Dźmitryj Aŭčynka ź Minska — budaŭnik, jaki staviŭ fundamienty dla damoŭ, vychoŭvaŭ dziaciej i dzialiŭsia paradami pa ramoncie aŭto. Niadaŭna mužčynu asudzili pa palityčnym artykule.
Dźmitryju Aŭčynku 39 hadoŭ. Mužčyna žyvie z žonkaj u Minsku, razam hadujuć dziaciej.
Dźmitryj šmat hadoŭ pracuje ŭ budaŭničaj śfiery: zajmajecca buravymi i manalitnymi pracami ŭ Minsku i vakolicach. U tyktoku i instahramie pad nazvaj «monolit.minsk» jon dzielicca videa z pracoŭnych placovak i zaprašaje klijentaŭ słohanam «Vaša mara — naša vykanańnie».
Dźmitryj cikavicca aŭtamabilami. Jon udzielnik supołak amataraŭ Citroen C4 Picasso. Sam Dźmitryj doŭhi čas jeździŭ na takim aŭto i achvotna dzielicca paradami na forumach.
Apošni raz mužčyna vykładaŭ niešta ŭ sacsietkach u śniežni 2025 hoda. Paśla hetaha jaho zatrymali i źmiaścili ŭ SIZA. U hetym hodzie Minski haradski sud vynies jamu prysud pavodle častak 1 i 2 artykuła 361‑4 KK — «sadziejničańnie ekstremisckaj dziejnaści». Imavierna, pieraśled źviazany sa spravaj Hajuna.
Dźmitryju prysudzili chatniuju chimiju.
Padrabiaznaści spravy nieviadomyja.
«Ekstremizmam» ułady Biełarusi ličać padpiski na niezaležnyja kanały, ŚMI, najaŭnaść spasyłak na ich u sacyjalnych sietkach ci najaŭnaść u sacsietkach abo na rečach biełaruskaj nacyjanalnaj, dałukašenkaŭskaj simvoliki. Da «ekstremizmu» zaličvajuć taksama praktyčna ŭsialakuju krytyku ŭładaŭ, aficyjnych histaryčnych naratyvaŭ ci prajavy salidarnaści z Ukrainaj.
Šmatlikija kryminalnyja spravy apošniaha času pa artykule ab «sadziejničańni ekstremizmu» byli źviazanyja sa spravaj Hajuna.
«Biełaruski Hajun» — manitorynhavy OSINT-prajekt, jaki byŭ stvorany ŭ 2022 hodzie, kali Rasija praź Biełaruś napała na Ukrainu. Prajekt adsočvaŭ vajennuju aktyŭnaść rasijskich i biełaruskich vojskaŭ, abapirajučysia na infarmacyju ad biełarusaŭ. Kaardynavała jaho dziejnaść hrupa aktyvistaŭ na čale z Antonam Matolkam.
«Sprava Hajuna» pačałasia paśla taho, jak siłaviki zatrymali aktyvistku, jakaja niekalki hadoŭ žyła ŭ Biełarusi ŭ padpolli. U jaje mabilniku znajšli spasyłku na dałučeńnie ŭ bot Hajuna, jakuju joj dasyłali ŭ samym pačatku isnavańnia prajekta. Fatalnaja pamyłka była ŭ tym, što spasyłka była biesterminovaja. A tamu siłaviki zmahli padklučycca da bota i vypampavać adtul usiu infarmacyju. Jany atrymali paviedamleńni akaŭntaŭ, jakija pisali ŭ bot, a taksama ichnija ID i imiony karystalnikaŭ.
Zasnavalnik «Hajuna» Anton Matolka adrazu paśla ŭzłomu patłumačyŭ, jak adbyłasia ŭciečka infarmacyi, i abviaściŭ pra zakryćcio prajekta.
Pavodle padlikaŭ abjadnańnia siłavikoŭ «Biełpoł» i pravaabaroncaŭ, viadomyja imiony 9594 ludziej, jakija padpali pad palityčna matyvavanyja kryminalnyja spravy. Usiaho tyja ci inšyja palityčnyja represii (kryminałki, administratyŭki, zvalnieńni, pieratrusy) začapili kala 500 tysiač biełarusaŭ. Niekalki socień tysiač ludziej vymušanyja byli pakinuć krainu.
«Naša Niva» — bastyjon biełaruščyny
PADTRYMAĆ
Kamientary