Ščaście baćkoŭ źviazanaje z kolkaściu dziaciej u siamji i navat ich połam
Kitajskija navukoŭcy praanalizavali danyja amal 50 tysiač siemjaŭ i vyjavili cikavuju zakanamiernaść: najbolš vysoki ŭzrovień ščaścia adznačali baćki ź dźviuma dočkami. U čym pryčyna?
Navukoŭcy z Džedzianskaha ŭniviersiteta Hunšan vyrašyli vyśvietlić, jak kolkaść dziaciej i ich poł źviazanyja z samaacenkaj ščaścia baćkoŭ. Jak piša Daily Mail, aŭtary praanalizavali źviestki šaści chval ahulnanacyjanalnaha sacyjalnaha apytańnia, praviedzienaha z 2012 pa 2021 hod. U vybarku ŭvajšli 49 752 siamji. Udzielniki adkazvali ŭ tym liku na pytańni pra svajo adčuvańnie ščaścia, vopyt baćkoŭstva, kolkaść dziaciej i ich poł.
U vyniku vyśvietliłasia, što najvyšejšy ŭzrovień zadavolenaści žyćciom demanstrujuć pary siaredniaha ŭzrostu, jakija vychoŭvajuć dźviuch dačok.
Navukoŭcy navat uviali termin «pieravaha dačok», zaŭvažyŭšy istotnuju roźnicu ŭ emacyjnym stanie baćkoŭ u zaležnaści ad połu dziaciej.
Čamu mienavita dočki?
Kab rastłumačyć hetuju zakanamiernaść, daśledčyki vyłučyli dźvie asnoŭnyja teoryi. Pieršaja hruntujecca na asablivaściach hiendarnych rolaŭ i sacyjalizacyi.
Pavodle jaje, hramadskija normy farmujuć žančyn bolš emacyjna adkrytymi, spahadlivymi i aryjentavanymi na padtrymańnie mižasobasnych stasunkaŭ, u toj čas jak mužčyn čaściej vučać emacyjnaj strymanaści i prahmatyzmu. Dziakujučy hetamu dočki zvyčajna stvarajuć bolš ciopły psichałahičny klimat u domie.
Druhaja pryčyna źviazanaja sa źjavaj, jakuju ŭ sacyjałohii nazyvajuć kinkeeping. Litaralna jaho možna pierakłaści jak «padtrymańnie rodnasnych suviaziaŭ». Tak nazyvajuć niabačnuju pracu pa zachavańni svajackich suviaziaŭ i emacyjnych kantaktaŭ pamiž pakaleńniami.
Apytańni pakazali, što mienavita dočki čaściej biaruć na siabie hetuju rolu. Jany rehularniej inicyjujuć znosiny, akazvajuć maralnuju padtrymku starejučym baćkam i stanoviacca dla ich blizkimi davieranymi asobami, što značna źnižaje ŭzrovień stresu i pačućcio adzinoty ŭ stałym vieku.
Pry hetym aŭtary daśledavańnia padkreślivajuć, što ich vysnovy hruntujucca na źviestkach z Kitaja ź jaho admysłovymi kulturnymi normami, sacyjalnymi ŭmovami i tradycyjami. Tamu ŭ inšych krainach vyniki mohuć mieć svaje adcieńni. Tym nie mienš daśledavańnie jaskrava pakazvaje, što mienavita jakaść emacyjnaj suviazi ź dziećmi zastajecca klučavym faktaram baćkoŭskaha ščaścia.
Ciapier čytajuć
«Strelba kali i strelić, to naŭrad ci kulamiotnaj čarhoj». Maksim Znak acaniŭ realnaść pahroz biełaruskaj prapahandy pazbavić hramadzianstva palitemihrantaŭ1010
Kamientary