Izrail zachapiŭ krepaść Bafor na poŭdni Livana

Izrailskija vojski ŭ noč na 31 maja zaniali stratehičnuju vyšyniu z raźmieščanym na joj zamkam Bafor, pabudavanym kryžakami, na poŭdni Livana. Heta samaje hłybokaje ŭvarvańnie ŭ krainu bolš čym za čverć stahodździa, adznačyli ŭ CACHAŁ. Nad siaredniaviečnaj krepaściu ciapier łunaje izrailski ściah, paviedamlaje Euronews.

Zachop zamka, raźmieščanaha pobač z horadam Nabatyja, adbyŭsia paśla niekalkich dzion avijaŭdaraŭ i žorstkich bajoŭ u susiednich vioskach, dzie izrailskija vojski sutyknulisia z bajevikami ruchu «Chiezbała».

Uziaćcie krepaści stała važnym etapam u vajnie pamiž Izrailem i «Chiezbałoj», jakaja pačałasia 2 sakavika, kali hrupoŭka abstralała poŭnač Izraila rakietami praz dva dni paśla taho, jak ZŠA i Izrail nanieśli ŭdary pa jaje hałoŭnym zastupniku, Iranie.

Z taho času Izrail pačaŭ naziemnaje ŭvarvańnie, zaniaŭšy dziasiatki livanskich viosak i haradoŭ pablizu miažy. «Chiezbała» zapuściła tysiačy rakiet i dronaŭ pa izrailskich vajskoŭcach na poŭdni Livana i na poŭnačy Izraila.

Prasoŭvańnie izrailskaha vojska adbyvajecca niahledziačy na farmalnaje spynieńnie ahniu, jakoje dziejničaje z 17 krasavika, i za niekalki dzion da novaha raŭnda pramych pieramoŭ pamiž Livanam i Izrailem, jakija pavinny prajści ŭ ZŠA 2—3 červienia.

Premjer-ministr Izraila Bińjamin Nietańjachu zajaviŭ, što zachop zamka Bafor na poŭdni Livana aznačaje «dramatyčny pierałom» u izrailskaj kampanii suprać «Chiezbały» ŭ Livanie.

«Siońnia my viarnulisia ŭ Bafor inšymi. My viarnulisia adzinymi, rašučymi, macniejšymi, čym kali-niebudź», — skazaŭ Nietańjachu ŭ videazvarocie.

Izrailskija vojski ŭžo brali hety zamak u 1982 hodzie i ŭtrymlivali jaho da svajho adychodu ź Livana ŭ 2000 hodzie.

Izrailskaje vojska paviedamiła ŭ zajavie, što niekalki dzion tamu pačała apieracyju na chrybcie Bafor i ŭ dalinie Sałuki na poŭdzień, z metaj demantavać infrastrukturu «Chiezbały» i likvidavać pramyja pahrozy dla izrailskich hramadzian. U dakumiencie adznačajecca, što vojska hatovaje «pašyryć apieracyju, kali heta spatrebicca».

U apošnija dni Izrail pašyryŭ hieahrafiju svaich dziejańniaŭ u Livanie, uvioŭšy vojski za raku Litani, jakaja raniej faktyčna słužyła hranicaj, i zaklikaŭšy žycharoŭ pakinuć značnuju častku poŭdnia Livana.

Francyja zapytała praviadzieńnie ekstranaha pasiadžeńnia Rady biaśpieki AAN paśla taho, jak izrailskija siły zaniali zamak Bafor, paviedamiŭ u niadzielu ministr zamiežnych spraŭ Francyi.

«Ja zapytaŭ ekstranaje pasiadžeńnie Rady biaśpieki AAN, tamu što, pryznajučy prava Izraila, jak i luboj dziaržavy, na samaabaronu… ništo nie moža apraŭdać praciah izrailskaj vajennaj apieracyi ŭ Livanie i jaho ŭsio bolš hłybokuju akupacyju livanskaj terytoryi», — zajaviŭ Žan-Noel Baro ŭ efiry kanała BFMTV.

• 6
• 2
• 0
• 0
• 0
• 0
• 0
• 0