Hałkipier Parahvaja pradaŭ svaju formu z-za chvaroby syna, a ciapier vybiŭ Hiermaniju i svajho kumira z čempijanatu śvietu
Hałoŭny hieroj sieryi pienalci ŭ matčy Hiermanii i Parahvaja — bramnik Arłanda Chil. Jon adbiŭ dva ź pieršych čatyroch niamieckich pienalci i ŭ vyniku dapamoh svajoj kamandzie vyjhrać sieryju ŭ 1/16 finału čempijanatu śvietu-2026.
A miž tym heta čałaviek, jaki ŭvohule nie źbiraŭsia stać hałkipieram. Pieršaj važnaj kropkaj u karjery Chila staŭ rajonny kłub «13 červienia» ŭ San-Łarensa, piša sports.ru.
«Ja zaŭsiody maryŭ hulać u futboł, — raspaviadaŭ Arłanda. — Spačatku byŭ forvardam, ale potym mnie pastavili vybar: abo stanovišsia ŭ varoty, abo adpraŭlaješsia ŭ zapas».
13‑hadovy Chil vybraŭ bramu. Jon vielmi šmat prapuskaŭ. Tamu šmat pracavaŭ nad saboj: pastajanna hladzieŭ videanarezki z Valdesam i Kasiljasam, a jašče prahulvaŭ škołu, kab patreniravacca.
«Stolki ŭspaminaŭ… — kazaŭ jon. — Naprykład, jak mama svaryłasia na mianie za prahuły. Jak by ja chacieŭ, kab jana ŭbačyła, praz što ja prajšoŭ i dzie apynuŭsia. Ale žyćcio takoje: ciapier jana naziraje za mnoj ź niabiosaŭ i doryć mnie ŭdaču. Ja zaŭsiody budu ŭdziačny joj za ŭsio, što jana zrabiła dla mianie».
Pastupova Chil nabraŭ formu. A potym atrymaŭ vialiki šaniec — vyklik u zbornuju Parahvaja U17. Heta byŭ unikalny vypadak: pradstaŭniki zbornaj pryjechali pahladzieć hulca zvyčajnaj rajonnaj kamandy.
Potym jaho zaŭvažyŭ parahvajski «San-Łarensa» i padpisaŭ kantrakt. Z 16 hadoŭ jon hulaŭ za reziervovuju kamandu. U 18 jaho vyklikali ŭ zbornuju Parahvaja U20, razam ź jakoj jon vystupiŭ na moładzievym Kubku Amieryki-2019. U 2020 hodzie debiutavaŭ za asnoŭnuju kamandu «San-Łarensa», jakaja nieŭzabavie vylecieła z vyšejšaha dyvizijona.
Jamu dali žartoŭnuju mianušku — «Kurtua» ŭ honar hałkipiera madrydskaha «Reała».
A kaho sam Chil nazyvaje svaimi kumirami?
«Ź dziacinstva mnie vielmi padabaŭsia Manuel Nojer [hałkipier Hiermanii, jaki hulaŭ u siońniašnim matčy suprać Parahvaja — NN]. Potym zachapili Mark-Andre ter Štehien [taksama hałkipier zbornaj Hiermanii — NN] i Cibo Kurtua. Ich styl hulni vielmi padobny da majho. A jašče — Chase Łuis Čyłaviert lehiendarny hałkipier Parahvaja ŭ 1990‑ia — HH]. Za jaho ŭdary i lidarskija jakaści».
Syn Chila naradziŭsia raniej času. Dziela lačeńnia daviałosia pradavać svaje rečy
Pastupova Chil staŭ asnoŭnym bramnikam «San-Łarensa», choć miesca ŭ składzie davodziłasia adstojvać.
Varta razumieć realii parahvajskaha futboła: u kłubach siaredniaha ŭzroŭniu, jak «San-Łarensa», zarobki nievialikija i časta vypłačvajucca z zatrymkami.
U hety ž čas u siamji Chila ŭźnikli surjoznyja prablemy.
Jaho syn Łaŭtara Daniel naradziŭsia niedanošanym, tamu ŭ pieršyja dni žyćcia jamu była nieabchodnaja darahaja miedycynskaja dapamoha.
«Kali Łaŭtara naradziŭsia, u nas uvohule ničoha nie było», — uspaminała žonka futbalista Mielisa Avałas.
U 2022 hodzie Chil raspradaŭ amal usio, što mieŭ.
«Jon pradaŭ bucy, krasoŭki — litaralna ŭsio», — raskazvała Mielisa.
Siarod pradadzienych rečaŭ byli kłubnaja ekipiroŭka i futbołka zbornaj Parahvaja U20, u jakoj jon vystupaŭ na Kubku Amieryki-2019. Dla jaho heta była asablivaja relikvija — simvał ździejśnienaj dziciačaj mary.
Chil nie lubić uspaminać toj pieryjad.
«Ja ŭdziačny Bohu za ŭsio, što Jon nam daŭ, i za ŭsio, praz što my prajšli razam ź siamjoj», — skazaŭ jon u niadaŭnim intervju.
