Ich noravy
U budynku sudu 9 sakavika čałaviek u cyvilnym, adpichvajučy žurnalistaŭ, udaryŭ nahoj fotakarespandentku hazety «Naša Niva» Juliju Daraškievič .
Zatrymany piaciklaśnik
9 sakavika ŭ Miensku milicyjanty zatrymali piaciklaśnika Piatra M. : viartajučysia z škoły ź siabrami, jon nalapiŭ na lichtarny słup nalepku «Svaboda». Milicyjant zavioŭ chłopčyka ŭ pastarunak. Zamknuŭšy dźviery i łajučysia matam, milicyjanty zabrali ŭ školnika ŭsie nalepki.
Dni biełaruskaj kultury — heta teraryzm
U noč na 8 sakavika milicyjanty nia vypuścili ŭ Polšču hrupu studentaŭ, jakaja miełasia jechać u Krakaŭ na Dni biełaruskaj kultury. Zranku 9 sakavika ŭ prakuraturu telefanavańniem zaprasili arhanizatara pajezdki Dzianisa Dzianisava dla tłumačeńniaŭ. Rabotniki prakuratury zajavili, što majuć infarmacyju: Dzianisaŭ zajmajecca ŭ Krakavie padrychtoŭkaj terarystaŭ.
Rektar Baranavickaha ŭniveru lutuje
Z Baranavickaha dziaržaŭnaha ŭniversytetu 11 sakavika adličanyja moładzievyja aktyvisty Andrej Juruć i Viktar Kiśluk . Aficyjnaja pryčyna — parušeńnie ŭnutranaha rasparadku. Studenty kažuć, što jany pakłali ŭ aŭdytoryi aficyjna vydadzienuju ŭlotku A.Kazulina, atrymanuju napiaredadni padčas sustrečy ź im.
Tolki padnimi ściah
13 sakavika ŭ Miensku prajšli sudy nad biełaruskimi i ŭkrainskimi hramadzianami, zatrymanymi napiaredadni padčas sustrečy kandydata ŭ prezydenty Alaksandra Milinkieviča z vybarcami. Padčas chapuna zatrymali žurnalistku ŭkrainskaha 5-ha telekanału Hannu Haraženku padčas žyvoha eteru, adpuścili jaje tolki paśla ŭmiašalnictva polskich dyplamataŭ.
Moładzievy aktyvist Michaił Vołčak asudžany na 12 sutak aryštu za «drobnaje chulihanstva»: chłopca źbili pry zatrymańni, złamali palec na ruce. Z zali sudu dastaŭleny z temperaturaj u bolnicu, dzie jamu admovili ŭ špitalizacyi.
Za parušeńnie paradku praviadzieńnia masavych mierapryjemstvaŭ asudžanyja Alaksandar Hojšyk (15 sutak), Pavał Kiruščanka, Siarhiej Łaŭrenkin, Maćviej Čyścik (pa 10 sutak), Illa Pietraviec (8 sutak), Uładzimier Vysocki, Ivan Ščarbakoŭ (pa 3 sutak), Uładzimier Vałodzin (štraf u 30 b.v.), Siaržuk Mackojć, Aleh Łaryčaŭ (pa 20 b.v.). Źmicier Fabišeŭski dastaŭ 10 sutak aryštu za raspaŭsiud ahitacyjnych materyjałaŭ, što sudździa Natalla Pratasavickaja kvalifikavała jak drobnaje chulihanstva. Hramadzianie Ŭkrainy Natalla Kasarčuk, Mikoła Karpinski, Anatol Jacenka asudžanyja na 10 sutak aryštu kožny. Niepaŭnaletniaha Cimura Lićvina biełaruskija ŭłady vydali supracoŭnikam ukrainskaj ambasady. Siarod zatrymanych hramadzianaŭ Ukrainy nazyvajuć taksama Arcioma Bažeńskaha i Ihara Hałubickaha , ź biełarusaŭ — Valancina Sakałoŭskaha, Alaksandra Makajeva .
Preventyŭnyja aryšty ŭ Miensku
8 sakavika paśla sustrečaŭ Milinkieviča z vybarcami zatrymali Vincuka Viačorku, Alaksandra Ziałko, Sieržuka Lanceviča, Arcioma Lićvinku (chvoraha na astmu), Źmitra Kudraŭcava, Alaksandra Paŭłoŭskaha, Piatra Babareku, Uładzimiera Hrydzina . Na nastupny dzień ich asudzili na 15 sutak aryštu.
Try supracoŭniki pałka milicyi specyjalnaha pryznačeńnia ŭ cyvilnym (Jury Aksiuta, Alaksiej Ivanoŭ i Siarhiej Žur) zatrymali 10 sakavika deputata Viarchoŭnaha Savietu CHII sklikańnia, adnaho ź lideraŭ rabočaha ruchu Siarhieja Antončyka razam z synam Alaksandram . Ich źvinavacili, što brydkasłovili na vulicy dy nie padparadkoŭvalisia milicyjantam, i asudzili na 15 sutak aryštu. Za kraty S.Antončyk nakiravaŭsia z cełym pakietam lekaŭ: u jaho chvoraje serca.
13 sakavika byŭ zatrymany žurnalist Andrej Pačobut .
Moładzievaha aktyvista Alaksieja Šydłoŭskaha zatrymali 8 sakavika padčas razdačy nalepak. Doma ŭ jaho praviali pieratrus: šukali «bombu».
