Выбары ва Украіне: чакаецца трыумф праеўрапейскіх сілаў, разгром кліентаў Масквы
Усе папулярныя партыі выступаюць за адзіную Украіну, інтэграцыю ў Еўропу і супраць Расіі.
Ва Украіне праходзяць датэрміновыя парламенцкія выбары.
Першыя вынікі экзіт-полаў стануць вядомыя а 21-й гадзіне па мінскім часе. Аднак перадвыбарчая сацыялогія дазваляе выказаць меркаванне, што першае месца на выбарах зойме Блок Пятра Парашэнкі (БПП). Выбарчы спіс, створаны папулярным прэзідэнтам, разлічвае прыкладна на 30 працэнтаў галасоў.
За другое месца змагаюцца Народны Фронт Яцанюка-Турчынава і Радыкальная партыя Алега Ляшко (гэта такі ўкраінскі патрыятычны папуліст). У іх можа быць больш за 10 працэнтаў.
Менавіта Народны Фронт мае стаць галоўным партнёрам БПП па будучай урадавай кааліцыі. У яе, пры патрэбе, могуць увайсці таксама блізкія па поглядах «Бацькаўшчына» экс-прэм'ера Цімашэнкі і «Самапомач» мэра Львова Садовага. Яны набіраюць прыкладна па 8—9%.
У той жа час склад кааліцыі залежыць ад вынікаў выбараў у аднамандатных акругах. Ва Украіне палову дэпутатаў абіраюць па прапарцыйнай, партыйнай сістэме, а другую палову — у акругах. На ўсіх мінулых выбарах у мажарытарных акругах масава перамагалі бізнэсоўцы. Раней яны далучаліся да фракцыі Партыі рэгіёнаў. Але гэтым разам яны будуць схільныя ўпісвацца ў БПП. Такім чынам, трэцяга партнёра кааліцыі можа і не спатрэбіцца.
Аднак у таким раскладзе тояцца і свае небяспекі. Дэпутаты-мажарытарнікі ва ўкраінскім варыянце схільныя адстойваць інтарэсы сваіх бізнэс-кланаў, а не дзяржавы. У мінулым гэта непазбежна прыводзіла да карупцыі, якая б партыя ні перамагала.
Хто яшчэ трапіць у Раду? Балансуюць на бар'еры нацыяналістычная партыя «Свабода» (Цягнібок) і «Грамадзянская пазіцыя» экс-міністра абароны Грыцэнкі.
«Правы сектар» не мае шанцаў на перамогу па выбарчых спісах.
Цікава, ці ўдасца перамагчы ў аднамандатнай акрузе камбату Ярашу. Ён балатуецца на сваёй радзіме, у Днепрапятроўскай вобласці.
А што ж з тымі сіламі, якія яшчэ паўгода назад кіравалі (і раскрадалі)?
На абломках былой Партыі рэгіёнаў утварыліся два спісы. Апазіцыйны блок (Бойка, Вілкул, Добкін, Шуфрыч) у Раду праходзіць гарантавана, але ўсяго з 7—8% галасоў. «Моцная Украіна» Цігіпкі балансуе на мяжы 5-працэнтавага мінімальнага бар'ера. Мала шанцаў трапіць у парламент у камуністаў. Разам тры гэтыя сілы набіраюць каля 15% галасоў. Без Крыма і ўсходняга Данбаса яны не маюць шанцаў на большасць.
Дарэчы, выбары не адбудуцца ў 27 акругах з 225. Менавіта такую долю тэрыторыі здолела за паўгода акупаваць Расія. Аднак захапіўшы Крым і Усходні Данбас, Масква адштурхнула ад сябе рэшту Украіны. І зараз у якасці інструмента ўплыву ў яе застаецца толькі газавая труба. Дарэчы, праз тры дні пасля выбараў, 29 кастрычніка, могуць быць падпісаныя часовыя пагадненні аб аднаўленні паставак «Газпромам» газу ва Украіну.
Выбарчая кампанія праходзіць абсалютна свабодна. У выбарчых камісіях на ўсіх узроўнях прысутнічаюць прадстаўнікі кандыдатаў.
Яўка грамадзян можа скласці каля 60%, гэта больш-менш як на апошніх прэзідэнцкіх выбарах.
Перамога праеўрапейскіх сілаў на парламенцкіх выбарах дасць ім карты ў рукі для канчатковага дэмантажу старой сістэмы. Парашэнка ўжо заявіў, што ад панядзелка пачне ўносіць у Раду праекты рэфарматарскіх законаў.
Цяпер чытаюць
Ад прыватнікаў патрабуюць завесці ідэолага ў штаце — распыталі, што робяць кампаніі17
Каментары