Прэм’ер Брытаніі заявіў, што Расія ўмешвалася ў рэферэндум па брэксіце дзесяць гадоў таму

Прэм’ер-міністр Вялікабрытаніі Эндзі Бёрнэм заявіў, што Расія сапраўды ўмешвалася ў рэферэндум аб выхадзе Вялікабрытаніі з Еўрасаюза ў 2016 годзе, і папярэдзіў, што Масква займаецца падобным у Францыі і Германіі, піша Бі-бі-сі.

Бёрнэм расказаў у падкасце The Rest is Politics, што, упершыню трапіўшы на Даўнінг-стрыт пасля абрання лідарам Лейбарысцкай партыі і прызначэння прэм’ер-міністрам, ён спытаў пра магчымае ўмяшанне Расіі ў тое галасаванне.

«Я атрымаў выразны адказ: так, такое мела месца», — сказаў Бёрнэм.

«Я лічу, што мы насамрэч занадта пасіўна рэагавалі на гэта і недастаткова інфармавалі людзей пра тое, у якой ступені з-за мяжы спрабуюць дэстабілізаваць палітычны працэс», — дадаў ён.

Бёрнэм не прывёў дадатковых падрабязнасцей пра характар або маштабы дзейнасці Масквы падчас рэферэндуму па брэксіце.

Заява выклікала крытыку з боку прыхільнікаў незалежнасці Вялікабрытаніі ад ЕС. Група актывістаў Britain Unbound назвала каментарыі Бернема «яшчэ адной грубай спробай падарваць легітымнасць рашэння, прынятага брытанскім народам у 2016 годзе».

У заяве групы адзначаецца, што замежнае ўмяшанне ў выбары ў Вялікабрытаніі «відавочна непрымальнае», але дадаецца: «Няма важкіх падстаў меркаваць, што на вынік рэферэндуму 2016 года паўплывала ўмяшанне Расіі». «Акрамя таго, абразліва меркаваць, што выбаршчыкаў так лёгка падмануць», — заявілі актывісты.

У інтэрв’ю вядучым падкаста, якое павінна выйсці ў эфір у панядзелак, Бёрнэм заявіў, што абмяркоўваў праблему расійскага ўмяшання з канцлерам Фрыдрыхам Мерцам падчас свайго візіту ў Германію ў пачатку тыдня.

«Безумоўна, існуе дэзінфармацыя, якая зыходзіць з Расіі і ўплывае на нямецкую палітыку», — сказаў ён.

Кіраўнік брытанскага ўрада працягнуў: «Цяпер важна выразна зафіксаваць гэтыя факты, і я мяркую, што гэта дапаможа выбаршчыкам у Германіі і Францыі зразумець: частка гэтай палітыкі ініцыюецца нашымі ворагамі, а менавіта Расіяй».

Упершыню за 10 гадоў з моманту рэферэндуму і пасля змены сямі ўрадаў прэм’ер-міністр краіны заявіў, што Расія спрабавала паўплываць на вынік рэферэндуму.

Аднак папярэджанні пра спробы Крамля ўздзейнічаць на палітыку Вялікабрытаніі гучаць рэгулярна.

У 2020 годзе парламенцкі Камітэт па разведцы і бяспецы апублікаваў даклад пра ўмяшанне Расіі ў выбары і рэферэндумы ў Вялікабрытаніі.

У дакладзе не было адназначнай высновы пра тое, ці спрабавала Расія паўплываць на вынікі рэферэндуму аб выхадзе з ЕС, аднак у ім раскрытыкавалі ўрады, якія змянялі адзін аднаго, за тое, што яны не змаглі ў поўнай меры ацаніць гэтую пагрозу і супрацьстаяць ёй.

У верасні, выступаючы на Генеральнай Асамблеі ААН, Эндзі Бёрнэм абвінаваціў расійскія спецслужбы ў выкарыстанні «ўсіх даступных ім сродкаў для распаўсюджвання хлусні і дэзінфармацыі, а таксама для спекуляцыі на страхах людзей».

Бёрнэм заявіў, што Вялікабрытанія створыць новы цэнтр для «стрымлівання атрутнай хвалі» дэзынфармацыі.

• 0
• 0
• 0
• 0
• 0
• 0
• 0
• 0