10 sakavika ź Mienskaha politechničnaha kaledžu vyklučyli moładzievaha aktyvista Barysa Hareckaha , studenta-vydatnika 3-ha kursu adździaleńnia mikraelektroniki. Administracyja kaledžu spasłałasia na toje, što treciakurśnik parušyŭ praviły ŭnutranaha raspadradku: jaho aryštavali na 15 sutak za ŭdzieł u akcyi Dzień salidarnaści 16 lutaha. Nieaficyjna ž paviedamili, što zahad na adličeńnie pryjšoŭ z Kamitetu dziaržaŭnaj biaśpieki. U hety ž dzień aŭtamabil, u jakim jechaŭ B.Harecki ź Jaŭhienam Sakałovym , zatrymali supracoŭniki milicyi: abviaścili, što šukajuć zbroju j narkotyki. Chacia ŭ mašynie nie znajšli ničoha kryminalnaha, chłopcaŭ zavieźli ŭ pastarunak, dzie trymali niekalki hadzinaŭ.
10 sakavika milicyjanty zatrymali moładzievaha aktyvista Alaksieja Laŭkoviča, Paŭła Juchnieviča i Maksima Viniarskaha . Laŭkoviča asudzili na 15 sutak, źvinavaciŭšy ŭ drobnym chulihanstvie.
9 sakavika nieviadomyja schapili ŭ Miensku niepaŭnaletniaha aktyvista Antona Akuliča z Barysava padčas raspaŭsiudu ahitacyjnaj litaratury: jaho zapchnuli ŭ čyrvonaje «pežo» i źvieźli ŭ Zavodzki RUUS, dzie źbivali (bili ŭ soniečnaje splacieńnie). Adpuścili Antona tolki praz 6 hadzinaŭ.
Paŭła Davidoviča zatrymali 11 sakavika ŭ centry Miensku. Va ŭskrainnym mikrarajonie Sucharava ŭ hety ž dzień zatrymali Alesia Zarambiuka z Mastoŭ, Siarhieja Marčyka z Baranavičaŭ i Źmitra Macielskaha z Barysava, aktyvistaŭ hrupy Milinkieviča: na ich skłali pratakoły za rasklejku ahitacyi ŭ nie pryznačanych dla hetaha miescach.
11 sakavika kala stancyi metro «Instytut kultury» zatrymanyja moładzievyja aktyvistki Julija Haračka i N. padčas razdačy ahitacyjnaj litaratury. Dziaŭčat dastavili ŭ milicyju metrapalitenu, dzie skłali na ich administracyjnyja pratakoły za «niezakonny raspaŭsiud drukavanych vydańniaŭ».
U Miensku 13 sakavika moładzievaha aktyvista Aleha Łabataha, zatrymanaha napiaredadni, asudzili na 3 sutak: jaho źvinavacili, što niecenzurna łajaŭsia ŭ hramadzkim miescy.
…i ŭ Kalinkavičach
U Kalinkavičach 9 sakavika byli zatrymanyja i asudžanyja na 15 sutak «za chulihanstva» Alaksiej Manievič i Dzianis Rabianok , aktyvisty A.Milinkieviča. U sudzie źvinavačanyja zajavili, što milicyjanty sami spravakavali bojku: nieviadomyja abkidali ich śniežkami, a milicyjanty zatrymali chłopcaŭ, jakija nibyta pačali brydka łajacca.
Bieraście
U pamiaškańni štabu A.Milinkieviča 7 sakavika aktyvisty znajšli padsłuchoŭvalnuju aparaturu: pra jaje znachodžańnie daviedalisia z ananimnaha lista, padpisanaha supracoŭnikami KDB.
Andreja Šarandu i Alesiu Chudasoŭcavu , ahitataraŭ za A.Milinkieviča, 6 sakavika zapałochvali milicyjanty: źvinavačvali, što «raźmiaščajuć ahitacyjnyja materyjały ŭ nienaležnych miescach», chacia ahitatary razdavali materyjały.
7 sakavika na hrupu ahitataraŭ za A.Milinkieviča (Iryna Łaŭroŭskaja, Kanstancin Turčaniak, Siarhiej Vakulenka, Ściapan Navasielčan, Alaksandar Dzienisienka, Koŭš i inš.) napała achova Bieraściejskaha politechničnaha ŭniversytetu i stała bić. Ahitatary vyklikali milicyju.
I.Łaŭroŭskuju j K.Turčaniaka , ahitataraŭ za A.Milinkieviča ŭ Bieraści, zatrymali jašče j 9 sakavika.
Žłobin
Milicyjanty spynili 6 sakavika aŭtamabil Viktara Karniajenki j kanfiskavali 28 tys. ulotak A.Milinkieviča, zajaviŭšy, što słohan «Milinkievič — budučy prezydent» «parušaje vybarčaje zakanadaŭstva».
Mahiloŭ
7 sakavika na čyhunačnym vakzale milicyjanty zatrymali Vitala Vasilkova , źvinavaciŭšy jaho ŭ pieravozie falšyvych dalaraŭ. Falšyvych nie znajšli, zatoje kanfiskavali ŭsie najaŭnyja.
Paśla sustrečy z vybarcami 7 sakavika Anatola Labiedźku aštrafavali na 50 bazavych vieličyniaŭ (1 młn 550 tys.), a Ŭładzimiera Šancava , kiraŭnika abłasnoha štabu Milinkieviča, aryštavali na 15 sutak.
Moładzievaha aktyvista Artura Badajeva 9 sakavika adličyli z 4-ha kursu Mahiloŭskaha politechničnaha kaledžu. Aficyjnaja pryčyna — «akademičnaja niepaśpiachovaść»: Arturu nie dali mahčymaści zdać piśmovyja raboty. Aktyvist kaža, što na jaho cisnuli supracoŭniki KDB, namaŭlajučy na supracu. Jon admoviŭsia ad verboŭki i byŭ adličany z kaledžu.
11 sakavika milicyja praviarała ŭsie mašyny, jakija jechali z Voršy na Mahiloŭ. U samim horadzie dvojčy zatrymlivali aktyvista BSDP (Hramada) Mikałaja Rasiuka : za toje, što nios niedziaržaŭnuju hazetu «Narodnaja vola» i za toje, što ahitavaŭ za A.Kazulina na pryvakzalnym rynku.
