U Mieksicy źjaviŭsia svoj Betmien, jaki paluje na vuličnych złodziejaŭ i pryviazvaje ich da lichtarnych słupoŭ FOTY
Palicyja mieksikanskaha štata Chaliska rasśleduje sieryju vypadkaŭ samasudu: nieviadomy čałaviek pryviazvaje da lichtarnych słupoŭ mierkavanych vykradalnikaŭ matacykłaŭ i rovaraŭ, pakidajučy pobač šyldy z abvinavačańniami. Za heta miascovyja žurnalisty dali jamu mianušku «Betmien».
Chvala niezvyčajnych incydentaŭ pačałasia ŭ horadzie Łahas-de-Marena ŭ siaredzinie červienia. Na siońnia, jak paviedamlaje The Telegraph, palicyja zafiksavała jak minimum piać vypadkaŭ, kali maładych ludziej znachodzili pryviazanymi da lichtarnych słupoŭ.
Na iłbach zatrymanych było napisana słova «ratero» (ź ispanskaj — «złodziej»), a na tvarach časta byli namalavanyja kacinyja vusy. U niekatorych vypadkach rot achviar byŭ zaklejeny, a pobač znachodzilisia rovary abo matacykły, jakija tyja nibyta sprabavali skraści, a taksama šyldy z abvinavačvańniami.
Na fatahrafijach u niekatorych mužčyn vidać parezy, siniaki i ślady kryvi na tvarach, što śviedčyć pra toje, što pierad hetym ich, imavierna, źbili. U adnym z vypadkaŭ dvuch mužčyn pryviazali da lichtarnaha słupa śpinami adzin da adnaho.
Pavodle miascovych ŚMI, nieviadomy vykanaŭca nibyta rasčaravaŭsia ŭ pracy pravaachoŭnych orhanaŭ i vyrašyŭ samastojna karać mierkavanych złačyncaŭ. Mieksikanski žurnalist Łuis Kardenas, jaki apublikavaŭ u internecie sieryju fotazdymkaŭ mierkavanych złodziejaŭ, prazvaŭ hetaha čałavieka «Betmienam z Łahas-de-Marena» pa anałohii z hierojem komiksaŭ, jaki biare pravasudździe ŭ svaje ruki.
Dziaržaŭny sakratar pa biaśpiecy Chaliska Chuan Pabła Ernandes paviedamiŭ, što palicyja zafiksavała piać takich vypadkaŭ i viadzie pošuk asob, jakija mohuć być da ich datyčnyja. Prakuror štata Chaliska paćvierdziŭ, što rasśledujucca jak sami napady, tak i abvinavačańni ŭ kradziažach matacykłaŭ i rovaraŭ.
Pry hetym prakuratura padkreśliła: navat kali pryviazanyja mužčyny sapraŭdy mohuć być datyčnyja da kradziažoŭ, na hety momant jany źjaŭlajucca achviarami, pakolki byli niezakonna źbityja i pazbaŭlenyja svabody. Supracoŭniki ekstrannych słužbaŭ akazali im miedycynskuju dapamohu. Pakul nieviadoma, ci budzie kamuści ź ich pradjaŭlena abvinavačańnie ŭ kradziažach.
Pavodle palicyi, užo vyznačanyja dźvie mašyny, jakija mohuć być źviazanyja z hetymi incydentami, adnak zatrymańniaŭ pakul nie było.
Jak adznačaje vydańnie, historyja razhortvajecca ŭ adnym z samych kryminahiennych rehijonaŭ Mieksiki. Štat Chaliska razam z susiednim štatam Miechika ŭvachodzić u lik rehijonaŭ z samym vysokim uzroŭniem majomasnych złačynstvaŭ. Pavodle źviestak palicyi, bolš za pałovu ŭsich kradziažoŭ u krainie prypadaje mienavita na hetyja dva štaty.
Akramia taho, Chaliska źjaŭlajecca apornaj terytoryjaj kartela «Novaje pakaleńnie Chaliska» (CJNG) — adnoj z najbujniejšych i najbolš žorstkich złačynnych arhanizacyj Mieksiki. Pavodle acenak amierykanskich uładaŭ, mienavita hety kartel adyhryvaje klučavuju rolu ŭ kantrabandzie fientaniłu i inšych narkotykaŭ u ZŠA.
U cełym Mieksika ŭžo šmat hadoŭ sutykajecca z vysokim uzroŭniem złačynnaści. Pavodle aficyjnych danych, tolki ŭ 2023 hodzie ŭ krainie było zarehistravana bolš za 36 tysiač hvałtoŭnych zachopaŭ aŭtamabilaŭ. Kradziažy matacykłaŭ i rovaraŭ taksama zastajucca raspaŭsiudžanaj prablemaj. Pry hetym jany časta vykarystoŭvajucca dla ździajśnieńnia inšych złačynstvaŭ. Pavodle acenak uładaŭ štata Miechika, kala 70% złačynstvaŭ u rehijonie ździajśniajecca z vykarystańniem matacykłaŭ.
Kamientary