Biełaruskaja čyhunka zakupić 20 karotkich elektryčak na 4 vahony. Voś što pra heta viadoma
Na sajcie dziaržzakupak IceTrade źjaviŭsia cikavy tendar. Biełaruskaja čyhunka (a dakładniej, jaje minskaje adździaleńnie) zakuplaje adrazu 20 elektryčak. Hety tendar asabliva cikavy ŭ śviatle taho, što niadaŭna BČ adklikała ŭ terminovy pazapłanavy ramont šviejcarskija elektryčki Stadler i polskija dyziel-ciahniki PESA, jakija, jak aficyjna zajaŭlałasia, «nie hatovyja pracavać u hetych umovach nadvorja» i «nie prajšli pravierku na tryvałaść», piša Blizko.by.
U tendarnaj zajaŭcy niama padrabiaznych techničnych charaktarystyk ciahnikoŭ, ale jość niekatoryja cikavyja padrabiaznaści.
Pa-pieršaje, zakupiać mienavita 4‑vahonnyja elektryčki. Dahetul u Biełarusi pa takoj schiemie chodziać tolki elektryčki Stadler samaj pieršaj pastaŭki: u 2010 hodzie było zakuplena 6 sastavaŭ tak zvanych «haradskich linij» i 4 sastavy rehijanalnych linij. Usie astatnija elektryčki značna daŭžejšyja: 5, 6, 7, 8, 10 vahonaŭ.
Pa-druhoje, viadomaja płaniroŭka vahonaŭ:
- 12 ciahnikoŭ z płaniroŭkaj kresłaŭ pa schiemie «3+2» z sustrečnym raźmiaščeńniem;
- 18 ciahnikoŭ z płaniroŭkaj kresłaŭ u hałaŭnych vahonach pa schiemie «3+2», a ŭ pryčapnych vahonach pa schiemie «3+3» z sustrečnym raźmiaščeńniem.
Heta dazvalaje vykazać zdahadku, što ciahniki pastaviać na roznyja maršruty (umoŭna blizkija i ŭmoŭna dalokija, abo, u terminałohii BČ, na haradskija, rehijanalnyja i mižrehijanalnyja linii).
Pa-treciaje, viadomaja zakupačnaja cana. Za ŭsie 30 ciahnikoŭ płanujecca zapłacić 908 miljonaŭ rubloŭ. Abo pa 30 266 667 rubloŭ za adzin ciahnik (10 207 000 dalaraŭ pa aktualnym kursie Nacbanka Biełarusi). Šmat heta ci mała? Dla paraŭnańnia: u 2010 hodzie BŽD kupiła 10 pieršych elektryčak Stadler pa 4 vahony kožnaja — na ŭsio patracili 60 miljonaŭ jeŭra, heta značyć, kožnaja elektryčka kaštavała pa 6 miljonaŭ jeŭra, abo prykładna 7,8 miljona dalaraŭ pa kursie taho hoda.
Narešcie, terminy pastavak. Usiu zakupku płanujecca vykanać z 1 červienia 2026 hoda pa 31 śniežnia 2030 hoda, heta značyć na praciahu 4,5 hoda. Intervał pamiž pastaŭkami kožnaha ciahnika nie ŭdakładniajecca. Ale toje, što bližejšaja data nastupić užo praz dva miesiacy, dazvalaje vykazać zdahadku, što zusim chutka novyja elektryčki možna budzie pabačyć na maršrutach.
Biełčyhunka zdymaje ciahniki Stadler z bresckaha napramku z-za pałomki
BČ znoŭ adpraŭlaje šviejcarskija i polskija ciahniki na techahlad i zamianiaje ich ciepłavozami
Minskaje mietro atrymaje z Rasii 15 novych vahonaŭ
Pamiž Biełaruśsiu i Rasijaj zapuściać novyja pryharadnyja ciahniki
Biełčyhunka znoŭ zamianiaje «Štadler» na sastaŭ sa zvyčajnych vahonaŭ
Kamientary