Hudbaj, Lenin!

Pry kancy sakavika ŭ Łyntupach, što na Pastaŭščynie, źnieśli biust Leninu, jaki stajaŭ kala prachadnoj miascovaha śpirtzavoda. Takim čynam, na adzin pomnik pravadyru praletaryjatu ŭ Biełarusi stała mieniej. Adnak u historyi krainy byli i zdarajucca vypadki, kali pomniki Iljiču nabyvajuć novaje žyćcio. Časam praces reinkarnacyi supravadžajecca kurjoznymi aka-ličnaściami.

Navahrudak

Pomnik Leninu tut stajaŭ na pastamiencie na adnajmiennaj płoščy da 1998-ha. Horad rychtavali da 200-hodździa naradžeńnia Adama Mickieviča, i pomnik demantavali. Kazali, što pad im nibyta znajšli kulamiot. Ale skieptyki śćviardžali, što takim čynam adciahvali ŭvahu ad znojdzienych na hetym ža miescy pareštak rasstralanych NKVD «vorahaŭ naroda». Jak by tam ni było, ale Lenin z Navahrudka nikudy nie dzieŭsia. Miascovyja ŭłady prapanavali pradprymalnikam achviaravać na biust pravadyru, i tyja nie admovilisia. Bronzavy Lenin nieŭzabavie źjaviŭsia kala płota vinzavoda. U listapadzie 2009 jaho ablili zialonaj farbaj. Vinavatym pryznali aktyvista Chryścijanskaj demakratyi pradprymalnika Juryja Kazaka.

Niaśviž

U pačatku 2000-ch pry sprobie pieranosu byŭ razburany hipsavy Lenin. Jon stajaŭ nasuprać hałantarejnaj kramy «Nadzieja». Miascovyja žartavali, što zimoj Iljič asabliva simvalična vyciahvaŭ ruku da kramy, niby prasiŭ «Nadzieju Kanstancinaŭnu» prynieści jamu ciopłuju šapku.

Lenina taki adnavili. Pa-farbavali ŭ bronzu i pastavili ŭ inšym miescy.

Kareliččyna

U susiednich Kareličach pomnika Leninu niama. Zatoje biustaŭ pravadyru poŭna ŭ navakolnych vioskach. Da apošniaha pra ich pilna kłapacilisia miascovyja sielsaviety. U vioscy Krasnaje biust źjaviŭsia ŭžo pa razvale SSSR — staršynia kałhasa, mabyć, usio jašče nie vieryŭ u krach impieryi i pierastrachavaŭsia. Hipsavy Iljič uziraŭsia ŭ vitrynu viaskovaj kramy da 2010-ha, kali vioska kančatkova pieratvaryłasia ŭ ahraharadok. Biust adnieśli na školny dvor, a potym śpisali.

Lida

U 2006-m tut spačatku demantavali, a paśla adnavili adzin z apošnich u horadzie pomnikaŭ Leninu. Statuja stajała pierad budynkam byłoha Doma aficeraŭ. Paśla rekanstrukcyi płoščy jaje pieranieśli, jak i ŭ Navahrudku, u inšaje miesca. Inšyja pomniki abo źnikli, abo byli razburanyja praciŭnikami kamunistyčnaj spadčyny na pačatku niezaležnaści.

Žodzina

U 2007 hodzie nieviadomyja razburyli adzin z dvuch pomnikaŭ Leninu. Zdaryłasia heta pierad dniom horada. Pavodle milicyi, pomnik buryli «z dapamohaj ciažkich tupych pradmietaŭ». Druhi pomnik, raźmieščany kala Pałaca kultury BiełAZa, źniščyli raniej. Jaho ŭzarvali z dapamohaj vybuchoŭki.

U susiednim Barysavie kolki hod tamu miascovy žychar paškodziŭ pastamient, na jakim staić pomnik Leninu. Mužčynu pamiaścili ŭ psichijatryčnuju lakarniu. A pomnik dahetul nie adramantavali.

Homielščyna

U 2009 u haradskim pasiołku Uvaravičy bietonnym pomnikam Leninu zacisnuła 21-hadovaha chłopca. Jon uskaraskaŭsia na statuju i chacieŭ pavisnuć na ruce pravadyra. Ale pomnik abrynuŭsia. Miascovyja ŭłady chacieli adnavić «pomnik-zabojcu», ale rezanans u presie prymusiŭ ich admovicca ad hetych płanaŭ. Pomnik kančatkova źnieśli.

Słonim

Usie šancy viarnucca na raniejšaje miesca maje adzin z čatyroch pomnikaŭ Leninu ŭ Słonimie. Jak varyjant — raźmiaščeńnie na novym miescy. Demantavali jaho ŭ sakaviku hetaha hoda. Miesca, dzie jon stajaŭ, pradali pryvatniku. Ramantavać i ŭstaloŭvać pomnik jon budzie za svoj košt. Biznesoŭca heta nie tolki nie biantežyć — jon z nastalhijaj zhadvaje časy svajho pijanierstva i zusim nie suprać bačyć Lenina z voknaŭ ofisa.

Hladzi taksama: Kalakin: Dla biełarusaŭ Lenin źjaŭlajecca vialikim čałaviekam

• 0
• 0
• 0
• 0
• 0
• 0
• 0
• 0