U Smalavičach budujuć niezvyčajny šmatfunkcyjanalny kompleks Smala. Maje vyhladać jak u Niderłandach
Minskaja dyzajn-studyja ASGP architects pakazała ŭ Threads vizualizacyju šmatfunkcyjanalnaha kompleksu Smala, budaŭnictva jakoha ŭžo razharnułasia ŭ Smalavičach. Niezvyčajny abjekt źjavicca ŭ mikrarajonie Lipki pobač z trasaj M1. Zamiest nudnaha anhara z sendvič-panelaŭ tut pabudujuć šerah sakavitych roznakalarovych damkoŭ roznaj vyšyni, dzie raźmieściacca kramy, bytavyja pasłuhi i fudkort. Vydańnie Domovita.by raskazvaje, jak budzie vyhladać budučy kompleks.
Mikrarajon Lipki znachodzicca na paŭdniova-ŭschodniaj uskrainie Smalavičaŭ — na mašynie ad Minska siudy možna dalacieć pa chutkasnaj trasie M1 litaralna za paŭhadziny. Łakacyja cikavaja: akramia zvyčajnaha pryvatnaha siektara, tut u 2020 hodzie pačaŭ raści kłubny pasiołak Lipki Village.
U svoj čas minski zabudoŭščyk «Trest Prambud» zabraŭ tut pad prajekt kala 12 hiektaraŭ ziamli, kab stvaryć akuratnuju małapaviarchovuju zabudovu ŭ adzinym jeŭrapiejskim styli. Kvadrat na starcie addavali pa vielmi dastupnaj canie — ad $800 pry stopracentnaj apłacie.
Ciapier pa susiedstvie z žyłoj zabudovaj uzvodziać i novy infrastrukturny abjekt. Što vielmi ciešyć: zamiest šabłonnaha paviljona architektary dyzajn-studyi ASGP architects vyrašyli zrabić niešta kudy bolš jaskravaje i niezvyčajnaje.
Sami aŭtary apisali kancepcyju tak:
«Abjom kompleksu padzialili na šerah asobnych «damkoŭ» roznaha maštabu, vyšyni i koleru. Kožny ź ich abaznačaje asobnuju funkcyju abo arandatara (fudkort, handal, bytavyja pasłuhi), ale razam jany farmujuć adzinuju kampazicyju. Vyrazny siłuet i bujnyja kalarovyja płoskaści robiać kompleks dobra paznavalnym i lohka sčytvalnym z darohi. Atrymałasia nievialikaja architekturnaja vulica».
U vyniku na renderach prajekt bolš padobny da akuratnaha kvartała dzieści ŭ Niderłandach, čym na zvykły handlovy centr.
Budynki atrymali łamanyja siłuety z krutymi dvuchschilnymi dachami i fasadnym azdableńniem ź viertykalnym reljefam. Z palitraj taksama ścipłaści nie prajaŭlali: u prajekcie śmieła źmiksavali hłyboki sini, ciopły aranžavy i sakavity terakotavy kolery. Z darohi taki ansambl dakładna budzie čaplać voka i vyłučacca na fonie zielaniny.
Architektary paćvierdzili, što budoŭla ŭžo idzie prosta ciapier, adnak bolš nijakaj infarmacyi pra heta kompleks u adkrytym dostupie niama. U sietcy nielha znajści ni aficyjnych danych pra zakazčyka, ni terminaŭ zdačy, ni kankretnych apierataraŭ, jakija zojmuć hetyja płoščy. Pakul zastajecca tolki nazirać za prajektam i čakać, nakolki dakładna śmiełuju zadumu ŭdasca ŭvasobić u realnaści.
Tenisny kort, plaž i aranžareja. Jak pad Niaśvižam źbirajucca pierarabić staražytny park siadziby Rdułtoŭskich
Kvadrat ad €1285 i kredyt pad 1%. U minskim «Paŭnočnym Bierazie» anansavali novy kvartał
U Minsku paśla maštabnaj renavacyi adkryŭsia Pałac šlubaŭ na Kamunistyčnaj FOTY
Try novyja hateli, staražytny brovar i piešachodnaje koła. Što novaha źjavicca ŭ Hrodnie
Ciapier čytajuć
Stała viadomaje imia druhoj biełaruski, jakaja zhinuła pad sielem u Niepale. Heta 24‑hadovaja Iryna z žurfaka BDU2
Stała viadomaje imia druhoj biełaruski, jakaja zhinuła pad sielem u Niepale. Heta 24‑hadovaja Iryna z žurfaka BDU
Elektronnuju «Biełaruskuju encykłapiedyju», stvoranuju jak prastoru «vierahodnych viedaŭ pra Biełaruś», cicha likvidavali razam z redakcyjaj. Kupu artykułaŭ pieradali Hihinu55
Kamientary