12 sakavika milicyjanty zatrymali Irynu Kačarovu j Eduarda Abakanoviča , jakija rasklejvali plakaty kandydata ad abjadnanaj apazycyi na reklamnych tumbach. Milicyjanty zajavili, što Mahiloŭski harvykankam dazvoliŭ rasklejvać plakaty tolki ŭ miescach, vyznačanych dla sustrečaŭ z vybarcami, i skłali administracyjny pratakoł na aktyvistaŭ. Padčas razdačy ahitacyjnych ulotak 12 sakavika byli zatrymanyja Dana Smyčkova, Alena Łaŭrynovič, Siaržuk Niahacin i Siaržuk Hirkin .
Presa
Smalenskaja drukarnia 13 sakavika admoviła ŭ druku hazetam «Narodnaja vola», «Tovariŝ», «BDH. Diełovaja hazieta», spasłaŭšysia na ekanamičnyja pryčyny. Raniej pad ciskam biełaruskich uładaŭ byli źniatyja bihbordy z partretam A.Milinkieviča, vystaŭlenyja z rasiejskaha boku miažy.
Vyšejšy haspadarčy sud prypyniŭ vychad hazety «Zhoda» jašče da sudovaha pracesu. Zroblena heta na patrabavańnie Ministerstva justycyi, jakoje paličyła, što hazeta moža da sudu «hruba parušyć patrabavańni Zakonu ab druku».
Palitviaźni
7 sakavika stała viadoma, što palitviazień Siarhiej Skrabiec patrapiŭ u turemny špital u Miensku: pačaŭsia prystup padahry.
Palitviaźnia Andreja Klimava , jaki adbyvaje termin abmiežavańnia voli ŭ vioscy Barščoŭka Rečyckaha rajonu, 13 sakavika asudzili na 7 sutak aryštu, źvinavaciŭšy ŭ abrazie rabotnikaŭ prakuratury. Palitviazień miarkuje, što heta zroblena z bojazi, što jon uciače ŭ Miensk na 19 sakavika.
Viciebsk
8 sakavika milicyjanty zatrymali Arcioma Chadyku i Aleha Sidarava — ahitataraŭ za A.Milinkieviča. Chrystaforu Žalapavu, jaki pryjechaŭ vyzvalać junakoŭ, milicyjanty paviedamili, što ich zaprasili na razmovu.
U Viciebsku sud 9 sakavika aštrafavaŭ Barysa Chamajdu pa dźviuch administracyjnych spravach. Za parušeńnie praviłaŭ pradprymalnickaj dziejnaści (jon pradavaŭ niezaležnyja hazety) — štraf u 21 b.v. Za paŭtornaje na praciahu hodu parušeńnie paradku praviadzieńnia hramadzkich mierapryjemstvaŭ —151 b.v.: u vieraśni jaho zatrymali za pikiet da Dnia biełaruskaj vajskovaj słavy, a 22 lutaha — za pikiet, jaki zaklikaŭ da bajkotu prezydenckich vybaraŭ.
10 sakavika ŭ Čyhunačnym sudzie Viciebsku Chamajdu aštrafavali jašče na 16 b.v. za vychad ź plakatam «Bajkot — naša maralnaja pieramoha». U sumie štraf składaje blizu 6 młn rub.
U Viciebskim dziaržuniversytecie 10 sakavika zatrymali na piać hadzinaŭ junakoŭ Vitala Broŭku i Dzianisa Dzianisava . Voś jak apisvaje padziei kiraŭnik vybarčaha štabu Milinkieviča pa Viciebščynie Chrystafor Žalapaŭ. Dekan fakultetu biełaruskaj kultury Viciebskaha dziaržaŭnaha ŭniversytetu imia Mašerava Viktar Nieściarovič a 16-j u aŭdytoryi 212 hałoŭnaha korpusu VdU pravodziŭ sa studentami 4—5 kursu sustreču, pryśviečanuju vybaram prezydenta. Na sustrečy V.Nieściarovič abviaściŭ, što ŭsie studenty pavinny prahałasavać da 17 sakavika 2006 h.
Na hetaj sustrečy prysutničali pradstaŭniki pieradvybarnaha štabu Milinkieviča Vital Broŭka i Dzianis Dzianisaŭ, jakija ŭkazali dekanu na niepravamocnaść jaho dziejańniaŭ. U adkaz Nieściarovič vyklikaŭ milicyju i da jaje prybyćcia pry sadziejničańni supracoŭnikaŭ Słužby paradku VDU i pieršaha prarektara Andruškieviča ŭtrymlivaŭ Dz.Dzianisava i V.Broŭku. Supracoŭniki abjadnańnia «Achova» Pieršamajskaha rajonu Viciebsku, što prybyli va ŭniversytet, vyśvietlili asoby V.Broŭki i Dz. Dzianisava i zajavili, što nia majuć da zatrymanych pretenzij i padstaŭ dla zatrymańnia, pakolki ŭ ich dziejańniach niama składu pravaparušeńnia. Adnak V.Nieściarovič nastojvaŭ na zatrymańni i napisaŭ zajavu, dzie abvinavaciŭ V.Broŭku i Dz.Dzianisava ŭ dziejańniach chulihanskaha charaktaru, jakija prajavilisia ŭ parušeńni hramadzkaha paradku. U vyniku V.Broŭku i Dz.Dzianisava ŭsio-taki zatrymali i pratrymali šeść hadzin u Pieršamajskim RUUS.
