Навукоўцы расказалі, якую карысць для здароўя прыносяць сабакі
Паводле даных працяглага даследавання Kardiozive Brno 2030, валоданне свойскай жывёлай можа дапамагчы захаваць здароўе сэрца, асабліва калі свойская жывёла — сабака, паведамляе EurekAlert!.
У ходзе даследавання была атрымана базавая медыцынская і сацыяльна-эканамічная інфармацыя пра больш чым 2 000 жыхароў горада Брно ў Чэхіі, са студзеня 2013 года па снежань 2014 года.
У даследаванні ўзялі ўдзел 1769 чалавек, у якіх у анамнезе не было сардэчна-сасудзiстых захворванняў. У іх ацанілі індэкс масы цела, дыету, фізічную актыўнасць, статус курэння, артэрыяльны ціск, узровень глюкозы ў крыві і агульны халестэрын.
Даследаванне параўноўвала паказчыкі сардэчна-сасудзiстых захворванняў уладальнікаў свойскіх жывёл агулам з тымі, хто не меў свойскіх жывёл. Затым аўтары працы параўналі ўладальнікаў сабак з іншымі ўладальнікамі свойскіх жывёл і тымі, хто не меў свойскіх жывёл.
Людзі, у якіх была хоць нейкая жывёла, часцей паведамлялі пра большую фізічную актыўнасць, лепшую дыету і нармальны ўзровень цукру ў крыві. Самыя вялікія выгады ад наяўнасці свойскай жывёлы атрымлівалі тыя, хто валодаў сабакам, незалежна ад іх узросту, полу і ўзроўню адукацыі. Валоданне свойскімі жывёламі прыводзіць да больш фізічна актыўнага ладу жыцця.
Наяўнасць сабакі можа падахвочваць уладальнікаў выходзіць на вуліцу, перамяшчацца і рэгулярна гуляць са сваім сабакам.
Наяўнасць сабакі таксама была звязана з паляпшэннем псіхічнага здароўя і меншым успрыманнем сацыяльнай ізаляцыі.
Каментары