Vybary va Ukrainie: čakajecca tryumf prajeŭrapiejskich siłaŭ, razhrom klijentaŭ Maskvy
Usie papularnyja partyi vystupajuć za adzinuju Ukrainu, intehracyju ŭ Jeŭropu i suprać Rasii.
Va Ukrainie prachodziać daterminovyja parłamienckija vybary.
Pieršyja vyniki ekzit-połaŭ stanuć viadomyja a 21-j hadzinie pa minskim časie. Adnak pieradvybarčaja sacyjałohija dazvalaje vykazać mierkavańnie, što pieršaje miesca na vybarach zojmie Błok Piatra Parašenki (BPP). Vybarčy śpis, stvorany papularnym prezidentam, raźličvaje prykładna na 30 pracentaŭ hałasoŭ.
Za druhoje miesca zmahajucca Narodny Front Jacaniuka-Turčynava i Radykalnaja partyja Aleha Laško (heta taki ŭkrainski patryjatyčny papulist). U ich moža być bolš za 10 pracentaŭ.
Mienavita Narodny Front maje stać hałoŭnym partnioram BPP pa budučaj uradavaj kaalicyi. U jaje, pry patrebie, mohuć uvajści taksama blizkija pa pohladach «Baćkaŭščyna» eks-premjera Cimašenki i «Samapomač» mera Lvova Sadovaha. Jany nabirajuć prykładna pa 8—9%.
U toj ža čas skład kaalicyi zaležyć ad vynikaŭ vybaraŭ u adnamandatnych akruhach. Va Ukrainie pałovu deputataŭ abirajuć pa praparcyjnaj, partyjnaj sistemie, a druhuju pałovu — u akruhach. Na ŭsich minułych vybarach u mažarytarnych akruhach masava pieramahali biznesoŭcy. Raniej jany dałučalisia da frakcyi Partyi rehijonaŭ. Ale hetym razam jany buduć schilnyja ŭpisvacca ŭ BPP. Takim čynam, treciaha partniora kaalicyi moža i nie spatrebicca.
Adnak u takim raskładzie tojacca i svaje niebiaśpieki. Deputaty-mažarytarniki va ŭkrainskim varyjancie schilnyja adstojvać intaresy svaich biznes-kłanaŭ, a nie dziaržavy. U minułym heta niepaźbiežna pryvodziła da karupcyi, jakaja b partyja ni pieramahała.
Chto jašče trapić u Radu? Bałansujuć na barjery nacyjanalistyčnaja partyja «Svaboda» (Ciahnibok) i «Hramadzianskaja pazicyja» eks-ministra abarony Hrycenki.
«Pravy siektar» nie maje šancaŭ na pieramohu pa vybarčych śpisach.
Cikava, ci ŭdasca pieramahčy ŭ adnamandatnaj akruzie kambatu Jarašu. Jon bałatujecca na svajoj radzimie, u Dnieprapiatroŭskaj vobłaści.
A što ž z tymi siłami, jakija jašče paŭhoda nazad kiravali (i raskradali)?
Na abłomkach byłoj Partyi rehijonaŭ utvarylisia dva śpisy. Apazicyjny błok (Bojka, Viłkuł, Dobkin, Šufryč) u Radu prachodzić harantavana, ale ŭsiaho z 7—8% hałasoŭ. «Mocnaja Ukraina» Cihipki bałansuje na miažy 5-pracentavaha minimalnaha barjera. Mała šancaŭ trapić u parłamient u kamunistaŭ. Razam try hetyja siły nabirajuć kala 15% hałasoŭ. Biez Kryma i ŭschodniaha Danbasa jany nie majuć šancaŭ na bolšaść.
Darečy, vybary nie adbuducca ŭ 27 akruhach z 225. Mienavita takuju dolu terytoryi zdoleła za paŭhoda akupavać Rasija. Adnak zachapiŭšy Krym i Uschodni Danbas, Maskva adšturchnuła ad siabie reštu Ukrainy. I zaraz u jakaści instrumienta ŭpłyvu ŭ jaje zastajecca tolki hazavaja truba. Darečy, praz try dni paśla vybaraŭ, 29 kastryčnika, mohuć być padpisanyja časovyja pahadnieńni ab adnaŭleńni pastavak «Hazpromam» hazu va Ukrainu.
Vybarčaja kampanija prachodzić absalutna svabodna. U vybarčych kamisijach na ŭsich uzroŭniach prysutničajuć pradstaŭniki kandydataŭ.
Jaŭka hramadzian moža skłaści kala 60%, heta bolš-mienš jak na apošnich prezidenckich vybarach.
Pieramoha prajeŭrapiejskich siłaŭ na parłamienckich vybarach daść im karty ŭ ruki dla kančatkovaha demantažu staroj sistemy. Parašenka ŭžo zajaviŭ, što ad paniadziełka pačnie ŭnosić u Radu prajekty refarmatarskich zakonaŭ.
Ciapier čytajuć
Alimpijski čempijon Aramnaŭ: Nam vyhadnaja praciahłaja vajna, i Vova dy Saša ŭ joj pieramohuć24
Kamientary