Masty
7 sakavika deputat Mastoŭskaha rajsavietu A.Zarambiuk atrymaŭ paviedamleńnie z sudu, što jaho zavočna asudzili j aštrafavali na 10 b.v. (310 tys.). Za kanfiskavanyja kalandaryki z partretam Milinkieviča jaho źvinavacili ŭ parušeńni vybarčaha zakanadaŭstva, bo na čas kanfiskacyi (12 studzienia) Milinkievič jašče nia byŭ zarehistravany kandydatam u prezydenty.
SudnadKazakovym i Zubrom
U Miensku 9 sakavika pačaŭsia sud nad moładzievymi aktyvistami z Barysava Alaksandram Kazakovym i Źmitrom Zubrom , źvinavačanymi ŭ supracivie milicyjantam. Pakolki Z.Zubro chvareje i nia moža ŭdzielničać u pracesie, sud byŭ pieraniesieny na 7 krasavika.
Babrovičy, Kalinkavicki rajon
Na hramadzkaha aktyvista Kanstancina Kavaleniu z pasiołku Babrovičy Kalinkavickaha rajonu 9 sakavika zaviali kryminalnuju spravu pavodle art.206 č.1 («Adkrytaje vykradańnie majomaści»). Invalida III hrupy vinavaciać u tym, što jon nibyta skraŭ rovar u pradstaŭnicy miascovaj vertykali Valanciny Purachoŭskaj. «Śviedki» kažuć, što bačyli čałavieka, «padobnaha da Kavaleni», jaki ciahnuŭ na sabie rovar, tym časam jak Kavaleniu nielha padymać rečy, ciažejšyja za 5 kh. Na žonku i syna aktyvista, jakija davodzili śledztvu, što źvinavačany mieŭ alibi, raspačali kryminalnuju spravu za «iłžyvyja śviedčańni». Kavalenia kaža, što presynh pačaŭsia paśla taho, jak jon zajaviŭ Purachoŭskaj, što zrobić usio, kab jana nia stała staršynioj učastkovaj vybarčaj kamisii.
Masty
Na hramadzkaha aktyvista Andreja Panasika z Mastoŭ rajonnaja prakuratura 10 sakavika raspačała kryminalnuju spravu: jaho vinavaciać u prynaležnaści da niezarehistravanaj arhanizacyi «Partnerstva».
Ščučyn
11 sakavika ŭ Ščučynie na dopyt vyklikali Vasila Biaźmiena jak śviedku ŭ kryminalnaj spravie Siarhieja Laškieviča , jakoha vinavaciać u arhanizacyi terarystyčnych hrupaŭ. Samomu Laškieviču pryjšła pozva ŭ vajenkamat na 20 sakavika — na medahlad, choć jon źniaty z vajskovaha ŭliku pavodle ŭzrostu.
Žłobin
Kryminalnuju spravu sprabujuć zavieści na moładzievaha aktyvista z Žłobina Edvarda Zielankova : jaho vinavaciać u hrafici na budynkach. 13 sakavika jaho vyklikali na administracyjnuju kamisiju, dzie paviedamili, što materyjałam spravy zajmajecca KDB.
Homiel
9 sakavika na Aleha Šabietnika , aktyvista homielskaha vybarčaha štabu A.Kazulina, milicyjanty skłali administracyjny pratakoł za parušeńnie paradku ahitacyi: 8 sakavika jon z hrupaj aktyvistaŭ razdavaŭ hamialčankam vinšavańni ad imia kandydata ŭ prezydenty kala ŭnivermahu «Homiel».
Milicyjanty 9 sakavika zatrymali ahitataraŭ Kaciarynu Cieraškovu i Ŭładzimiera Šumilina , jakija razdavali buklety A.Milinkieviča: na ich skłali pratakoły za parušeńnie vybarčaha zakanadaŭstva.
Barysaŭ
U Barysavie padčas raspaŭsiudu ahitacyjnaj litaratury 7 sakavika Jany pryjšli dadomu da Ivana Romana i da Anatola Chaćka , adnak prysutnyja nie puścili milicyjantaŭ.
Biaroza
Sud Biarozaŭskaha rajonu 9 sakavika pakaraŭ Łarysu Mažejku , źbiralnicu podpisaŭ za A.Kazulina, štrafam u 3 b.v. Padstavaj stała paviedamleńnie rajonnaj vybarčaj kamisii: u časie pravierki podpisaŭ kamisija nibyta daviedałasia, što 2 podpisy byli sabranyja ludźmi, jakija nie ŭvachodziać u inicyjatyŭnuju hrupu.
10 sakavika z analahičnaha abvinavačańnia na 5 b.v. aštrafavali Alaksandra Kuźmina , źbiralnika podpisaŭ za A.Kazulina. Zasłuchanaja na sudzie śviedka paviedamiła, što nia pamiataje, chto kankretna źbiraŭ podpisy, ale pryjści joj parekamendavali rabotniki idealahičnaha adździełu Biarozaŭskaha rajvykankamu.
Połacak
10 sakavika słužba achovy Połackaha ŭniversytetu zatrymała vykładčyka Alaksieja Kavalova j Alaksieja Trubkina , jakija razdavali studentam pieradvybarčuju prahramu A.Milinkieviča. A.Kavalova rektar Dźmitry Łazoŭski abvinavaciŭ u złoŭžyvańni słužbovymi paŭnamoctvami j pazbaviŭ premii za sakavik. A.Trubkina dastavili ŭ pastarunak, adkul adpuścili, pierakanaŭšysia, što parušeńnia zakonu niama.
Vybarčyja kamisii ŭ Navapołacku 13 sakavika admovili ŭ rehistracyi naziralnikam Michaiłu Čadajevu i Valeru Šaŭčenku (HA «Biełaruski respublikanski klub vybarcaŭ»).
Mazyr
10 sakavika padčas rasklejki plakataŭ Milinkieviča milicyjanty zatrymali Ryhora Kryvickaha i Ŭładzimiera Cielepuna : ich vinavaciać u tym, što kleili plakaty ŭ «nienaležnym miescy» — na prypynku.
