Івонка Сурвіла: Янка Запруднік шмат зрабіў, каб у свеце не забываліся пра беларусаў
Пра аднаго са старэйшых дзеячаў беларускай дыяспары ў ЗША Янку Запрудніка, які памёр ва ўзросце 95 гадоў, згадвае старшыня Рады БНР Івонка Сурвіла.
«Вестку пра смерць Янкі Запрудніка ўспрыняла з глыбокім смуткам, бо адышоў у вечнасць чалавек, якога ведала з юнацтва, — гаворыць Івонка Сурвіла. — У тыя гады спадар Янка быў паплечнікам старшыні Рады БНР Міколы Абрамчыка».
Старшыня Рады БНР адзначыла, што Запруднік быў не толькі вядомы гісторык, прызнаны аўтар публіцыстычных артыкулаў, але і актыўны грамадскі дзеяч.
«Цягам сваёй шматгадовай дзейнасці ў Радзе БНР Янка Запруднік вельмі шмат зрабіў для таго, каб у свеце не забываліся пра беларусаў, пра беларускі народ і яго права на сваю незалежную дзяржаву, — кажа Івонка Сурвіла. — Я да яго часта звярталася па парады і заўсёды атрымлівала кваліфікаваную дапамогу. Ён быў вельмі адказным чалавекам, а таксама чулым, добрым сябрам. Вечная памяць».
Памёр Янка Запруднік
Цяпер чытаюць
З праекта будаўніцтва мінскага метро выкінулі яшчэ дзве станцыі — «Кіеўскі сквер» і «Політэхнічную»5
Каментары