Масква прапанавала Кіеву, каб Беларусь была ў спісе краін — гарантаў бяспекі Украіны
Пра Беларусь як удзельніцу перамоўнага працэсу заяўляў учора на пасяджэнні Рады бяспекі і Аляксандр Лукашэнка.
«Расія прапанавала, каб Беларусь была адной з краін-гарантаў будучыні расійска-ўкраінскай дамовы, цяпер усе пытанні, у тым ліку склад краін-гарантаў, узгадняецца», — заявіў кіраўнік МЗС РФ Сяргей Лаўроў.
«Не хачу ўдавацца ў дэталі перамоўнага працэсу і зместу. Хачу толькі сказаць, што па просьбе ўкраінскага боку нейтральны, пазаблокавы, бяз'ядзерны статус павінен суправаджацца гарантыямі бяспекі Украіны. Сярод гарантаў бяспекі ўкраінскія суседзі хацелі б бачыць усе прылеглыя да Украіны краіны і яшчэ цэлы шэраг дзяржаў, уключаючы пастаянных членаў Рады Бяспекі ААН», — сказаў Лаўроў па выніках перамоваў з кіраўніком МЗС Арменіі.
«Мы прапанавалі, каб у ліку такіх краін-гарантаў абавязкова была б Рэспубліка Беларусь. І цяпер усе гэтыя пытанні, уключаючы поўнае кола краін — гарантаў, узгадняюцца. Мы выступаем за тое, каб Беларусь была сярод іх», — цытуе Лаўрова РІА «Новости».
Пра тое, што Беларусь можа паўдзельнічаць у перамоўным працэсе, заявіў учора на пасяджэнні Рады бяспекі Аляксандр Лукашэнка.
«Не можа быць перамоваў без удзелу Беларусі, калі вы ўвязалі нас у гэта, перадусім заходнія краіны, там на гэтых перамовах, натуральна, павінна прагучаць пазіцыя Беларусі. (…) Таму ніякіх сепаратных, за спінай Беларусі, дамоўленасцяў быць не можа, і я абсалютна перакананы і ведаю, што Расія такую пазіцыю разумее. І ў гэтым нічога кепскага няма, але гэта будзе супярэчыць задуме Захада, і гэта не значыць, што мы павінны танцаваць пад дудку Захада», — казаў учора Лукашэнка.
Разам з тым Уладзімір Макей заявіў, што гарантыі бяспекі павінны быць дадзеныя і Беларусі.
Перад нападам на Украіну Аляксандр Лукашэнка ў інтэрв'ю расійскаму прапагандысцкаму ТБ заяўляў, што вайна ва Украіне працягнецца 3—4 дні. Падчас вайны ён некалькі разоў заклікаў кіраўніцтва Украіны капітуляваць, пагражаючы, што інакш тое самае прыйдзецца зрабіць пазней на горшых умовах.
У выступе на Радзе бяспекі 7 красавіка Аляксандр Лукашэнка змяніў тон і ўжо зыходзіў з таго, што ліквідаваць і расчляніць Украіну Расіі не ўдасца.
Цяпер чытаюць
У Чэхіі малады беларус трапіў у кому — наглытаўся таблетак праз праблемы з легалізацыяй і разрыў з дзяўчынай21
Каментары