Asipovičy
Alenu Miadźviedzievu j Irynu Michałap , ahitatarak za A.Kazulina, zatrymali 10 sakavika kala harvykankamu, kali jany razdavali aficyjna vydadzienyja pieradvybarčyja ŭlotki. Niadoŭha pratrymaŭšy ŭ pastarunku, ich usio ž adpuścili.
11 sakavika ŭ pastarunak patrapiŭ aktyvist BNF Ihar Simbiroŭ , jaki viartaŭsia dadomu paśla pracy ŭ Maskvie: jaho padazravali, što pryvioz hrošy ŭ rehijanalny štab A.Milinkieviča. Adnak znajšli tolki nalepki z partretam kandydata ŭ prezydenty. Simbiroŭ paśpieŭ zatelefanavać siabram i skazać, što jaho zapałochvajuć, bjuć, nie dajuć vady. Jaho zasudzili na 10 sutak aryštu, źvinavaciŭšy, što skandaliŭ u ciahniku.
Horki
10 sakavika ŭ Horkach milicyjanty zatrymali aktyvista KCHP—BNF, pratestanta Piatra Małanačkina : jon padavaŭ zajaŭku na pikiet pažyłych žycharoŭ suprać dziejańniaŭ kamunalnych słužbaŭ i haradzkich uładaŭ. Zajaŭnika zatrymali, u kvaterach mnohich z udzielnikaŭ adbylisia pieratrusy biaz sankcyi prakurora. 11 sakavika Horacki rajonny sud vynies Małanačkinu papiaredžańnie.
U Horkach 12 sakavika milicyjanty kanfiskavali ahitacyjnuju litaraturu (ulotki j plakaty A.Milinkieviča i A.Kazulina, numary hazety «Narodnaja vola»), što naležała miascovamu aktyvistu Eduardu Brokaravu , jaki zachoŭvaŭ jaje ŭ haražy svajho znajomca. Haraž byŭ uzłamany tryma milicyjantami i nieviadomym supracoŭnikam u cyvilnym.
Babrujsk
10 sakavika kala štabu adzinaha zatrymali deputata harsavietu Alesia Čyhira (kiraŭnika štabu) i jašče troch aktyvistaŭ. Ich vypuścili z pastarunku praz hadzinu, nia vystaviŭšy abvinavačańniaŭ. Pa niekatorym časie hetaksama zatrymali hrupu na čale z aktyvistam Partyi BNF Dzianisam Šejkam .
11 sakavika zatrymali A.Čyhira, Mikitu Bucenku dy troch pradstaŭnikoŭ BNF i niezarehistravanaj Partyi svabody i prahresu, jakija ahitavali za A.Milinkieviča: milicyjanty praviarali zakonnaść nadrukavanych ulotak.
Aktyvista Partyi BNF Ihara Chodźku 11 sakavika milicyjanty zatrymali j praviali nadhlad jahonych rečaŭ, spasłaŭšysia na toje, što adbyŭsia kradziež i šukajuć złodzieja.
Štraf za schod na kvatery
9 sakavika pieršy namieśnik staršyni Biełaruskaj sacyjał-demakratyčna partyi (Hramady) Anatol Laŭkovič atrymaŭ paviedamleńnie, što jon aštrafavany na 150 b.v. 21 lutaha ŭ Homieli jon sustrakaŭsia na pryvatnaj kvatery z aktyvistami partyi, kali tudy ŭvarvalisia milicyjanty, a da padjezdu padahnali 7 milicejskich aŭtamabilaŭ. Milicyjanty patłumačyli, što šukajuć vijetnamcaŭ-nielehałaŭ, i pierapisali pašpartnyja źviestki ŭsich prysutnych, a na Laŭkoviča raspačali administracyjnuju spravu za niesankcyjavany schod. Choć 27 lutaha A.Laŭkovič źviarnuŭsia ŭ prakuraturu z skarhaj na niezakonnyja dziejańni milicyi, homielskuju sudździu M.Damnienku heta nie spyniła: 2 sakavika ŭ adsutnaść A.Laŭkoviča jana razhledzieła administracyjnuju spravu i pakarała jaho štrafam.
Krupki
U vioscy Dakudava Krupskaha rajonu na nastaŭnika Vasila Łapacina 10 sakavika zaviali administracyjnuju spravu i abvinavacili ŭ antysanitaryi: jon raźviesiŭ 6 abviestak pra sustreču z aktyvistam štabu A.Milinkieviča, lideram Abjad- nanaj hramadzianskaj partyi Anatolem Labiedźkam. Kab asudzić, prydumali taki dovad: «vioska nia ŭniesienaja rajonnym načalstvam u śpis nasielenych punktaŭ, dzie možna sustrakacca z udzielnikami prezydenckaj kampanii».
Rečyca
13 sakavika ŭ Rečycy pačaŭsia sud nad Valerjem Pucickim , aktyvistam kampanii A.Milinkieviča. Jaho zatrymali 12 sakavika, źvinavacili ŭ drobnym chulihanstvie. Sudovy praces adkłali da 17 sakavika praz adsutnaść śviedkaŭ.
Pieraśled za vieru
Na japiskapa Sajuzu chryścijanaŭ viery Evanhielskaj pa Mienskaj vobłaści Siarhieja Cvora na pačatku sakavika skłali pratakoł za niesankcyjavanaje bohasłužeńnie (biez dazvołu vykankamu). S.Cvoru pahražaje štraf ad 30 da 150 b.v. albo źniavoleńnie ad 3 da 15 sutak.
Drahičyn
11 sakavika Vasila Prakopčyka , ahitatara za A.Milinkieviča, zatrymali padčas raspaŭsiudu infarmacyi pra sustreču z kandydatam u prezydenty. Na jaho skłali administracyjny pratakoł za antysanitaryju i trymali ŭ pastarunku 5 hadzinaŭ.
