U Ždanovičach pradajuć katedž, stvorany pa prajekcie Zrobim. Navat niedakončany jon uražvaje
Učastak — 17 sotak, z chvojami. Šyrokija šklanyja terasy niby ŭbudavanyja ŭ bor.
Byłyja dačnyja pasiołki ŭ Ždanovičach, dzie znachodzicca i lecišča-muziej Vasila Bykava, užo nie paznać. Terytoryja ŭsiaho za paru kiłamietraŭ ad MKAD za apošnija hady zabudavałasia darahimi sučasnymi katedžami, jakija ŭražvajuć architekturaj i maštabam.
Lecišča Bykava — na 6‑j Dačnaj vulicy. A niedaloka, na 1‑j Dačnaj,u Ždanovičach vystavili na prodaž adzin z samych niezvyčajnych budynkaŭ u hetaj častcy pryharada. Katedž budujecca pavodle prajekta biuro Zrobim Architects, da jakich u krasaviku prychodzili siłaviki.
Miarkujučy pa fota, asnoŭnyja budaŭničyja raboty ŭžo zavieršanyja. Dom atrymaŭ hatovy fasad, panaramnaje škleńnie, dach i vonkavaje azdableńnie. A voś unutry pracy jašče — pačać i skončyć.
Budynak vyłučajecca strohimi hieamietryčnymi formami, płoskim dacham, panaramnym škleńniem amal na ŭsiu vyšyniu pavierchaŭ. Azdableńnie vykanana kieramičnymi plitami i naturalnym drevam. Fasady spałučajuć śvietłyja i hrafitavyja adcieńni, a ŭsia kampazicyja nibyta ŭbudavanaja ŭ sasnovy les.
Asabliva efiektna zadumany hałoŭny fasad: dvuchpaviarchovy abjom z šyrokimi terasami. Prajekt praduhledžvaje vialikuju adkrytuju zonu adpačynku, a taksama basiejn i saŭnu.
Ahulnaja płošča katedža — 657 kvadratnych mietraŭ. Učastak — 17,46 sotki ŭ pryvatnaj ułasnaści.
Na pieršym paviersie zaprajektavali vielizarnuju haścioŭniu płoščaj bolš za 90 «kvadrataŭ», asobnuju zonu adpačynku amal na 62 kvadratnyja mietry, niekalki kabinietaŭ, trenažornuju zału, kuchniu, haraž na dźvie mašyny i vialikuju terasu.
Na druhim paviersie — try spalni, u tym liku spalnia baćkoŭ amal na 50 kvadratnych mietraŭ z ułasnym sanvuzłom i vychadam na terasu bolš jak 55 «kvadrataŭ». U padvalnaj častcy raźmiaścili techničnyja pamiaškańni dla sistem vodaačystki i absłuhoŭvańnia doma.
Adpaviedna apisańniu sajta Realt.by, dom pabudavany pa manalitna-karkasnaj technałohii, a ścieny zapoŭnieny kieramičnymi porystymi błokami — heta sučasny materyjał z mnostvam drobnych pavietranych poraŭ, jaki lepš utrymlivaje ciapło i daje dobruju hukaizalacyju.
Dla fasadaŭ vykarystali kieramičnyja plity Laminam — adnaho z samych viadomych jeŭrapiejskich brendaŭ u siehmiencie architekturnaj kieramiki, i listoŭnicu, jakaja prapitanaja finskaj alivaj. Płoski dach pakryli sučasnaj izalacyjnaj sistemaj Hyperdesmo, jakaja pavinna nadziejna abaraniać dom ad praciokaŭ i vilhaci. Da doma ŭžo padviedzieny haz, vada i centralnaja kanalizacyja.
Ad katedža lasnoj ściežkaj možna pieššu za 8 chvilin dajści da plaža №5 Minskaha mora. Pobač znachodziacca sanatoryi «Biełarusačka» i «Rakieta», navučalna-spartyŭnaja baza BDU i Fiederacyi prafsajuzaŭ. Na supraćlehłym bierazie Śvisłačy — zabaŭlalny centr «Siabry», miedycynski centr «Niea» i Respublikanski kliničny miedcentr Kiraŭnictva spravaŭ Łukašenki.
Da Kastryčnickaj płoščy ci płoščy Pieramohi ad doma aŭtamabilem možna dajechać za 25 chvilin. Ale pobač jość i prypynak hramadskaha transpartu.
Za niaskončany katedž prosiać 1,7 miljona dalaraŭ.
Na hetaj ža vulicy za miljon dalaraŭ ciapier pradajecca jašče adzin katedž — z učastkam na dźvie sotki mienšym. Sam dom prykładna na 200 kvadratnych mietraŭ kampaktniejšy. Taksama ŭ prodažy jość pusty ŭčastak na 11 sotak — za jaho prosiać kala 395 tysiač dalaraŭ u ekvivalencie.
Ciapier čytajuć
«Adhuknuŭsia na 95% abjaŭ — i ŭsie admovili». Rasijaninu nie chočuć zdavać kvateru ŭ Hrodnie15
Kamientary
Nie viedaju, chto by chacieŭ žyć u hetym.