Унікальная сітуацыя на прэзідэнцкіх выбарах у Аўстрыі. Па стане на 18.00 па мінскім часе і кандыдат ад ультраправай Аўстрыйскай партыі свабоды Норберт Хофер (на фота злева, фота APA), і кандыдат ад левай Партыі зялёных набіралі па 50% галасоў, перадае аўстрыйскае агенцтва APA.
Пасля падліку 60% бюлетэняў Хофер набіраў 50,2% галасоў. Аднак пасля падліку 80% наперад вырваўся ўжо былы лідар Партыі зялёных Ван дэр Белен з 50,1%.
Гэта значыць, вынік вырашаць лічаныя галасы.
Пад канец падліку наперад вырваўся Хофер. У яго, без уліку галасоў, адпраўленых поштай, 51,8%. Аднак паштоваму галасаванню аддаюць перавагу больш адукаваныя выбарцы, а яны аддаюць перавагу Ван дэр Белену. Поштай у краіне галасавала прыкладна шостая частка тых, хто аддаў галасы. Як чакаецца, галасы раздзеляцца амаль роўна 50 на 50.
Яўка на выбарах склала рэкордныя для краіны 72,27%.
Упершыню ад 1945 года склалася такая сітуацыя, што ў другі тур не выйшаў кандыдат ні ад адной традыцыйнай, мэйнстрымавай партыі: ані кансерватар з Аўстрыйскай народнай партыі, ані сацыял-дэмакрат з Сацыялістычнай.
Цяпер усе палітычныя сілы згуртаваліся супраць Хофера. Аднак крайне правыя вельмі папулярныя, дый сам Хофер харызматычны. У першым туры ён здабыў 36% галасоў, а ягоны апанент — 23%.
Аўстрыйская партыя свабоды была ў свой час заснаваная ветэранам СС. Цяпер ёй сімпатызуе Расія, бо АПС выступае супраць еўраінтэграцыі. Крэмль спадзяецца, што падзеленая Еўропа будзе слабейшай. Ультраправыя, у сваю чаргу, вызнаюць за Расіяй гістарычнае права кантраляваць краіны Усходняй Еўропы, у тым ліку Беларусь і Украіну. Аднак для аўстрыйскіх выбарцаў важнае не гэта. Яны падтрымліваюць АПС за яе антыімігранцкую пазіцыю, а таксама за крытыку цяперашняй палітычнай эліты.
Калі Хофер пераможа, ён стане першым прэзідэнтам еўрапейскай краіны ад ультраправай партыі. Прэзідэнт у Аўстрыі мае цырыманіяльныя функцыі, але ў перамозе Хофера будзе і сімвалічнае значэнне.
Аўстрыя — гэта 9-мільённая краіна ў Альпах, між Нямеччынай і Італіяй. Яна — частка багатага ядра ЕС. ВУП на душу насельніцтва ў Аўстрыі ў 3 разы большы, чым у Беларусі.
Аўстрыя гістарычна каталіцкая краіна. У свой час яна была цэнтрам Аўстрыйскай, а пасля Аўстра-Венгерскай імперыі. З яе паходзіў Гітлер, што спрыяла аншлюсу яе Рэйхам (1938). Пасля Другой сусветнай Аўстрыя была нейтральнай дзяржавай, што зрабіла Вену шпіёнскім гняздом для ўсіх разведак свету, у тым ліку савецкага КГБ. У постсавецкія часы Аўстрыя стала магнітам для постсавецкага капіталу. Таму яна мае асаблівыя бізнэс-повязі з Расіяй, і Беларуссю таксама, ды лічыцца адной з самых прарасійскіх краін ЕС.
Акрамя Аўстрыйскай партыі свабоды, Масква актыўна спансаруе і прапагандуе Нацыянальны фронт у Францыі, Альтэрнатыву для Германіі, венгерскі Йобік, балгарскую «Атаку» ды іншыя большыя і меншыя ультраправыя і ультралевыя сілы, якіх аб'ядноўвае непрыманне еўраінтэграцыі.
Хофер выступаў «супраць штучных межаў паміж Еўропай і гістарычна і культурна звязанай з ёй Расеяй» і выказваў упэўненасць у неабходнасці адмены санкцый супраць Масквы.
Каментары