Sud spałochaŭsia
Sud Maskoŭskaha rajonu 13 sakavika admoviŭsia razhladać spravy Mikałaja Ciaciorkina, Siarhieja Kastylenki, Ivana Łabačova, Uładzimiera Kazulina , aktyvistaŭ štabu kandydata ŭ prezydenty A.Kazulina, zatrymanych 2 sakavika. Sudździa Nadzieja Ravuckaja zajaviła im, što nie vyklikała (chacia va ŭsich na rukach byli pozvy). Staršynia sudu Anatol Savič admoviŭsia razhladać spravy, spasłaŭšysia, što dakumenty aformleny niapravilna.
Pinsk
Pinski haradzki sud 13 sakavika admoviŭ Alaksandru Aŭsiejenku : aktyvist štabu A.Milinkieviča damahajecca skasavańnia papiaredžańnia, jakoje vynies jamu harvykankam padčas zboru podpisaŭ. Aŭsiejenku źvinavacili, što zaminaŭ chadzić pa vulicy dy śmieciŭ. Dniami sud aštrafavaŭ jaho jašče j na 4 b.v. za parušeńnie vybarčaha zakanadaŭstva padčas zboru podpisaŭ. Aktyvist maje skardzicca ŭ Bieraściejski abłsud.
Nie puścili
Deputatam Eŭraparlamentu , jakija chacieli pryjechać u Miensk nazirać za vybarami, biełaruskija ŭłady 13 sakavika admovili ŭ vydačy vizaŭ.
AŠ
❏
Lubań
U Lubani 12 sakavika padčas razdačy «Narodnaj voli» j ahitacyjnych ulotak A.Milinkieviča kala haradzkoha rynku byli zatrymanyja moładzievyja aktyvisty Źmicier Jefimovič, Viačasłaŭ Hurlenia, Ivan Šyła. Milicyjanty zajavili, što chočuć vyśvietlić asoby zatrymanych, chacia aktyvisty adrazu pakazali im pašparty. Pratrymali chłopcaŭ 1,5 hadziny, ale vypuścili, nie składajučy pratakołaŭ, i navat viarnuli ŭsiu drukavanuju pradukcyju.
Bierazino
U Bierazinie 13 sakavika milicyjanty-aŭtamatčyki zatrymali Andreja Skarabahatava, jaki rasklejvaŭ abviestki pra sustreču z Anatolem Labiedźkam, davieranaj asobaj A.Milinkieviča. Milicyjanty zajavili, što abviestki niezakonnyja, i zavieźli aktyvista ŭ pastarunak. Adnak tam było vyrašana, što ničoha niezakonnaha ŭ abviestkach niama.
Vypuścili pad zakład
Antona Filimonava, syna zabitaj žurnalistki Vieraniki Čarkasavaj, 13 sakavika vypuścili pad zakład. Ad 30 śniežnia 2005 h. Antona, nie zvažajučy na chraničnyja zachvorvańni, trymali ŭ mienskim SIZA №1 pa abvinavačańni ŭ padrobcy hrošaj.
Chvala preventyŭnych zatrymańniaŭ u aŭtorak
14 sakavika pa Biełarusi prakaciłasia čarhovaja chvala aryštaŭ i zatrymańniaŭ aktyvistaŭ vybarčaj kampanii.
U Bieraści zatrymali Ściapana Navasialčana, davieranuju asobu A.Milinkieviča: śpiarša jamu zajavili, što niapravilna pryparkavaŭ aŭtamabil, ale ŭ pastarunku abvinavacili ŭ supracivie milicyjantam. Sud pryznačyŭ Navasialčanu 10 sutak aryštu. Irynu Łaŭroŭskuju j Ihara Dziemidoviča, ahitataraŭ za A.Milinkieviča, zatrymali padčas raspaŭsiudu ahitacyjnaj litaratury j skłali administracyjnyja pratakoły.
U Horadni sudździa Natalla Kozieł asudziła na 7 sutak aryštu moładzievaha aktyvista Maksima Hubareviča, zatrymanaha napiaredadni ŭviečary: milicyjanty, jakija jaho zatrymali, zajavili ŭ sudzie, što chłopiec niecenzurna łajaŭsia na vulicy.
U Viciebsku Barysu Chamajdu prysudzili štraf u 160 b.v. (4 młn 960 tys. rub.) za vuličny pikiet.
U Mahilovie 13 sakavika zatrymali moładzievaha aktyvista Sieržuka Niahacina, kali jon vyjšaŭ z tamtejšaha štabu Milinkieviča: asudžany na 15 sutak aryštu. U pastarunku chłopcu zajavili, što jon łajaŭsia matam. 14 sakavika AMAPaŭcy zatrymali Ryhora Kostusieva, davieranuju asobu A.Milinkieviča, i asudzili na 10 sutak. Abvinavačańni standartnyja — brydkasłoŭje.
U Bieraści 14 sakavika milicyjanty zatrymali kiraŭnika vybarčaha štabu A.Milinkieviča Źmitra Šymanskaha.
❏
U Homieli na 10 sutak zasudzili Siarhieja Siamionava, jaki 12 sakavika na sustrečy z A.Kazulinym zadaŭ pytańnie pra reformu systemy adukacyi MUS. 14 sakavika milicyjanty zabrali Siamionava z pracy, u pastarunku jamu skazali, što jość zajava načalnika ŭpravy idealahičnaj raboty Homielskaha abłvykankamu Anatola Kaciły: maŭlaŭ, Siamionaŭ niecenzurna abraziŭ jaho na toj sustrečy z vybarcami.
