie niejkija pamyłki pa padatkaabkładańni ci jašče čamuści, pieršy hod usio heta mohuć daravać. Sami litoŭskija dziaržaŭnyja orhany vielmi zacikaŭleny ŭ tym, kab dapamahčy biznesu. Heta ŭ Biełarusi ŭ vypadku nievialikaj niejkaj pamyłki tabie adrazu štraf, i choć ty, moža, nie maješ dośviedu, tabie prylacić litaralna ŭ pieršy miesiac. U Litvie ty nie baišsia dapuścić niejkich pamyłak, atmaśfiera na ciabie zusim nie ciśnie. Tamu možna skancentravacca na pracoŭnych spravach, a nie na biaskoncych pravierkach.

Pavialičyć

Dźmitryj nastrojeny aptymistyčna, bo rynak Litvy i Jeŭrasajuza značna bolšy za biełaruski.

— Pryjemna, što jość biełaruski biznes i ŭ Litvie, i ŭ Polščy. Biełarusy atrymlivajuć kałasalny dośvied pracy na jeŭrapiejskim rynku. U budučyni, kali Biełaruś zmoža naładzić adnosiny ź Jeŭrasajuzam, heta budzie vielmi karysna, bo čynoŭniki i dziaržaŭnyja pradpryjemstvy nie buduć da hetaha hatovymi.

• 32
• 0
• 2
• 0
• 1
• 0
• 0
• 2