Беларускае журы «Еўрабачання» ў паўфінале не дало Кіпру ні бала, затое ў фінале паставіла яго на першае месца
Стала вядомая раскладка галасоў ад Беларусі на Еўрабачанні-2018. Густы журы і тэлегледачоў гэтым разам радыкальна разышліся.
Вось галасаванне журы:
1. Кіпр — 12 балаў
2. Аўстрыя — 10 балаў
3. Нарвегія — 8 балаў
4. Албанія — 7 балаў
5. Чэхія — 6 балаў
6. Літва — 5 балаў
7. Славенія — 4 балы
8. Данія — 3 балы
9. Аўстралія — 2 балы
10. Швецыя — 1 бал.
А вось тэлегледачы ацанілі канкурсантаў наступным чынам:
1. Украіна — 12 балаў
2. Нарвегія — 10 балаў
3. Ізраіль — 8 балаў
4. Данія — 7 балаў
5. Малдова — 6 балаў
6. Чэхія — 5 балаў
7. Італія — 4 балы
8. Кіпр — 3 балы
9. Венгрыя — 2 балы
10. Балгарыя — 1 бал.
Адметна, што журы нават не ўзгадала Ізраіль, які на Еўрабачанні перамог.
Але самае прышпільнае не гэта.
Аказваецца, што ў паўфінале беларускае журы не дало Кіпру ніводнага бала. Гэта значыць, калі б рашэнне залежала ад Беларусі, то Кіпр не прайшоў бы ў фінал. Але Кіпр выйшаў у наступны этап, і, больш за тое, букмекеры сталі адзінадушна ставіць на перамогу гарачых танцаў Элені Фурэйра. І ў фінале тое самае журы тую самую песню…. ставіць на першае месца.
У паўфінале беларусы паставілі на першае месца Албанію, якая выйдзе ў фінал і зойме 11-е месца. На другім у нашых быў чэх, які ў фінале стане 6-м, а на трэцім і чацвёртым — Харватыя і Ісландыя, якія ў фінал не пройдуць. Акрамя Кіпра, нашы далі нуль балаў і Літве, хоць Ева Засімаўскайце таксама ў фінал выйдзе і зойме там 12-е месца.
Нагадаем, што ў фінале нацыянальныя журы пакінулі кіпрыётку на 5-м месцы, а тэлегледачы — на 2-м. Акрамя Ізраіля, беларускае журы прамаргала таксама немца і шведа, якія былі высока ацэненыя іншымі прафесійнымі журы. А, у адрозненне ад масавага гледача, у густы журы не трапілі ўкраінец Melovin і малдаване з Прыднястроўя DoReDos.
Раней беларускае журы выклікала крытыку сваім рашэннем паслаць на конкурс украінскага спевака Alekseev-а. Ён у выніку заняў месца ў канцы свайго паўфіналу.
Новую хвалю кпінаў выклікалі густы нашага журы ў фінале.
«Беларускае журы не паставіла пераможцы Еўрабачання з Ізраіля ніводнага бала. І яны яшчэ хочуць перамагаць на конкурсе, смех у роце, калі не ў стане разгледзець пераможцу», — піша журналіст Зміцер Панкавец.
-
Ганна Бонд плюецца ад канцэрта Алега Маямі. Паспрабавала нават вярнуць грошы
-
Рэпер Пазнякс, які парваў інтэрнэт песняй пра гавайскую піцу, выпусціў з Мэйбі Бэйбі сумесны трэк «Жабінка-Гродна»
-
Фанаты Тэйлар Свіфт наваднілі музей у Германіі, каб пабачыць карціну, да якой спявачка зрабіла адсылку ў сваім новым кліпе
Каментары