Na biełaruska-rasiejskaj miažy kala Dubroŭna biełaruskija mytniki zatrymali śviežy numar niedziaržaŭnaj hazety «Narodnaja vola»: nakład pavieźli ŭ Viciebskuju abłasnuju milicyju. Tamsama trymajuć i nakład papiaredniaha numaru «NV», taksama kanfiskavany pry pierajeździe miažy.
U Horadni na 7 sutak asudzili aktyvista niezarehistravanaha Sajuzu palakaŭ Juzafa Pažeckaha: jaho źvinavacili ŭ drobnym chulihanstvie. Andreja Pačobuta asudzili pa tym samym abvinavačańni na 10 sutak aryštu. U zali sudu Pačobut abvieściŭ suchuju haładoŭku.
U hety ž dzień zatrymanyja pravaabaronca Viktar Sazonaŭ i davieranaja asoba A.Milinkieviča Siarhiej Malčyk: im zakidajuć raspaŭsiud drukavanaj pradukcyi biez vychodnych źviestak.
Na 12 sutak u Miensku zasudzili Andreja Kima, aktyvista kamandy A.Kazulina, zatrymanaha 2 sakavika. Aryštam pakarali 14 sakavika ŭdzielnikaŭ sustrečy z A.Milinkievičam, jakaja prajšła 12 sakavika ŭ Miensku, pradprymalnikaŭ Alaksandra Makajeva (15 sutak) i Alaksandra Prysmakova (10 sutak): ich źvinavacili, što padčas mitynhu jany vykrykvali «antydziaržaŭnyja» lozunhi: «Biełaruś u Eŭropu!» i «Svabodu Biełarusi!». Spravu «zubroŭca» Maksima Viniarskaha razhladali ŭ jahonuju adsutnaść, bo aktyvist u sud nie źjaviŭsia: rašeńnie sudździa maje abvieścić 17 sakavika.
U Navapołackaj himnazii, vyznačanaj harvykankamam jak miesca dla ahitacyi, zatrymali Alaksieja Trubkina, jaki pryjšoŭ, kab vyviesić ahitacyjnyja materyjały.
U Kaściukovičach pa abvinavačańni ŭ raspaŭsiudzie drukavanych materyjałaŭ u niedazvolenym miescy zatrymanyja aktyvisty PBNF Mikałaj Małachaŭ i Ŭładzimier Patapaŭ.
U Rečycy padčas naklejki nalepak A.Kazulina na ahitacyjny stend byŭ zatrymany Aleh Šabietnik: na jaho skłali pratakoł za administracyjnaje pravaparušeńnie.
Štraf dla presy
Sud Klimavickaha rajonu 13 sakavika aštrafavaŭ redaktara niezarehistravanaha vydańnia «Volny horad» Siarhieja Niaroŭnaha na 20 b.v.: jaho źvinavacili, što vyrablaŭ i raspaŭsiudžvaŭ drukavanaje vydańnie zvyš vyznačanaha nakładu. Hazetu zatrymali pry pieravozie z drukarni praz rasiejska-biełaruskuju miažu 13 studzienia: pry dazvolenym nakładzie dla niezarehistravanaha vydańnia milicyjanty naličyli kala 1000 asobnikaŭ hazety.
Tancy na dachu
Na dachu budynku, dzie znachodzicca ofis apazycyjnaj Abjadnanaj hramadzianskaj partyi, u hety ž dzień pracavali ź nieviadomaj aparaturaj ludzi ŭ cyvilnym u supravadžeńni aficera ŭ formie «chaki». Nasuprać budynku ceły dzień stajaŭ mikraaŭtobus z vajskoŭcami (№ 0173 UJE). Na rukavie kiroŭcy — šaŭron «specnaz unutranych vojskaŭ».
Častkovaja spraviadlivaść
Aktyvistu kamandy A.Milinkieviča studentu Jaŭhienu Skrabutanu ŭdałosia častkova damahčysia spraviadlivaści: rašeńnie administracyjnaj kamisii Kastryčnickaha rajonu Horadni, jakaja aštrafavała jaho na 1 b.v. za kalandaryki z partretam kandydata ŭ prezydenty, skasavana.
Za kalandaryki Jaŭhien paciarpieŭ trojčy: aprača administracyjnaj kamisii, jaho pakaraŭ štrafam u 10 b.v. Mastoŭski rajonny sud, a rektar Haradzienskaha ŭniversytetu vyklučyŭ jaho z navučalnaj ustanovy.
Vydalajuć zamiežnikaŭ
Ź Biełarusi pačynajuć departavać zamiežnikaŭ, jakija, nibyta, pryjechali pravodzić ekzyt-poły, bo na praviadzieńnie sacyjalahičnych apytańniaŭ patrabujecca aficyjny dazvoł uładaŭ (takaja norma była ŭviedzienaja na pačatku 2006 h.). Jak paviedamiła pres-słužba AHP, z hatelu «Akvabieł» 10 hramadzianaŭ Danii dastaŭlenyja ŭ milicyju, u ich numarach adbylisia pieratrusy. Jašče adnaho hramadzianina Danii departujuć z Bychava.
U Horadni 14 sakavika supracoŭniki KDB zatrymali hramadzianaŭ Švecyi Ochmana Tomaša i Stenstroma Bjorna: im zahadana pakinuć Biełaruś ciaham 24 hadzinaŭ.
Aktyvistaŭ źbivajuć
U Mahilovie 14 sakavika achoŭniki zavodu «Mahateks» źbili Mikałaja Rasiuka, ahitatara A.Kazulina, za toje, što razdavaŭ rabotnikam zavodu hazetu «Narodnaja vola» i ŭlotki kandydata ŭ prezydenty. U Rasiuka zdaryŭsia sardečny prystup, abaranili jaho rabotniki zavodu.
