«Mycca niemahčyma, pić strašna». U Pinsku ludzi miesiacami skardziacca na vadu
Kamunalniki prapanujuć paciarpieć jašče paŭtara hoda.
Skarhi na vadu ŭ Pinsku ciahnucca ŭžo niekalki miesiacaŭ. Jašče ŭ lutym pa sacsietkach razyšłosia videa školnika, jaki paraŭnaŭ vadu z krana ź piersikavym sokam. Paśla hetaha skarhi na jakaść vady nie spynialisia. Žychary horada pišuć, što z kranaŭ idzie vada z pacham žaleza, ryžym adcieńniem i asadkam. A ŭ adkaz ad kamunalnikaŭ hučyć znajomaje: treba paciarpieć.
Aficyjnaje tłumačeńnie takoje: u horadzie idzie maštabnaja rekanstrukcyja vodazaboru «Pina-2» i stancyi abiezžalezvańnia. Raboty pačalisia 7 krasavika 2026 hoda i pavinny praciahnucca da 7 kastryčnika 2027-ha. Na hety čas častku filtraŭ spyniajuć, tamu ŭ asobnyja rajony mohuć padavać vadu z «dapuščalnym adchileńniem» ad hihijeničnych narmatyvaŭ. Takoje rašeńnie pryniaŭ Pinski harvykankam.
Miascovyja ŭłady i «Pinskvodakanał» tłumačać: prablema ŭ tym liku źviazanaja z pavyšanym utrymańniem žaleza, charakternym dla Paleśsia. Kamunalniki kažuć, što sietki pramyvajuć čaściej, čym patrabujuć narmatyvy, a paśla madernizacyi jakaść vady pavinna palepšycca. Vodazabor «Pina-2» pracuje jašče z 1980 hoda i, jak pryznali ŭ siužecie TRK «Pinsk», daŭno patrabuje abnaŭleńnia: tam mianiajuć filtravalnuju zahruzku, trubapravody, armaturu, uzmacniajuć pierakryćci, pravodziać aŭtamatyzacyju i elektryfikacyju.
Što ŭsio heta aznačaje na praktycy, lepš za aficyjnyja relizy raskazvajuć sami žychary horada. Voś tolki niekalki charakternych vodhukaŭ z sacsietak.
«Pamyŭ hałavu… Lepš by nie myŭ. I ludzi płaciać za takuju vadu… I vykankam navat aficyjnuju papierku vypuściŭ — maŭlaŭ dazvalajecca narodu pradavać niahodnuju vadu… Usio jak maje być», — napisaŭ u treds mužčyna, jaki pryjechaŭ u Pinsk na vychodnyja ź inšaha horada. Pavodle jaho, u Pinsku ŭvieś horad biehaje z butelkami vady, bo «pić i navat mycca niemahčyma».
U kamientarach ludzi paćviardžajuć: prablema nie ŭ adnym domie i nie ŭ adnym rajonie.
«Pić niemahčyma, duš prymać niemahčyma, myć biełyja rečy taksama niemahčyma. Zatoje ŭ miascovaj ułady ŭsio vydatna. Hetyja pastajannyja adklučeńni haračaj vady taksama ŭžo ŭsich daniali. Kali ŭžo naviaduć paradak», — piša karystalnica.
Haračaja vada — sapraŭdy asobny bol. Ludzi skardziacca, što jaje adklučajuć pa niekalki razoŭ za karotki čas, a kali jana jość, to karystacca joj ciažka.
«Pa ŭsim horadzie druhi raz za dva miesiacy na dva tydni haračuju vadu adklučajuć», — piša adna z žycharak.
«Pierapady vady — dzikija, mycca niemahčyma: prosta kipień ljecca», — dadaje inšaja.
«Žyviom paŭhoda i zaŭsiody pieraboi, dva źmiašalniki źmianiali i ŭsio taksama, voś treci zamovili, ale apošnija dva tydni — heta žach, kipień ljecca ŭvieś čas, chałodnuju treba spuskać pa 5‑10 chvilin, u dušy moža rezka kipień linuć», — raskazvajuć žychary Pinska.
Jość i skarhi na pach.
«Mianie źbiantežyŭ pach vady, nikoli takoha nie bačyła. Pach iržavaha mietału i davoli mocny, navat nie treba ŭniuchvacca, tolki adkryŭ kran i śmiardzić», — piša žančyna, jakaja pryjechała ŭ Pinsk z Bresta. Pavodle jaje, raniej u Pinsku vada była dobraj, «navat z-pad krana možna było pić», a ciapier — «prosta žach».
Ludzi aburajucca i tym, što płaciać za takuju vadu jak za čystuju. «Źviartalisia da staršyni ŽSPK: čamu my płacim za takuju vadu pa taryfie čystaj? Nam adrazu papierkami pierad nosam zamachali: maŭlaŭ, vada pravieranaja, parušeńniaŭ niama, karystajciesia», — piša adna z žycharak.
Ludzi fiksujuć ryžuju vadu, nalot na santechnicy, zabityja filtry, sapsavanyja rečy paśla myćcia.
«Pamyŭ biełyja krasoŭki ŭ prałcy — atrymalisia bieła-rudyja».
«Vada z-pad krana prosta ahidnaja», — pišuć u sacsietkach.
U adnym z dopisaŭ žycharka pakazała fota z rakaviny: paśla niadaŭniaj zamieny kanalizacyi, pavodle jaje słoŭ, z trub palezła «niejkaja hadaść».
«Što jašče nam padkinie vodakanał? Čaj z krana — jość, pierapady vady — dzikija, ciapier i hadaść z trub palezła. Jaki nastupny ŭzrovień?» — iranizuje jana.
«Vodakanał sioleta viadzie spabornictvy z samim saboj pa navalenym kryndžu», — napisali ŭ kamientarach da hetaha dopisu.
Kamientary