Jeŭraparłamient uchvaliŭ rezalucyju ab paharšeńni stanovišča palityčnych viaźniaŭ u Biełarusi

Eŭrapiejski parlament uchvaliŭ terminovuju rezalucyju ab paharšeńni stanovišča palityčnych źniavolenych u Biełarusi, u pryvatnaści, nakont spravy Alaksandry Pulinovič, asudžanaj na 10 hadoŭ i 3 miesiacy pazbaŭleńnia voli ŭ kalonii ŭzmocnienaha režymu.

Na momant zatrymańnia ŭ 2024 hodzie Alaksandry Pulinovič było 17 hadoŭ. U 2025 hodzie jaje asudzili pavodle artykułu 341 (apahańvańnie zbudavańniaŭ i psavańnie majomaści), artykułu 295 (niezakonnyja dziejańni datyčna ahniastrelnaj zbroi, bojeprypasaŭ i vybuchovych rečyvaŭ), č. 1artykułu 14 i č. 3 artykułu 289 Kryminalnaha kodeksu Biełarusi (zamach na złačynstva, nie daviedzienaje da kanca, akt teraryzmu). Jaje zatrymali ŭ tak zvanaj spravie «Čornyja sałaŭi». Svoj termin Alaksandra Pulinovič adbyvaje ŭ PK № 4 u Homli.

«(Eŭraparlament) patrabuje nieadkładnaha i biezumoŭnaha vyzvaleńnia Alaksandry Pulinovič i ŭsich palityčnych źniavolenych, u tym liku ich poŭnaj reabilitacyi i adnaŭleńnia ŭ pravach», — adznačajecca ŭ rezalucyi.

Adnačasova deputaty vykazali niaźmiennuju salidarnaść ź biełaruskimi palitviaźniami i ichnymi siemjami i zaklikali ŭłady Biełarusi «spynić usie formy žorstkaha abychodžańnia z palityčnymi źniavolenymi, u tym liku ŭtrymańnie pad vartaj biez prava na pierapisku, admovu ŭ medyčnaj dapamozie i dostupie da advakataŭ i siamji, prymusovuju pracu, a taksama raśśledavać śmierci pad vartaj i abvinavačvańni ŭ katavańniach».

U rezalucyi zajavili ab niedapuščalnaści palityčna matyvavanaha pieraśledu biełarusaŭ, asabliva pazbaŭleńnia voli niepaŭnaletnich, jak u spravie Alaksandry Pulinovič.

«(Eŭraparlament) asudžaje złoŭžyvańnie zakanadaŭstvam ab baraćbie z teraryzmam i ekstremizmam dla kryminalizacyi antyvajennych vykazvańniaŭ, moładzievaj niazhody, salidarnaści z Ukrainaj i padaŭleńnia mirnych pratestaŭ, u tym liku surjoznych abvinavačvańniaŭ suprać maładych ludziej z metaj ich zapałochvańnia; zaklikaje da skasavańnia śpisaŭ terarystaŭ i ekstremistaŭ i vykanańnia ŭładami Biełarusi Kanvencyi AAN ab pravach dziciaci», — havorycca ŭ dakumencie.

Deputaty Eŭraparlamentu pryznali namahańni ZŠA pa vyzvaleńni palityčnych źniavolenych, adnak adznačyli, što hetyja vyzvaleńni byli matyvavanyja zakłapočanaściu režymu ekanamičnym vyžyvańniem i nie supravadžajucca palityčnymi pieraŭtvareńniami abo reformami, jakija mahli b apraŭdać narmalizacyju dačynieńniaŭ.

«(Eŭraparlament) nastojvaje na tym, što vyzvaleńnie ŭsich palityčnych źniavolenych i spynieńnie represij zastajucca papiarednimi ŭmovami dla palityčnaha dyjalohu i ekanamičnaha supracoŭnictva; patrabuje spynić hvałtoŭnuju departacyju vyzvalenych palityčnych źniavolenych i represii ŭ dačynieńni da ich svajakoŭ», — adznačajecca ŭ rezalucyi.

Adnačasova deputaty zaklikali Eŭraźviaz, jaho krainy i mižnarodnych partneraŭ aktyvizavać namahańni, jakija pryviaduć da vyzvaleńnia ŭsich palityčnych źniavolenych, takija, jak vyklik pasłoŭ režymu dla paćvierdžańnia stanu i miescaznachodžańnia źniavolenych, manitorynh spraŭ palityčnych źniavolenych, vydača humanitarnych viz, zabieśpiačeńnie reabilitacyi, praktyčnaj i finansavaj padtrymki.

Eŭraparlament taksama zaklikaŭ Eŭrapiejskuju radu «pašyryć, uzmacnić i stroha vykonvać metanakiravanyja sankcyi suprać usich asob i arhanizacyj, adkaznych za palityčna matyvavanyja pieraśledy, represii i katavańni», a eŭrapiejskija krainy padtrymlivać dakumentavańnie złačynstvaŭ, učynienych režymam Łukašenki, u tym liku na ŭzroŭni AAN, i pahłyblacca ŭ pryciahnieńnie da adkaznaści praź mižnarodnyja mechanizmy, u tym liku zvarot Litvy ŭ MKS, a taksama raśśledavańni i nacyjanalnyja pracedury, zasnavanyja na eksterytaryjalnaj i ŭniversalnaj jurysdykcyi.

Hetuju rezalucyju nakirujuć va ŭsie orhany Eŭrapiejskaha źviazu, Viarchoŭnamu kamisaru AAN u pravach čałavieka i «de-fakta ŭładam Biełarusi».

Čamu heta važna

U Biełarusi žorstkija represii pačalisia paśla prezydenckich vybaraŭ 2020 hodu, kali pa ŭsioj krainie adbylisia masavyja akcyi pratestu suprać falsyfikacyi ich vynikaŭ. Pad palityčna matyvavany pieraśled trapili ŭdzielniki pratestaŭ, cełyja prafesijnyja hrupy i hramadzkija arhanizacyi.

Zhodna z daśledavańniem inicyjatyvy BelPol, ahulnaja kolkaść represavanych u Biełarusi z traŭnia 2020-ha, kali pačałasia prezydenckaja vybarčaja kampanija, pa krasavik 2026‑ha składaje nia mienš za 500 tysiač.

Pavodle źviestak pravaabaroncaŭ, za kratami ŭ Biełarusi znachodziacca sama mieniej 869 palityčnych źniavolenych. Kožny miesiac taki status atrymlivajuć pa 30—50 novych viaźniaŭ.

• 2
• 0
• 1
• 1
• 0
• 0
• 0
• 0