Paśla načnoj ataki prynamsi 600 tysiač čałaviek zastalisia biez elektryčnaści. Prezident Ukrainy zajaviŭ, što Rasija demanstratyŭna ihnaruje abvieščanaje Trampam enierhietyčnaje pieramirje, i paprasiŭ amierykanskaha prezidenta ŭvieści mocnyja sankcyi dy dać Ukrainie dadatkovyja rakiety dla Patriot.
U noč na 14 kastryčnika Rasija vykarystała 39 balistyčnych rakiet i bolš za 120 udarnych dronaŭ i baražyrujučych bojeprypasaŭ suprać ukrainskaj enierhietyki i krytyčnaj infrastruktury. Pavodle Uładzimira Zialenskaha, pad udarami byli Kijeŭ, Kijeŭskaja vobłaść i Charkaŭ.
«Prycelny rasijski balistyčny ŭdar mienavita pa enierhietycy, adnosna jakoj prezident ZŠA abviaściŭ spynieńnie ahniu. Udar absalutna śviadomy i pakazalny svajoj maštabnaściu — takoj demanstratyŭnaj niepavahi Rasii da Amieryki jašče nie było», — zajaviŭ jon.
Pavodle prezidenta Ukrainy, paškodžanyja abjekty i abstalavańnie na 26 elemientach elektraenierhietyčnaha kompleksu i čatyroch abjektach naftahazavaha kompleksu. Biez elektryčnaści zastalisia prynamsi 600 tysiač čałaviek, pryčym adklučeńni mohuć pašyrycca. Jość zahinułyja i paranienyja, ale ich kolkaść u zvarocie nie nazvanaja.
Zialenski zaklikaŭ ZŠA i inšyja krainy žorstka adreahavać na ataku.
«Rasija zmarnavała mahčymaść deeskałacyi i vyrazna abrała praciahvać svaju varjackuju vajnu na źniščeńnie. My prosim prezidenta Trampa ŭvieści mocnyja sankcyi suprać Rasii», — skazaŭ jon.
Zialenski padkreśliŭ, što Ukrainu nielha pakidać sam-nasam z rasijskaj ahresijaj.
«Mir moža pryjści tolki dziakujučy sile, i my prosim Amieryku zhadać hety rejhanaŭski pryncyp», — zajaviŭ Zialenski.
Ciapier čytajuć
Hety małady biełarus stajaŭ la vytokaŭ ChatGPT. Voś što jon zrabiŭ1
Kamientary