Minpryrody choča, kab rajonnyja čynoŭniki nie zabaraniali kupacca ŭ vadajomach biez tłumačeńnia

Fota:AP Photo Mindaugas Kulbis

Ministerstva pryrodnych resursaŭ i achovy navakolnaha asiarodździa padrychtavała prajekt pastanovy Savieta ministraŭ «Ab dziejnaści ŭ halinie achovy i vykarystańnia vod». Prajekt i abhruntavańnie da jaho apublikavanyja na partale forumpravo.by. Pastanova pavinna ŭstupić u siłu 1 studzienia 2027 hoda razam z novaj redakcyjaj Vodnaha kodeksa.

Čatyry miescy dla kupańnia na 102 reki i vadajomy

U abhruntavańni ministerstva pryznaje, što miascovyja ŭłady zabaraniajuć kupańnie biez adzinaha padychodu i ŭ asnoŭnym nie tłumačać, čamu.

Jak prykład pryvodziacca try rajony. U Dokšyckim rajonie z nasielnictvam 19 630 čałaviek vyznačanyja tolki čatyry miescy dla kupańnia. Kupacca ŭ inšych miescach zabaroniena. Pry hetym, pavodle dziaržaŭnaha vodnaha kadastru, u rajonie 55 vadaciokaŭ i 47 vadajomaŭ. Chto kupajecca ŭ ich pa-za čatyrma dazvolenymi miescami, ryzykuje atrymać administracyjnuju adkaznaść.

U Asipovickim rajonie z nasielnictvam 42 273 čałavieki pakinuli dva miescy dla adpačynku na vadzie. Kupacca ŭ inšych miescach taksama zabaroniena. Usiaho ŭ rajonie 40 vadaciokaŭ i 41 vadajom.

U Rečyckim rajonie ŭ studzieni 2024 hoda vyznačyli dva miescy dla adpačynku, a kupacca zabaranili ŭ 23 vadaciokach i 13 vadajomach. Usiaho ŭ rajonie 44 vadacioki i 53 vadajomy. Pavodle ministerstva, heta stvaraje «niavyznačanaść» sa statusam astatnich.

Ministerstva spasyłajecca na ratavalnikaŭ: ludzi tonuć najpierš nie praz stan vadajoma (niaroŭnaje dno, chutkuju płyń, kruty bierah), a praz apjanieńnie, pieraacenku svaich sił i žadańnie «prademanstravać svaju śmiełaść». U 2025 hodzie z 50 čałaviek, jakija patanuli niepasredna padčas kupańnia, 68% byli pjanyja. Kali hinuć niepaŭnaletnija, adnoj z hałoŭnych pryčyn zastajecca toje, što darosłyja pakinuli ich biez nahladu.

Pavodle ministerstva, kali źjaviacca dadatkovyja miescy dla kupańnia, rajony stanuć bolš pryvabnymi dla turystaŭ, a na isnujučyja miescy adpačynku budzie mienš nahruzki.

Što budzie ličycca niebiaśpiečnym

Prajekt uvodzić pieralik kryteryjaŭ niebiaśpieki dla žyćcia i zdaroŭja. Na ich padstavie miascovyja ŭłady zmohuć zabaraniać abo abmiažoŭvać kupańnie, płavańnie na łodkach i zabor vady dla haspadarča-pitnych patreb. Niebiaśpiečnym dla kupańnia i zaboru vady budzie ličycca vykarystańnie:

• vadajomaŭ, dzie jakaść vady nie adpaviadaje hihijeničnym narmatyvam;
• abvodnienych karjeraŭ, mielijaracyjnych kanałaŭ, sažałak-kapanak i technałahičnych vadajomaŭ;
• vadajomaŭ u sanitarna-achoŭnych zonach abjektaŭ, jakija ŭździejničajuć na zdaroŭje čałavieka i navakolnaje asiarodździe, a taksama ŭ achoŭnych zonach elektrasietak;
• miescaŭ bližej za 100 mietraŭ ad partoŭ, pryčałaŭ i hidratechničnych zbudavańniaŭ, a taksama sudnavaha chodu i miescaŭ bližej za 50 mietraŭ ad jaho miažy;
• miescaŭ bližej za 1000 mietraŭ ad vypusku haspadarča-bytavych i vytvorčych ściokaŭ i bližej za 500 mietraŭ ad vypusku liŭnievych ściokaŭ;
• rajonaŭ, dzie prahnazujuć niebiaśpiečnyja źjavy nadvorja aranžavaha i čyrvonaha ŭzroŭniu.

Zabarony zmohuć uvodzić na ŭvieś vadajom abo na jaho častku, časova abo biesterminova. Stan vadajomaŭ pavinny buduć aceńvać nie radziej za raz na hod, da pačatku kupalnaha siezona, a taksama pazapłanava.

Vadajomy ŭ arendu

Novy Vodny kodeks dazvalaje zdavać vadajomy abo ich častki ŭ arendu dla adpačynku, sportu i turyzmu. Pavodle abhruntavańnia, heta robicca ŭ miežach dziaržaŭnaj stratehii prasoŭvańnia «nacyjanalnaha turystyčnaha brenda».

Arandataram moža być tolki jurydyčnaja asoba.

Nie dazvolać zdavać u arendu častku vadajoma, da jakoj prylahaje adziny abo adziny dobraŭparadkavany padychod da vady. Taksama nielha budzie brać u arendu rybałoŭnyja ŭhodździ i miescy pražyvańnia vidaŭ z Čyrvonaj knihi. Asobnaj normy pra svabodny dostup ludziej da vadajoma, arandavanaha dla adpačynku, u prajekcie niama. Takuju normu dadajuć tolki ŭ praviły arendy sažałak i karjeraŭ dla rybahadoŭli: tam arandatar nie zmoža pieraškadžać ludziam padychodzić da vady, ale zmoža zabaranić łavić rybu.

• 0
• 0
• 0
• 0
• 0
• 0
• 0
• 0