Mikałaja Vorana ŭ Horadni źbiŭ milicyjant, kali aktyvist razdavaŭ aficyjnyja ŭlotki A.Kazulina kala internatu Haradzienskaha zavodu aŭtaahrehataŭ. Milicyjant niekalki razoŭ udaryŭ aktyvista hałavoj ab ścienku prosta na prachadnoj internatu. Ciapier Voran u bolnicy, kudy jaho zaviezła chutkaja dapamoha. Medyki aceńvajuć jahony stan jak «siaredniaj ciažkaści».
U prakuraturu dva razy ŭ dzień
U Ščučynskuju prakuraturu Siarhieja Laškieviča, aktyvista hrupy A.Milinkieviča, 14 sakavika vyklikali dvojčy, adzin raz — dla vočnaj staŭki. Prakuratura viadzie kryminalnuju spravu pa fakcie «padrychtoŭki terarystaŭ». Uviečary 14 sakavika S.Laškieviča pasadzili ŭ śledčy izalatar.
Žodzina
Unačy na 15 sakavika ŭ Žodzinie byli zatrymanyja moładzievyja aktyvisty Siaržuk Hudzilin, Jaŭhien Vaŭkaviec, Aleś Čyrejka, jakija rychtavali sustreču A.Milinkieviča z vybarcami horadu. Na padjeździe da horadu jany malavali na śniezie nadpisy-pryvitańni demakratyčnamu kandydatu. Žodzinskaja milicyja admaŭlajecca kazać, što inkryminujuć chłopcam i čamu ich trymajuć daŭžej za dazvolenyja zakonam 3 hadziny.
Viciebsk
Unačy na 15 sakavika ŭ Viciebsku byŭ zatrymany moładzievy aktyvist Vital Broŭka pa darozie dadomu. Chłopcu zakidajuć «drobnaje chulihanstva»: niekalki dzion tamu jon prajšoŭ na ahitacyjny schod u Viciebskim universytecie, dzie sprabavaŭ vykazacca ŭ padtrymku Milinkieviča. Znachodžańnie Broŭki nieviadomaje.
Prosta na vybarčym učastku 15 sakavika zabrali naziralnika Valerja Ščukina.
Miensk
Aktyvista pradprymalnickaha ruchu Ihara Lednika 15 sakavika sudździa Centralnaha sudu stalicy Alaksiej Byčko asudziŭ na 10 sutak aryštu. Jaho zatrymali napiaredadni ŭviečary j źvinavacili ŭ niepadparadkavańni supracoŭnikam milicyi.
Bieraście
14 sakavika zatrymali Ihara Dziemidoviča i Andreja Šarendu, aktyvistaŭ štabu A.Milinkieviča: ich źvinavacili ŭ ahitacyi ŭ niedazvolenym miescy. Milicyju vyklikaŭ prakuror, jaki prajaždžaŭ mima ahitataraŭ. Na aktyvistaŭ skłali pratakoł, chacia miesca, dzie jany pravodzili ahitacyju, uvachodzić u aficyjna dazvoleny pieralik.
Na Ryhora Bakijeviča, aktyvista kampanii A.Milinkieviča, uviečary 14 sakavika napaŭ nieviadomy, jaki ŭdavaŭ ź siabie pjanaha. Bakijeviča zabrali ŭ pastarunak i vystavili jamu abvinavačańnie ŭ chulihanstvie.
Sud nad Źmitrom Šymanskim pryznačany na 15 sakavika: jaho zatrymali napiaredadni ŭviečary j abvinavacili ŭ arhanizacyi niesankcyjavanaha schodu. Aktyvista pakinuli na noč pad vartaj, chacia jon i prasiŭ jaho adpuścić dadomu, bo maje małoje dzicia.
Horadnia
Viktara Sazonava, aktyvista štabu A.Milinkieviča, 15 sakavika asudzili na 7 sutak, źvinavaciŭšy ŭ «drobnym chulihanstvie» — «niecenzurnaj łajancy». U zali sudu, kudy nie puskali siabroŭ i svajakoŭ, Sazonaŭ abvieściŭ haładoŭku.
Navapołacak
Alaksieja Trubkina, aktyvista kampanii Milinkieviča, 15 sakavika asudzili na 7 sutak aryštu.
Vorša
15 sakavika aktyvisty, jakija pryjšli ŭ sud padtrymać Vasila Leŭčankava, abvinavačanaha ŭ arhanizacyi niesankcyjavanaha mitynhu, byli vielmi ździŭlenyja: choć u 18.30 napiaredadni sud byŭ adkładzieny da ranicy, u 19.30 aktyvistu štabu Milinkieviča abvieścili prysud — 7 sutak aryštu.
Ukraina non-hrata
Na ŭkrainska-biełaruskaj miažy ŭnačy na 15 sakavika pamiežniki biez tłumačeńnia pryčynaŭ vysadzili zdymačnuju hrupu ŭkrainskaha «5-ha kanału» — žurnalista Andreja Žyhulina i aperatara Vitala Darašenku, nie zvažajučy na akredytacyju MZS Biełarusi.
Zatrymańni moładzi
14 sakavika ŭviečary biez nahody byli zatrymanyja moładzievyja aktyvisty Mikita Sasim, Natalla Uško, Nika Łazoŭskaja, Mikita Šuciankoŭ, jakija stajali kala stancyi metro «Puškinskaja». Za raspaŭsiud hazetaŭ 15 sakavika zatrymanyja Julija Haračka, Daniła Barysievič, Volha Žuraŭlova i Rusłan Maćviejeŭ, za raźviešvańnie džynsavych stužak — Anton Stolar i Volha Sakałova.
Sakałovu i Stolara abvinavacili ŭ drobnym chulihanstvie i zatrymali ŭ pastarunku. Astatnich adpuścili. Tolki Sasim patrapiŭ u bolnicu, dzie jamu 15 sakavika zrabili aperacyju na apendycyt. Ciapier aktyvist lažyć, prykuty da łožka kajdankami.
Kamientary