Dzieci da dvuch hadoŭ uvohule nie pavinny siadzieć pierad ekranam — vyniki novaha daśledavańnia

Pieršy 1001 dzień žyćcia — ad pačatku ciažarnaści da druhoha dnia naradžeńnia — ličycca padmurkam, na jakim budujecca ŭsio dalejšaje raźvićcio čałavieka. Da hetaha času aficyjnyja rekamiendacyi dazvalali minimalnaje vykarystańnie hadžetaŭ dla małych, kali heta spryjaje kamunikacyi — naprykład, videazvanki svajakam.

Adnak ekśpierty z Univiersiteta Lidsa praviali, jak piša Daily Mail, samy maštabny na siońnia ahlad suśvietnych danych, i pryjšli da radykalnaj vysnovy: dzieciam da dvuch hadoŭ naohuł lepš nie siadzieć pierad nijakimi ekranami.

Aŭtary davodziać, što vykarystańnie ekranaŭ u pieršyja dva hady žyćcia źviazana z pavyšanaj niebiaśpiekaj roznych prablem u budučyni. Siarod ich — bolš pavolnaje raźvićcio maŭleńnia, parušeńni snu, prablemy sa zdaroŭjem vačej, a taksama bolšaja ryzyka raźvićcia atłuścieńnia.

Inšyja mahčymyja nastupstvy ekrannaha času — mienš mahčymaściaŭ dla naładžvańnia emacyjnaj suviazi z baćkami, mienš času na hulni z adnahodkami, praźmiernaje ŭzbudžeńnie dziciaci i zvyčka supakojvacca z dapamohaj hadžetaŭ.

Pry hetym daśledčyki padkreślivajuć: ich praca nie pavinna stać padstavaj vinavacić baćkoŭ. Jany adznačajuć, što sučasnaje žyćcio praktyčna niemahčyma ŭjavić bieź ličbavych technałohij — hadžety vykarystoŭvajucca dla pracy, zakupaŭ, atrymańnia miedycynskaj dapamohi i znosin. Tamu dzicia amal niepaźbiežna budzie sutykacca ź imi ŭ paŭsiadzionnym žyćci.

Pavodle daśledavańnia, dzieci čaściej pravodziać čas sa smartfonami, płanšetami abo televizaram u siemjach, dzie darosłyja sami šmat karystajucca takimi pryładami. Adnak daśledčyki padkreślivajuć, što havorka idzie nie pra asabistuju adkaznaść kankretnych siemjaŭ, a pra ŭpłyŭ sučasnaha ličbavaha asiarodździa.

Asobna aŭtary zaklikali technałahičnyja kampanii adkaźniej stavicca da svajoj pradukcyi. Na ich dumku, baćkam nie pavinny prapanoŭvać kantent, jaki pazicyjanujecca jak prydatny dla niemaŭlataŭ, kali navukovyja danyja nie paćviardžajuć jaho karyści.

Što rekamiendujuć navukoŭcy

Što ž navukoŭcy prapanujuć uzamien? Alternatyvy vyhladajuć prostymi, ale mienavita jany spryjajuć raźvićciu dziciaci.

U pieršuju čarhu jany rajać čaściej byvać ź dziciem na śviežym pavietry. Hulać i bavicca na pryrodzie i placoŭkach karysna dla fizičnaha raźvićcia i zdaroŭja vačej.

Jašče adna rekamiendacyja — nie vykarystoŭvać ekranaŭ padčas pryjomu ježy. Heta dapamahaje farmiravać bolš zdarovyja charčovyja zvyčki.

Zamiest smartfonaŭ i płanšetaŭ daśledčyki prapanujuć čaściej vykarystoŭvać zvyčajnyja, nie elektronnyja cacki, a taksama stvarać bolš mahčymaściej dla žyvych znosin — sumiesnych hulniaŭ, razmoŭ i sustreč. Na dumku aŭtaraŭ ahladu, mienavita takija formy ŭzajemadziejańnia spryjajuć sacyjalnamu raźvićciu dziciaci.

Navukoŭcy padkreślivajuć: prablema vykarystańnia ekranaŭ dziećmi da dvuch hadoŭ užo nabyła hłabalny maštab. Tamu toje, jak hramadstva budzie stavicca da jaje siońnia, moža paŭpłyvać na zdaroŭje i jakaść žyćcia budučaha pakaleńnia.

• 4
• 0
• 0
• 1
• 1
• 0
• 0
• 1