«Я і мае калегі не згодныя з гэтым». Мінскі пажарны асудзіў выкарыстанне МНС для барацьбы з нацыянальнай сімволікай
Пажарны Ілля Маржэўскі з пажарнай часці нумар 26 Мінска звярнуўся да беларусаў. Ён выказаў салідарнасць з супрацоўнікамі МНС, звольненымі па палітычных матывах, і з затрыманымі ратавальнікамі Асвода. «Я і многія мае калегі не згодныя з гэтым», — кажа ён.
«На жаль, кіраўніцтва Міністэрства па надзвычайных сітуацыях бярэ актыўны ўдзел у спробах падзяліць наша грамадства — падзяліць па колеры сцяга, палітычных перакананнях, ідэалогіі», — сказаў ён.
Сваю заяву ён зачытаў з нацыянальным і дзяржаўным сцягамі на плячах.
«Мы сталі сведкамі таго, як невядомыя людзі ў масках захапілі пажарныя аўтамабілі і выкарыстоўваюць іх у мэтах, не звязаных з ратаваннем людзей», — кажа ён пра выкарыстанне машын МНС для здымання нацыянальных сцягоў.
«Хто стане адкрываць дзверы пажарным, калі замест іх могуць прыбыць людзі ў масках? Ці будуць саступаць дарогу пажарным аўтамабілям, калі яны могуць ехаць не на дапамогу людзям?» — пытаецца пажарны на відэа.
«Ад сябе асабіста хачу прынесці прабачэнні ўсім грамадзянам, якіх зняважылі гэтыя дзеянні, — кажа Ілля Маржэўскі. — Калі ласка, не губляйце даверу да пажарных. Наша пакліканне — гэта давер людзей, незалежна ад палітычных поглядаў», — сказаў Маржэўскі.
Раней інтэрнэт абышлі кадры, як ратавальнікі МНС на вышцы не знялі нацыянальны сцяг у Малінаўцы ў Мінску, а расправілі яго і пакінулі. Пазней гэты сцяг знялі з вышкі асобы ў масках.
Цяпер чытаюць
«Людзі, будзьце пільныя! У такой сітуацыі можа апынуцца кожны жыхар ЕС!» Грамадзянін Літвы, асуджаны ў Беларусі да 13 гадоў за «шпіянаж», перадаў ліст з калоніі22
«Людзі, будзьце пільныя! У такой сітуацыі можа апынуцца кожны жыхар ЕС!» Грамадзянін Літвы, асуджаны ў Беларусі да 13 гадоў за «шпіянаж», перадаў ліст з калоніі
«Незалежнасць не падае з неба і не даецца назаўсёды. Яе трэба абараняць». Ціханоўская выступіла з заявай да 35-годдзя прыняцця Дэкларацыі аб суверэнітэце4141
Каментары