Памятаеце генерала Яўсеева, які ўласнаручна разганяў пратэсты? Цяпер ён адказвае за фізкультуру ў Смалявічах
Кар’ернае піке былога ахоўніка Лукашэнкі — а пасля яго ж былога памочніка, — Ігара Яўсеева ўражвае.
Ігар Яўсееў быў на кані ў 2010-я. Начальнік міліцыі грамадскай бяспекі Мінгарвыканкама, ён не цураўся сам удзельнічаць у разгоне дэманстрантаў. Пасля пайшоў на павышэнне — у 2013‑м узначаліў віцебскую абласную міліцыю, у 2015‑м перайшоў на аналагічную пасаду ў мінскую абласную. Калі добра сябе зарэкамендуеш, адтуль прамая дарога назад у цэнтральны апарат міністэрства, як мінімум намеснікам міністра ўнутраных спраў. Але ў Яўсеева не склалася.
У 2017‑м Лукашэнка прызначыў яго сваім памочнікам па Мінскай вобласці. У 2021‑м Яўсеева адправілі ў адстаўку — і ён канчаткова прапаў з даляглядаў, хоць быў і не стары, трохі за 50.
У іншых адстаўных чыноўнікаў у такой сітуацыі атрымлівалася ўлезці ў саюзныя структуры, каб дачакацца максімальнай пенсіі. А вось Яўсееў аказаўся птушкай драбнейшага палёту.
Днямі ён засвяціўся ў адкрыцці футбольнага турніра ў Смалявічах. Як аказалася, былая міліцэйская шышка працуе ўсяго толькі дырэктарам раённага Цэнтра фізічнай культуры і спорту — пад кантролем генерал-маёра тры фізкультурна-аздараўленчыя комплексы, стадыён і лыжная база.
Каментары