Pamior trenier francuzskaha «Bresta» Eryk Rua. Jon 3,5 hoda tajemna zmahaŭsia z rakam
Šakuje nie tolki sam fakt śmierci, ale i nievierahodnaja stojkaść hetaha čałavieka. Akazvajecca, Rua try z pałovaj hady zmahaŭsia z rakam padstraŭnikavaj załozy. Da paviedamleńnia pra jaho śmierć pra heta nie było nijakaj publičnaj infarmacyi.
Voś što napisała siamja Rua: «Uvieś hety čas jon praciahvaŭ žyć ź siłaj duchu, jakaja i ciapier nas uražvaje, natchniony luboŭju da siamji, da futboła, da svajoj pracy, kiravany zapałam, jaki nikoli jaho nie pakidaŭ. Dasiahnieńni apošnich hadoŭ nazaŭsiody zastanucca dla nas čymści vyklučnym. Prajści praz takoje vyprabavańnie i adnačasova kiravać kłubam šmat havoryć pra toje, jakim čałaviekam jon byŭ.
Dobrym, piaščotnym, sumlennym i prystojnym. Jon umieŭ padbadziorvać, nastaŭlać, natchniać inšych na samaŭdaskanaleńnie. U im spałučalisia patrabavalnaść, spraviadlivaść i čałaviečnaść.
Jon biaźmiežna lubiŭ futboł. Jaho pryhoda ŭ «Breście» stała adnym z najpryhažejšych pieryjadaŭ usiaho žyćcia. Hetaja praca davała jamu enierhiju, radaść, nahodu ruchacca napierad navat u samyja ciažkija momanty. Sa svaimi hulcami jon stvaryŭ redkuju suviaź. Jon vielmi lubiŭ ich i hanaryŭsia imi, vielmi hanaryŭsia tym, što byŭ ich trenieram.
Zaŭziatary «Bresta», my chočam skazać dziakuj. Vaša padtrymka hłyboka kranuła jaho. Vaša luboŭ značyła dla jaho značna bolš, čym vy možacie sabie ŭjavić», piša Sports.ru.
U zajavie zhadvajucca vialikija dasiahnieńni Rua ŭ «Breście». I sapraŭdy, jon zrabiŭ nievierahodnaje: z Erykam «Brest» upieršyniu ŭ svajoj historyi prabiŭsia ŭ jeŭrakubki. U Lihu čempijonaŭ!
Što ŭ biełaruskim siehmiencie internetu naradziła, u svaju čarhu, žarty, što heta biełaruski «Brest» vyjšaŭ u asnoŭny etap ŁČ.
«Brest» zaniaŭ treciaje miesca ŭ čempijanacie Francyi siezona 2023/24, niahledziačy na adzin z samych ścipłych biudžetaŭ. Bolš za toje, kłub paśpiachova vystupiŭ u Lizie čempijonaŭ: zaniaŭ 18‑ie miesca na ahulnym etapie i vyjšaŭ u płej-of, dzie ŭ stykavym raŭndzie sastupiŭ «PSŽ».
U 2024 hodzie Rua atrymaŭ uznaharodu lepšamu trenieru Lihi 1.
«Brestu» nie ŭdałosia zamacavacca pobač ź jeŭrakubkavymi pazicyjami, ale heta ekanamična nierealna: zanadta ścipłaja kamanda biez surjoznych inviestycyj. Hałoŭnaje, što «Brest» zastaŭsia mocnym kłubam: pośpiechi ŭ Lizie čempijonaŭ jon sumiaściŭ ź dziaviatym miescam u Lizie 1, a ŭ siezonie 2025/26 finišavaŭ 12-m, nie dumajučy pra baraćbu za vyžyvańnie.
Kali padčas siezona 2022/23 spartyŭny dyrektar Hrehary Łarency davieryŭsia Rua, mnohija nazyvali «Brest» vidavočnym pretendentam na vylet. Ale Rua vyratavaŭ kłub ad panižeńnia ŭ kłasie, a ŭžo ŭ nastupnym siezonie vyvioŭ jaho ŭ Lihu čempijonaŭ.
Rua aficyjna staŭ trenieram «Bresta» 3 studzienia 2023 hoda. Atrymajecca, što pra strašny dyjahnaz jon daviedaŭsia abo niepasredna pierad pryznačeńniem, abo adrazu paśla jaho.
Rua praciahvaŭ treniravać da apošniaha dnia žyćcia i navat nie hublaŭ svajho pačućcia humaru na pres-kanfierencyjach. Naprykład, pierad matčam z «PSŽ» jon zaŭvažyŭ: «Čarhovy matč suprać «PSŽ» usprymajecca horš, čym pachod da stamatołaha».
Raniej, kali Eryku nahadvali, što ad jaho čakali vyletu, jon z vydatnaj ironijaj adkazvaŭ: «Budź ja spartyŭnym dyrektaram, ja b nie pryznačyŭ sam siabie trenieram».
«Brest» Rua zapomnicca jak maksimalna bajavaja kamanda. U praryŭnym siezonie jana litaralna źmiatała supiernikaŭ. Kamanda padniała płanku adzinaborstvaŭ na ŭzrovień, jaki byŭ vyklučnym navat dla francuzskaha čempijanatu. Jana lidziravała pa kolkaści vyjhranych adzinaborstvaŭ, naviesaŭ i vysokich viartańniaŭ miača. Niaŭstuplivy, žorstki, mocny, dyscyplinavany — tak možna było acharaktaryzavać amal kožnaha futbalista «Bresta».
Zaŭziatary «Bresta» byli ŭ zachapleńni ad Rua: za jaho humar, za blizkaść da fanataŭ, za toje, što jon praniksia ducham horada, pryviŭ kamandzie adpaviednyja pracoŭnyja kaštoŭnaści i zaŭsiody nasiŭ pirackuju kiepku — adzin z hałoŭnych fanackich atrybutaŭ.
Jaho prazvali Karalom Erykam. Pośpiech «Bresta» staŭ adnoj z najpryhažejšych historyj u jeŭrapiejskim futbole apošnich hadoŭ.
Ciapier, kali viadoma, što trenier zmahaŭsia ź ciažkaj chvarobaj i chavaŭ heta ad hramadskaści, historyja «Bresta» vyhladaje jašče bolš nievierahodnaj i dramatyčna.
Kamientary