«Bačyli niejkich robataŭ». Pobač z bazaj VPS u Anhlii aryštavali piać čałaviek — ich padazrajuć u padrychtoŭcy teraktu

Piać mužčyn aryštavanyja pa padazreńni ŭ padrychtoŭcy terarystyčnaha akta. Pra metu i matyvy złamyśnikaŭ pakul ničoha nie viadoma, piša Bi-Bi-Si.

Akramia brytanskaj vajennaj avijacyi, na bazie Fejrfard pastajanna raźmiaščajucca padraździaleńni VPS ZŠA, a paśla pačatku vajny ź Iranam tam byli razhornutyja amierykanskija bambardziroŭščyki. 

U noč na niadzielu 27 vieraśnia ŭ palicyju pastupiŭ zvanok pra «try padazronyja aŭtamabili», jakija nakiroŭvalisia ŭ bok avijabazy Fejrfard. Miascovy žychar Džulijan Tadśbiery, raskazaŭ, što ŭnačy ŭ hetym rajonie źjavilisia try «niezvyčajnyja furhony». Jon śćviardžaje, što na zapisach z kamier videanazirańnia na hankach damoŭ, jakija žychary prahledzieli dystancyjna ŭžo paśla evakuacyi, možna było razhledzieć «niejkich robataŭ, jakija zazirali ŭ kuzavy hetych furhonaŭ».

Z ranicy vajskovyja sapiory z vykarystańniem śpiecyjalnaha robata abśledavali niekalki aŭtamabilaŭ, a ź vioski Uełfard pobač z avijabazaj ranicaj byli evakujavanyja dziasiatki siemjaŭ. Palicyja ŭstanaviła ačapleńnie, na miesca zdareńnia prybyła vialikaja kolkaść mašyn apieratyŭnych słužbaŭ.

Palicyja Hłosteršyra paviedamiła pra aryšt niekalkich mužčyn pa padazreńni ŭ złačynstvie z vybuchovymi rečyvami. Paźniej kontrterarystyčnaja palicyja ŭdakładniła, što piaciora aryštavanych padazrajucca taksama ŭ padrychtoŭcy terarystyčnaha akta.

Pavodle źviestak palicyi, byli evakujavanyja žychary 85 damoŭ. Kardon, ustanoŭleny z rańniaj ranicy niadzieli, byŭ pašyrany da 400 mietraŭ i ciapier achoplivaje avijabazu RAF Fejrfard.

Palicyja i kontrterarystyčnyja słužby pakul nie ahałošvajuć nijakich detalaŭ, jakija dazvalajuć zrazumieć, ź jakimi mienavita padziejami mahli być źviazanyja dziejańni padazravanych i chto moh stajać za arhanizacyjaj mierkavanaha teraktu. Premjer-ministr Vialikabrytanii Endzi Biernem zaklikaŭ nie rabić paśpiešlivych zdahadak i dačakacca vynikaŭ rasśledavańnia.

Prezident ZŠA Donald Tramp pachvaliŭ brytanskija ŭłady za zładžanuju pracu i zajaviŭ, što za padazravanymi sačyli daŭno.

«My viali za imi sačeńnie. Jany mieli namier nanieści surjoznuju škodu našaj krepaści, i supracoŭnictva z brytancami skłałasia vydatna. Mahčyma, heta byŭ Skotłand-Jard, ja nie viedaju. My supracoŭničali z mnohimi [śpiecsłužbami]. My daŭno sačyli za imi i złavili ich», — skazaŭ Tramp.

Viadoma, što avijabaza vykarystoŭvałasia VPS ZŠA dla raźmiaščeńnia bambardziroŭščykaŭ, jakija zadziejničanyja ŭ vajnie ź Iranam, što idzie ŭžo siomy miesiac.

Ułady Irana ŭ lipieni abvinavacili Vialikabrytaniju ŭ saŭdziele ŭ vajennych złačynstvach i vystupili ź niedvuchsensoŭnym papiaredžańniem: «Luby bok, jaki jakim-niebudź čynam udzielničaje ŭ vajennaj ahresii suprać Irana, budzie nieści adkaznaść za nastupstvy hetaha rašeńnia». Baza VPS u Fejrfardzie była zhadanaja ŭ zajavie KSIR.

Akramia taho, usio heta adbyłosia na fonie rostu kolkaści incydentaŭ, jakija zachodnija ŭłady źviazvajuć z hibrydnaj vajnoj Rasii suprać Zachadu. Pavodle źviestak zachodnich krynic, meta kampanii, za jakoj bačać Kreml, a dakładniej jaho vajennuju raźviedku HRU, — pakarać krainy, jakija padtrymlivajuć Ukrainu.

• 3
• 0
• 0
• 0
• 0
• 0
• 0
• 0