Biełaruska nabyła BMW u Maskvie i papała na hrošy — daviałosia dapłacić jašče $12 tysiač, kab jeździć na aŭto

Mara ź siurpryzam

Zvyčajna rasijanie masava jeduć pa mašyny ŭ Biełaruś, a nie naadvarot, bo časy, kali biełarusam było vyhadna kuplać mašyny ŭ Rasii, daŭno syšli ŭ minułaje. Tym nie mienš biełaruska Volha nabyła mašynu ŭ padmaskoŭnych Chimkach, bo mienavita tam znajšłasia BMW u vykanańni i kamplektacyi, ab jakoj maryła žančyna.

Takoj mašynaj stała BMW 320 i M sport 2025 hoda vypusku, za jakuju biełaruska zapłaciła kala $73 tysiač.

Jak žančyna raskazvaje ŭ sacsietkach, jana ad samoha pačatku papiaredziła mieniedžaraŭ aŭtasałona «Rolf Premium» u Chimkach, što jana — hramadzianka Biełarusi, kuplać mašynu budzie na biełaruski pašpart, a stavić na ŭlik płanuje ŭ Minsku. Na što ŭ sałonie joj paviedamili, što prablem u Biełarusi nie ŭźniknie, bo abiedźvie krainy ŭvachodziać u Mytny sajuz.

Dziaŭčyna zabrała mašynu, paśpieła abciahnuć jaje achoŭnaj braniaplonkaj i pajechała ŭ Minsk. Ale radaść była niadoŭhaj.

U Biełarusi Volzie admovili ŭ pastanoŭcy na ŭlik i zapatrabavali dapłacić kala $12 000 utylizacyjnaha zboru. Vyśvietliłasia, što aŭtamabil uvoziŭsia na terytoryju JEAES praz Kyrhyzstan pa zanižanym invojsie.

Zhodna z dakumientami, BMW, jakuju pradali ŭ Rasii za $73 tysiačy, pry imparcie ŭ Kyrhyzstan dla mytni nibyta kaštavała ŭsiaho 16 600 jeŭra. Biełaruskaja mytnia ŭ taki śmiešnuju canu dla BMW 2025 hoda nie pavieryła, acaniła realny košt aŭto i vystaviła Volzie rachunak na sumu, jakaja była sekanomlenaja pastaŭščykom pry ŭvozie aŭto na terytoryju JEAES.

Pavialičyć

Čamu takoje adbyłosia?

Reč u tym, što jašče z 1 lipienia 2024 hoda ŭ Biełarusi pačali pa-novamu naličvać utylzbor na aŭto, jakija ŭvoziacca z krain JEAES — Rasii, Kazachstana, Armienii i Kyrhyzstana.

Kali z momantu razmytnioŭki transpartnaha srodku ŭ adnoj z krain JEAES prajšło mienš za hod (a ź lipienia 2026 hoda adličvajuć dva hady), biełaruskija mytnyja orhany pry naličeńni ŭtylizacyjnaha zboru abapirajucca na ekśpiertnuju acenku koštu transpartnaha srodku.

U vypadku, kali mytny košt aŭto, zajaŭleny pry mytnym afarmleńni ŭ adnoj z krain JEAES, budzie mienšy za košt, nazvany ŭ zaklučeńni ab niezaležnaj acency, to da staŭki ŭtylizacyjnaha zboru dadajecca roźnica pamiž mytnymi pošlinami i padatkami.

Sumu dapłat vyličvajuć sychodziačy z toj sumy, jakuju treba było b apłacić, kali b hety aŭtamabil ad pačatku razmytnivaŭsia ŭ Biełarusi z ulikam ekśpiertnaj acenki koštu (jana abapirajecca na rynkavy košt anałahičnych tavaraŭ u krainach nabyćcia).

Takim čynam mytnyja orhany zmahajucca sa sprobami zapłacić źmienšanyja mytnyja pošliny. U vyniku zamiest standartnaha ŭtylzboru pamieram 625 rubloŭ (kala 210 dalaraŭ) žančynie naličyli kala $12 tysiač.

Šou praciahvajecca

Kali žančyna apynułasia ŭ takoj situacyi, to źviarnułasia pa jurydyčnuju dapamohu da viadomaha rasijskaha jurysta-błohiera Jardreja (Andreja Padšyvałava), kampanija jakoha maje filijał u Biełarusi i ŭžo nieadnarazova zajmałasia hučnymi spravami ŭ našaj krainie.

