«Abvinavačvańni zastajucca hałasłoŭnyja». Mamajeva adkazała Zazulinskaj

Delehatka Kaardynacyjnaj rady Alaksandra Mamajeva adreahavała na abvinavačvańni, jakija raniej u kamientary «Našaj Nivie» ahučyła jaje kaleha pa śpisie «Jeŭrapiejski vybar» Volha Zazulinskaja. Mamajeva adchilaje pretenzii, kaža, što kankretnych dokazaŭ joj tak i nie pradstavili, i źviarnułasia pa niezaležnuju pravierku ŭ Kamisiju pa nacyjanalnaj i rehijanalnaj biaśpiecy i Etyčnuju kamisiju KR.

Nahadajem, na minułym tydni «Jeŭrapiejski vybar» vynies Mamajevaj votum niedavieru. Pavodle Zazulinskaj, asnoŭnaj pryčynaj stali pytańni biaśpieki — nibyta «šmatrazovaje parušeńnie kanfidencyjalnaści», «niesankcyjanavanaje kapijavańnie i pieradača kanfidencyjalnaj infarmacyi trecim asobam», a taksama toje, što kalektyŭnaja praca padavałasia jak asabistaja. Dokazy, pavodle Zazulinskaj, jość, ale publična ahučvać ich u śpisie admovilisia, spasłaŭšysia na biaśpieku ludziej.

Mamajeva śćviardžaje, što joj tak i nie nazvali kankretyki: jakija mienavita paviedamleńni i materyjały, jakich ludziej, kamu i pry jakich abstavinach jana nibyta pieradavała. Takich dokazaŭ, pavodle jaje, nie atrymali ni jana, ni Kamisija pa biaśpiecy, ni Etyčnaja kamisija — a biez hetaha, ličyć jana, abvinavačvańni zastajucca hałasłoŭnymi.

Kamisija pa nacyjanalnaj i rehijanalnaj biaśpiecy KR, pavodle Mamajevaj, patłumačyła, što zachoŭvańnie ci pierasyłka ŭnutranych materyjałaŭ moža ličycca parušeńniem biaśpieki tolki tady, kali robicca dziela pieradačy infarmacyi tym, chto nie maje aficyjnaha dostupu, ci dziela publičnaha raspaŭsiudu na škodu struktury. A fiksacyja asobnych paviedamleńniaŭ ci skrynšotaŭ pryznajecca dapuščalnaj, kali čałaviek robić heta dziela abarony reputacyi, fiksacyi ŭnutranych parušeńniaŭ abo zvarotu ŭ Etyčnuju kamisiju, Kamisiju pa biaśpiecy ci kampietentnyja orhany krainy znachodžańnia.

Pad vyhladam «kanfidencyjalnaści», miarkuje Mamajeva, joj faktyčna sprabujuć zabaranić abaraniacca. Jana źviartaje ŭvahu i na ŭnutranuju supiarečnaść: kali ŭsio pasiadžeńnie było «absalutna kanfidencyjalnym», to i sam śpis nie mieŭ prava pieršym publična paviedamlać pra votum niedavieru i farmuloŭki pra «pieraściarohi ŭ intaresach biaśpieki».

Abvinavačvańni ŭ prysvajeńni kalektyŭnaj pracy Mamajeva admaŭlaje. Pavodle jaje, usie spravazdačy — pa Kantaktnaj hrupie, pracy delehacyi ŭ PARIE, dziejnaści Mižnarodnaj kamisii — jana zaŭsiody nakiroŭvała kaleham dla ŭzhadnieńnia i dapaŭnieńniaŭ i nivodnaj aficyjnaj pretenzii nakont aŭtarstva ad ich nie atrymlivała. Tut, kaža jana, «niama ni kankretnaj paciarpiełaj asoby, ni kankretnaha dakumienta, ni kankretnaj situacyi».

Alaksandra Mamajeva była delehatkaj KR treciaha sklikańnia i kiravała Mižnarodnaj kamisijaj KR, udzielničała ŭ stvareńni Narodnych ambasad Biełarusi; z 2015 hoda žyvie ŭ Słavienii. U listapadzie 2025‑ha jana zajaŭlała pra sproby viarboŭki z boku KDB.

• 3
• 0
• 1
• 1
• 0
• 1
• 1
• 0