Varšava asłablaje dypłamatyčny ihnor Minska. Upieršyniu paśla 2020‑ha sustrelisia ministry zamiežnych spraŭ Biełarusi i Polščy
Kiraŭniki zamiežnapalityčnych viedamstvaŭ Biełarusi i Polščy 22 vieraśnia praviali sustreču na palach Hienasamblei AAN u Ńju-Jorku. Pra heta BiełTA paviedamili ŭ pres-słužbie MZS Biełarusi.
«Sustreča ź ministram zamiežnych spraŭ Polščy Radasłavam Sikorskim była pryśviečanaja acency stanu biełaruska-polskich adnosin i šlachoŭ ich dalejšaha raźvićcia ŭ intaresach narodaŭ dźviuch krain. Baki taksama abmierkavali situacyju ŭ rehijonie», — raskazali ŭ pres-słužbie MZS Biełarusi.
Adnoj z umovaŭ narmalizacyi adnosin ź Minskam Varšava nazyvała vyzvaleńnie palitviaźnia Andreja Pačobuta. Heta zdaryłasia ŭ krasaviku 2026-ha, paśla piaci hadoŭ źniavoleńnia. Niahledziačy na jaho vydvareńnie ź Biełarusi pry vyzvaleńni, jon zmoh zajechać u Biełaruś u vieraśni. Jaho pry hetym nie aryštavali. Varta adznačyć, što Pačobut ustrymlivaŭsia ad palityčnych zajaŭ i pramych kantaktaŭ ź biełaruskaj apazicyjaj i niezaležnymi ŚMI.
— AAN — heta niejtralnaja terytoryja, — cytuje Radasłava Sikorskaha polski partał Onet.pl.
U suviazi z hetym, skazaŭ jon, tut možna sustrakacca i z pradstaŭnikami tych krain, ź jakimi nie abaviazkova naładžanyja adnosiny ŭ inšych kantekstach.
Na pytańnie pra chod sustrečy i toje, jakija temy abmiarkoŭvalisia, Sikorski skazaŭ, što siarod ich była situacyja na miažy, a taksama situacyja z rehijanalnaj biaśpiekaj.
Na pytańnie, ci prasiŭ jon, kab Biełaruś nie dazvalała Rasii pralatać bieśpiłotnikam i rakietam praz svaju terytoryju, jon adkazaŭ: «U tym liku».
— Heta pieršaja, aznajamlenčaja sustreča, ale adbyvajucca taksama sustrečy inšych viedamstvaŭ, na inšych uzroŭniach. Nieŭzabavie my adkryvajem novy budynak pasolstva ŭ Minsku. Kali susied choča razmarozić i palepšyć adnosiny, to Polšča zaŭsiody pieršaj hatovaja da zhody, — skazaŭ kiraŭnik MZS Polščy.
Na ŭdakładnialnaje pytańnie, ci aznačaje heta, što polski ŭrad pryznaje režym Łukašenki, Sikorski adkazaŭ: «Jak dziaržava, my pryznajom inšyja dziaržavy, a nie ŭrady».
Na pytańnie, ci aznačaje heta narmalizacyju adnosin ź Biełaruśsiu, jon skazaŭ, što «heta jak praleska, jakaja moža raśćviści, kali nadvorje budzie spryjalnym».
Kamientary