Pavialičyć

Razam ź im jana pryjechała na pieramovy ŭ aŭtasałon «Rolf», dzie trapili na zdymki šou «Rolf-kantrol», jakoje viadzie skandalna viadomy aŭtabłohier Eryk Davydyč.

Asnoŭnaja pazicyja «Rolfa» i Davydyča ŭ tym, što mašyna pradavałasia dla ekspłuatacyi ŭ Rasii, dzie jaje na toj momant spakojna pastavili b na ŭlik, a praviarać tonkaści biełaruskaha zakanadaŭstva aŭtasałon nie abaviazany.

Praŭda, u niejki momant u bakoŭ amal atrymałasia damovicca. Pieršapačatkova Davydyč prapanoŭvaŭ biełaruscy viarnuć mašynu ŭ sałon, a joj vypłacili b nazad usiu sumu, abo abmianiać BMW na niejki inšy aŭtamabil z tych, što jość u prodažu.

Taki varyjant nie zadavoliŭ biełarusku, bo jana ŭžo vytraciła miesiac i kupu niervaŭ na hetaje aŭto, patraciła hrošy na aklejku jaho ŭ braniaplonku, a taksama paniesła inšyja vydatki. Aproč taho, sam aŭtamabil jaje całkam zadavolvaŭ, bo jon byŭ mienavita ŭ tym vykanańni, jakoha jana chacieła.

Mienavita praz heta biełaruska i nabyła jaho nie ŭ Biełarusi, a ŭ Rasii, bo inšych takich nidzie nie było.

Pavialičyć

Paźniej, praŭda, «Rolf» užo byŭ hatovy nie tolki vykupić nazad aŭto, ale i dastavić jaho ź Minska ŭ Maskvu i pakryć vydatki na aklejku braniaplonkaj. Ale damovicca nie atrymałasia, bo, z adnaho boku, Volha ŭsio ž chacieła zastacca z hetaj BMW, a ź inšaha, pa viartańni da pieramovaŭ źmianiłasia pazicyja Davydyča, jaki vystupaŭ z boku aŭtasałona.

Što dalej?

Pavodle infarmacyi Jardreja, Volha ŭsio ž zapłaciła sumu, jakuju zapatrabavali ad jaje ŭ Biełarusi, kab pastavić aŭto na ŭlik.

Dalej jana budzie padavać u sud na pradaŭca, kab toj kampiensavaŭ dapłatu ŭtylzboru, jaki jana była vymušana dapłacić praz toje, što mašyna była ŭviezienaja ŭ JEAES i razmytnienaja pa značna zanižanym košcie.

Volha pojdzie ŭ biełaruski sud.

Kyrhyzstan u historyi aŭto źjaviŭsia nie vypadkova

Admietna, što dla Kyrhyzstana razmytnioŭka aŭto pa jaŭna zanižanym košcie — sprava rucinnaja.

Šeryja imparciory pry afarmleńni praz Kyrhyzstan mohuć zanižać realny košt aŭtamabila navat u 3—4 razy.

Pavialičyć

Mienavita pa hetaj pryčynie razmytnioŭka darahich aŭto va ŭzroście da troch hadoŭ praz Kyrhyzstan była navat bolš vyhadnaj, čym 50%-ny dyskont dla invalidaŭ i šmatdzietnych pry afarmleńni pa 140‑m ukazie ŭ Biełarusi.

Dla prykładu, kali pry afarmleńni aŭtamabila koštam 100 tysiač jeŭra va ŭzroście da troch hadoŭ ilhotnaja razmytnioŭka ŭ Biełarusi abychodziłasia ŭ 24 tysiačy jeŭra, to ŭ Kyrhyzstanie možna było ŭkłaścisia ŭ 12—15 tysiač jeŭra.

Praz heta mienavita Kyrhyzstan staŭ asnoŭnym pastaŭščykom darahich mašyn u Rasiju. Praŭda, prablemy ŭ pakupnikoŭ takich mašyn mohuć być nie tolki ŭ Biełarusi. Rasijskaja mytnia maje prava pravodzić kamieralnuju pravierku ciaham troch hadoŭ paśla mytnaha afarmleńnia. Tamu toj fakt, što mašyna, razmytnienaja praz Kyrhyzstan, siońnia była pastaŭlena na ŭlik u Rasii, — nie harantyja taho, što ŭłaśnik nie sutykniecca z prablemami i adpaviednymi dapłatami ŭ budučyni. U Biełarusi ž hetyja prablemy jašče ź leta 2024 hoda vyłaziać adrazu pry pieršasnaj rehistracyi aŭto ŭ krainie.

• 0
• 0
• 10
• 3
• 0
• 0
• 0
• 0