Vydańnie hruntujecca na rukapisnych krynicach, jakija ciapier zachoŭvajucca ŭ archivach i biblijatekach Biełarusi, Polščy i Litvy. Dakumienty byli składzienyja adrazu paśla skasavańnia ordena jezuitaŭ i dajuć padrabiaznaje ŭjaŭleńnie pra historyju Słucka taho času.
Knihu «Invientary jezuickaha kalehiuma ŭ Słucku i jaho ziamielnych uładańniaŭ na miažy 1773 i 1774 hadoŭ» (Inwentarze kolegium jezuitów w Słucku oraz jego majątków ziemskich z przełomu roku 1773 i 1774) vypuściła Navukovaje vydaviectva Univiersiteta imia Adama Mickieviča ŭ Poznani. Daśledčykam, jaki padrychtavaŭ dakumienty da druku i napisaŭ ustup, staŭ italjanski historyk Andrea Maryjani.
Jezuity źjavilisia ŭ Słucku ŭ kancy XVII stahodździa. Z-za histaryčnaj spadčyny kniazioŭ Alelkavičaŭ i kalvinisckaj haliny rodu Radziviłaŭ u horadzie daminavali pravasłaŭnyja i pratestanty. Kab zamacavacca i pačać relihijnuju i adukacyjnuju dziejnaść, katalickamu ordenu davodziłasia adaptavacca da miascovaha hramadstva. Śviedčańniem hetaha misijanierskaha padychodu źjaŭlajecca navat architektura słuckaha kaścioła jezuitaŭ: vonkava jon bolš nahadvaŭ pravasłaŭnuju carkvu, čym rymska-katalicki chram.
Kniha abjomam amal u 600 staronak składajecca ź dźviuch asnoŭnych častak. U pieršaj źmieščana apisańnie kaściołaŭ Śviatoj Trojcy i Śviatoha Ducha, budynkaŭ kalehiuma, sieminaryi i muzyčnaj bursy. Samymi infarmatyŭnymi raździełami źjaŭlajucca padrabiaznyja katałohi biblijateki, archiva i invientar miascovaj apteki. Druhaja častka pryśviečana apisańniu ziamielnych uładańniaŭ i falvarkaŭ kalehiuma (Jaminsk, Zamošša, Bokšycy, Zamoście, Kijevičy, Usa i inš.).
Układalnik knihi Andrea Maryjani naradziŭsia ŭ Miłanie. U 2009 hodzie jon pryjechaŭ u Polšču pa studenckaj prahramie Erasmus. Atrymaŭšy stupień mahistra ŭ Miłanskim univiersitecie, jon pastupiŭ u aśpiranturu va Univiersitet imia Adama Mickieviča. Jaho navukovyja intaresy skancentravanyja na historyi Tavarystva Isusa ŭ Rečy Paspalitaj. Akramia Słucka, Maryjani pracuje taksama nad krytyčnym vydańniem invientaroŭ jezuickaha kalehiuma ŭ Niaśvižy.
Pa słovach daśledčyka, mnohija jezuickija invientary zachoŭvajucca ŭ biełaruskich i rasijskich archivach, jakija doŭhi čas byli praktyčna niedastupnymi dla zachodnich vučonych. Vyvučeńnie hetych dakumientaŭ dazvalaje historykam vyjści za ramki vyklučna adukacyjnaj ci relihijnaj dziejnaści ordena i daśledavać sacyjalnyja, ekanamičnyja, miedycynskija (historyja aptečnaj spravy) i demahrafičnyja aśpiekty žyćcia tahačasnaha hramadstva.
Kniha vyjšła ŭ farmacie Open Access i dastupnaja dla biaspłatnaha spampoŭvańnia ŭ elektronnym vyhladzie na staroncy vydaviectva.
«Pra jaki sajuz možna havaryć?» Łukašenka ŭ Astanie raskrytykavaŭ Rasiju za naviazvańnie utylzboraŭ15
Kamientary