Debiutavaŭ za nacyjanalnuju zbornuju ŭžo paśla vychadu na čempijanat śvietu
Na pačatku 2024 hoda, paśla źmieny kiraŭnictva ŭ arhiencinskim «San-Łarensa», karjera Chila atrymała novy impuls.
Prezident parahvajskaha kłuba Cita Pieralta źviazaŭsia z novym prezidentam arhiencinskaha «San-Łarensa» Marsieła Mareci i raskazaŭ jamu pra talenavitaha bramnika.
«U parahvajskim «San-Łarensa» jamu nie davali dastatkova davieru. Amal kožny hod kuplali novaha bramnika. Marya mianie zrazumieŭ i zrabiŭ usio dla jaho pierachodu. Heta byŭ vyrašalny momant. Inakš jon i siońnia siadzieŭ by ŭ Parahvai biez šancaŭ», — kazaŭ Pieralta.
Spačatku Chil dałučyŭsia da kłuba na pravach arendy, hulaŭ za rezierv, a paśla byŭ vykupleny i pastupova staŭ asnoŭnym bramnikam.
Na pačatku 2025 hoda jon vydatna prajaviŭ siabie ŭ «San-Łarensa» i pryciahnuŭ uvahu treniera zbornaj Parahvaja Hustava Alfara.
«Jon jašče małady, ale ŭžo demanstruje majsterstva, nadziejnaść i stałaść. U «San-Łarensa» vielmi składana hulać, ale jon vydatna z hetym spraŭlajecca. Šeść «suchich» matčaŭ havorać sami za siabie», — adznačyŭ Alfara.
Za nacyjanalnuju zbornuju Chil debiutavaŭ tolki ŭ vieraśni 2025 hoda — va ŭzroście 25 hadoŭ.
Adrazu paśpiachova: Parahvaj pieramoh Pieru 1:0, a sam Chil adyhraŭ matč biez prapuščanych hałoŭ.
Cikava, što svoj debiut jon pravioŭ užo paśla taho, jak Parahvaj aformiŭ vychad na čempijanat śvietu.
Da hetaha ŭ hałoŭnaha treniera nie było stałaha pieršaha numara, a Chila vyklikali prosta jak alternatyvu. Ale jaho ŭpeŭnienaja hulnia i praca na treniroŭkach chutka zrabili jaho asnoŭnym bramnikam.
Matč suprać Hiermanii staŭ dla jaho ŭsiaho dziasiatym u składzie nacyjanalnaj zbornaj.
Pienalci — hałoŭnaja zbroja Chila
U 2025 hodzie Pieraltu spytali pra hałoŭnyja jakaści bramnika.
«Jon vydatna hulaje nahami i cudoŭna adbivaje pienalci. Heta sapraŭdny śpiecyjalist. Vielmi dobra dziejničaje pry ŭdarach zblizku i ŭ ruchu, a apošnim časam značna dadaŭ u hulni na vychadach i ŭ pavietry».
Miesiac tamu Chil užo prademanstravaŭ hetyja zdolnaści ŭ matčy pamiž «San-Łarensa» i «Ryvier Płejtam». Tady jon taksama adbiŭ dva pienalci, ale partniory nie realizavali čaćviorty i piaty ŭdary, i kamanda prajhrała.
Paśla taho matča žurnalisty navat spytali, ci nie chacieŭ jon sam prabić pienalci.
«Dumaŭ pra heta, ale trenier užo pryznačyŭ vykanaŭcaŭ, i ja vyrašyŭ pavažać jaho rašeńnie. Na žal, my prajhrali», — adkazaŭ jon.
Luboŭ da vykanańnia pienalci zastałasia jašče z tych časoŭ, kali jon hulaŭ u napadzie. Navat ciapier na treniroŭkach Chil časam prosić dazvołu prabić sam.
Na hety raz historyja skłałasia inakš.
Niekalki tydniaŭ tamu jaho krytykavaŭ lehiendarny parahvajski bramnik Chase Łuis Čyłaviert.
«Jon maŭčyć. Bramnik pavinien razmaŭlać. Kali supiernik uvachodzić u apošniuju treć pola, jon abaviazany kiravać abaronaj i kryčać partnioram, kab tyja padnialisia vyšej», — kazaŭ Čyłaviert.
«Viercie ŭ hetuju kamandu»
Napiaredadni čempijanatu śvietu Chila paprasili źviarnucca da zaŭziataraŭ Parahvaja.
Jon skazaŭ: «Viercie ŭ hetuju kamandu, jakaja paśla stolkich hadoŭ narešcie viarnułasia na čempijanat śvietu. Hety skład zdolny na vialikija spravy. Padtrymka kožnaha z vas budzie nieacennaj. Paviercie, my addamo ŭsie siły. Dumaju, Parahvaj vystupić vielmi dobra».
Užo ciapier možna skazać: hetyja słovy akazalisia praročymi.
Kamientary