Padpałkoŭnika z fakulteta vajskovaj raźviedki sudziać za «zdradu dziaržavie» pa spravie, jakaja vyhladaje palityčnaj. Što pra jaho viadoma?

Ivanu Bałašenku 39 hadoŭ, jon rodam sa Słucka. Pa źviestkach Belpol, jon vučyŭsia ŭ Biełaruska-rasijskim univiersitecie. Ale, nakolki viadoma, nie skončyŭ jaho, pajšoŭ vučycca ŭ Vajskovuju akademiju.

Doŭhi čas mužčyna budavaŭ paśpiachovuju vajskovuju karjeru. Pa źviestkach «Kibierpartyzanaŭ», jon słužyŭ u 103‑j asobnaj hvardziejskaj pavietrana-desantnaj bryhadzie Sił śpiecyjalnych apieracyj.

Kali Bałašenka dasłužyŭsia da staršaha aficerskaha składu, to pierajšoŭ na vykładčyckuju pracu ŭ stalicy. Jašče ŭ listapadzie 2021 hoda jon zhadvaŭsia ŭ aficyjnaj spravazdačy Viciebskaha kadeckaha vučylišča jak hanarovy hość — padpałkoŭnik i vykładčyk fakulteta vajennaj raźviedki Vajskovaj akademii.

Ale prykładna na miažy 2021 i 2022 hadoŭ u žyćci aficera adbyŭsia rezki pavarot. Jon pakinuŭ słužbu va Uzbrojenych siłach i kardynalna źmianiŭ śfieru dziejnaści. Pačynajučy sa śniežnia 2021 hoda, były vajskoviec uładkavaŭsia ŭ Minsku i pracavaŭ vyklučna ŭ pryvatnych aŭtaparkach. Na praciahu niekalkich hadoŭ jon uvieś čas mianiaŭ miescy pracy ŭ słužbach taksi, na STA i ŭ łahistyčnych kampanijach.

Dakładnyja abstaviny zatrymańnia Bałašenki, jak i sutnaść pradjaŭlenych jamu abvinavačvańniaŭ, zastajucca nieviadomymi. Na łavie padsudnych jon akazaŭsia razam z Hienrycham Ahiejevym, jakoha nibyta zatrymali pa «spravie Bajpoła» ŭ akupavanym Krymie i katavali, a taksama Juryjem Vasileŭskim. 

Hienrych Ahiejeŭ, jak paviedamlali pravaabaroncy, — były siłavik ź Bieraściejščyny. Juryj Vasileŭski pracavaŭ u BNTU i byŭ uklučany ŭ Rejestr sudovych ekśpiertaŭ (jaho profil — sudovaja budaŭniča-techničnaja ekśpiertyza). 

Pavialičyć

Ahułam ich sudziać pavodle dzieviaci ciažkich artykułaŭ Kryminalnaha kodeksa, u tym liku za «ŭdzieł u terarystyčnaj arhanizacyi», «akt teraryzmu», «zdradu dziaržavie», pisała «Viasna».

Viadoma, što Hienrycha zatrymali nibyta pa «spravie «Bajpoła» bolš za paŭtara hoda tamu ŭ akupavanym Rasijaj Krymie, dzie jaho źbivali i katavali. Paźniej jaho pieravieźli ŭ Biełaruś i źmiaścili ŭ SIZA KDB. Juryja zatrymali hod tamu pry nieviadomych abstavinach. Pra Ivana Bałašenku pravaabaroncam raniej nie było viadoma. Padrabiaznaści hetaj spravy nieviadomyja.

U zaležnaści ad roli kožnaha Hienrychu, Juryju i Ivanu vystaŭlenyja nastupnyja artykuły Kryminalnaha kodeksa:

• č. 4 art. 309 (naŭmysnaje pryviadzieńnie ŭ nieprydatnaść transpartnaha srodku abo šlachoŭ spałučeńnia);
• č. 3 art. 289 (akt teraryzmu);
• č. 2 art. 290-5 (arhanizacyja dziejnaści terarystyčnaj arhanizacyi i ŭdzieł u joj);
• č. 2 art. 290-4 (stvareńnie arhanizacyi dla ažyćciaŭleńnia terarystyčnaj dziejnaści abo ŭdzieł u joj);
• č. 1 i č. 2 art. 356 (zdrada dziaržavie (u red. zakona ad 09.01.2019);
• č. 3 art. 130 (raspalvańnie varožaści);
• č. 1 art. 179 (niezakonny zbor abo raspaŭsiudžvańnie infarmacyi pra pryvatnaje žyćcio — vyklučanaja 26.05.2021);
• č. 2 i č. 4 art. 295 (niezakonnyja dziejańni ŭ adnosinach da ahniastrelnaj zbroi, bojeprypasaŭ i vybuchovych rečyvaŭ);
• č. 1 art. 342 (arhanizacyja abo padrychtoŭka dziejańniaŭ, što hruba parušajuć hramadski paradak abo aktyŭny ŭdzieł u ich).

Što viadoma pra fihurantaŭ spravy?

Hienrych Ahiejeŭ — były siłavik ź Bieraściejščyny. U vieraśni 2026 hoda jamu spoŭniłasia 32 hady. Palitviaźnia zatrymali ŭ lutym 2024 hoda ŭ Krymie. Jak raspaviadaŭ sam Ahiejeŭ svajmu byłomu sukamierniku, jon źjaŭlajecca fihurantam «spravy «Bajpoła» — jon nibyta jeździŭ pa zadańni byłoha aficera MUS, a ciapier pradstaŭnika inicyjatyvy «Bajpoła» Alaksandra Azarava.

Kala siami miesiacaŭ jaho ŭtrymlivali ŭ SIZA FSB razam z ukrainskimi vajennapałonnymi, dzie jaho źbivali dy katavali. Uvieś hety čas pra miescaznachodžańnie mužčyny było nieviadoma. U vieraśni 2024 hoda Ahiejeva ekstradavali ŭ Biełaruś, pry hetym nie addali nijakich dakumientaŭ, tamu čas u SIZA FSB nie budzie zaličany ŭ termin prysudu. Na radzimu biełarusa vieźli sutki ź miaškom na hałavie, raspavioŭ były sukamiernik. 

Juryj Vasileŭski skončyŭ Biełaruski nacyjanalny techničny ŭniviersitet. Pracavaŭ u BNTU spačatku jak asistent kafiedry, a paśla jak vykładčyk i staršy vykładčyk kafiedry elektrazabieśpiačeńnia. Z 2017 hoda Vasileŭski ŭklučany ŭ Rejestr sudovych ekśpiertaŭ. Jaho profil — sudovaja budaŭniča-techničnaja ekśpiertyza. Jaho zatrymali ŭ vieraśni 2025 hoda. Spačatku jaho ŭtrymlivali ŭ SIZA KDB, a z sakavika 2026 hoda pieraviali ŭ SIZA № 1. 

• 0
• 2
• 0
• 2
• 0
• 5
• 25
• 0