Zvaŭkadaŭleny film

Karcina “Vaŭkadaŭ” Mikałaja Lebiedzieva stałasia pieršym kinarasčaravańniem hodu.

Mikałaj Lebiedzieŭ – talenavity režyser, jaki vydatna prajaviŭ siabie na trymcieńnikach “Źmiainaja krynica” i “Pakłońnik” (jaki, darečy, zdymaŭsia ŭ Miensku). Paśla vajskova-imperskaje “Zorki”, zdavałasia, što Lebiedzieŭ reabilitujecca na “Vaŭkadavie”, tym bolej, što fantastyčnaje j žachlivaje – jahony kaniok. Film-fentezi pakutliva zdymaŭsia try hady, reklama, što składała ledźvie nie pałovu biudžetu, abiacała vabnoty…

Nia viercie, kali zašmat abiacajuć!

Vaŭkadaŭ z rodu Šerych Sabakaŭ pomścić złydniam, jakija źniščyli jahonuju viosku. U pracesie pomsty Vaŭkadaŭ viazie pryncesu da muža – i vyzvalaje śviet ad pryšeścia złoj bahini.

Nasamreč, siužet filmu, pavodle ramanu Maryi Siamionavaj, nadziva niaŭciamny j zabłytany. Lekary-Hendalfy, mahičnaja knižka jak ściłka, Žadoby ź Ludažerami…

Paproki, što dla razumieńnia karciny nieabchodna pračytać raman – adkidaju. Kino jość samastojnym mastactvam, a paśla filmu Lebiedzieva karcić abychodzić usie rasiejskaje fentezi za kilametr.

Mudrahielistyja razvahi pra “siamionaŭskich” bahoŭ upryhožvajucca rykami, chrypami j vyćciom (u henym asabliva vyłučajecca Nina Ŭsatava). Ni z puščy ni z pola źjaŭlajecca ŭsia ŭ biełym aktrysa Varlej, kab pavučać hieroja i lekavać jaho paraškom.

Karcina cikavaja tolki, kali padličvać štampy. Staražytnaść – z “Konana-barbara” i “Planety viedźmaŭ” (zabytaja pierabudovačnaja kazka), adsiečanaja ruka złydnia – z “Uładara piarścionkaŭ”, parassypanyja jabłyki – z Tarkoŭskaha i Daŭženki, most nad biezdaniu – z “Dazoraŭ”. A złaja bahinia čamuści nahadvaje Nacyjanalnuju biblijateku sa zvyčkami Meduzy Harhony.

Aktory – u tym liku j talenavitaja Aksana Akińšyna – pazirujuć, admysłovyja efekty – aničoha dzivosnaha. Spačuvańnie j ažyŭleńnie vyklikaje tolki Nielatučy Myš, napałovu kamputarny maleńki kažan.

Ale najbolšaje spačuvańnie – hledačam, jakija z navahodniaha baduna pryjduć na paparaściahnuty film.

Jakomu varta było b zastacca prosta reklamnym rolikam.

“Vaŭkadaŭ z rodu Šerych Sabakaŭ” (Vołkodav iz roda Sierych Psov)

Rasieja, 2006, kalarovy,136 chv.

Režyser: Mikałaj Lebiedzieŭ

Roli vykonvajuć: Alaksandar Bucharaŭ, Aksana Akińšyna, Ihar Piatrenka, Alaksandar Damaharaŭ, Natalla Varlej, Nina Ŭsatava, Juozas Budrajcis.

Žanr: Fentezi pavodle tvoru Maryi Siamionavaj

Adznaka: 3,5 (z 10)

Usie filmy

• 0
• 0
• 0
• 0
• 0
• 0
• 0
• 0