Statkievič: Kaho nie ŭdałosia zapałochać da stałaha ŭzrostu, taho ŭžo nie zapałochaješ
Mikałaj Statkievič u svaim telehram-kanale padzialiŭsia dumkami pra situacyju z asudžanym na vosiem hadoŭ 71‑hadovym kulturołaham Vacłavam Areškam, jaki aślep za kratami.
«Dniami daviedaŭsia, što palitźniavoleny Vacłaŭ Areška, kulturołah dy intelektuał, całkam zhubiŭ zrok. Ale praciahvaje ŭtrymlivacca ŭ źniavoleńni, bo admaŭlajecca pisać prośbu ab pamiłavańni.
Mižvoli ŭźnikaje pytańnie: navošta im tak ździekvacca z 71‑hadovaha nieviduščaha kulturołaha, dla jakoha jaho stan u šmat razoŭ pavialičvaje pakuty, užo zvyčajnyja dla palitviaźniaŭ u pienitencyjarnaj sistemie režymu?
Pomsta za ŭdzieł u kirujučym orhanie Biełaruskaha nacyjanalnaha kanhresa, jaki režym ličyć adkaznym za padrychtoŭku revalucyi?
Ci prosta kiraŭnikoŭ režymu dahetul nie adpuskaje strach, pieražyty padčas revalucyi, i jany sprabujuć takim čynam nastolki zapałochać hramadstva, u tym liku i jaho stałuju častku, kab praduchilić paŭtor taho kašmaru? Chacia napałochanyja i tak napałochany. A kaho nie atrymałasia zapałochać da stałaha ŭzrostu, taho ŭžo nie zapałochaješ.
Dumaju, što ŭsie hetyja pryčyny majuć miesca. Ale jość jašče adna. Sami pa sabie kiraŭniki režymu nie mohuć rabić nad našym narodam toje, što robicca ź im zaraz. Jany dziejničajuć praz «mašynu» z vykanaŭcaŭ. I samy hałoŭny žach dla kiraŭnictva režymu — što raptam vykanaŭcy admoviacca vykonvać ich zahady, što mašyna represij złomicca. I tady ich nibyta mocnaja i strašnaja ŭłada rassyplecca ŭ prach.
Kab nie dapuścić takoha, režym imkniecca paviazać udziełam u represijach jak maha bolej «pravaachoŭnikaŭ» usich vidaŭ i maściaŭ, «zamatać» ich u dziejańni, jakija luby sapraŭdny sud pryznaje złačynstvam suprać čałaviečnaści.
Kab prymusić «siłavikoŭ» da pakory, u chod iduć roznyja srodki — ad zapałochvańnia pazbaŭleńniem zvańniaŭ i piensij, navat abvinavačvańniem u dziaržaŭnaj zdradzie. Da pavyšeńnia zarobkaŭ i vydzialeńnia žytła. A niekatorych navat publična nazyvajuć mahčymymi pierajemnikami. Jak heta ni dziŭna, tyja ŭsprymajuć abiacanki ŭsurjoz. Ale navat užo paviazanyja ŭ represii spadziajucca ŭ budučyni niejak paźbiehnuć adkaznaści ci chacia b minimizavać jaje.
Jašče ŭ źniavoleńni zaŭvažyŭ, što źmianilisia maksimalnyja pamiery pakarańnia za złačynstva suprać čałaviečnaści, jakoje ličycca mižnarodnym, biez terminu daŭniny.
U Kryminalnym kodeksie RB adpaviedny artykuł zaviecca «Złačynstva suprać biaśpieki čałaviectva». Raniej jon mieŭ maksimalnym pakarańniem śmiarotnuju karu ci pažyćciovaje źniavoleńnie. A z 2021 hoda maksimalnym pakarańniem stała 25 hadoŭ źniavoleńnia. Jany razumiejuć, što robiać, što im moža być za heta, i sprabujuć «padścialić sałomki» na budučyniu. A mnohija prosta spadziajucca daciahnuć da piensii ŭ spadziavańni, što novaja demakratyčnaja ŭłada pra ich zabudzie albo nie stanie žorstka karać staroha čałavieka. Hałoŭnaje — nie zanadta śviacicca ŭ tych represijach, kali da piensii ŭžo blizka.
Ale hetuju tendencyju zaŭvažaje i kiraŭnictva režymu. I sprabuje jaje spynić. Takim čynam, katavańnie nieviduščaha 71‑hadovaha Vacłava Areški maje dla inicyjataraŭ hetaha ździeku svaju łohiku jakraz u siłu taho, što takoje nie budzie niezaŭvažanym.
Heta stvareńnie precedenta, sihnał vykanaŭcam: nie spadziavajciesia na biaśpiečnuju staraść. Bo za toje, što my robim zaraz sa ślapym kulturołaham, «bečebešniki» potym adpomściać i vam. Tak što nie sprabujcie ŭchilicca, pracujcie, kab vypalić tut usio.
Takaja voś u ich łohika.
Mnie ž pakul zastajecca tolki zachapicca mužnaściu i stojkaściu Vacłava dy pažadać jamu voli. Va ŭsich sensach hetaha słova na biełaruskaj movie, jakuju tak lubić hety hodny čałaviek», — napisaŭ Mikałaj Statkievič.
Kamientary