Праз кавід страціў працу і ад няма чаго рабіць пачаў здымаць ролікі. Гісторыя Хабі Ламэ, самага папулярнага тыктокера свету
У тыктоку змяніўся лідар па колькасці падпісчыкаў. 18-гадовую амерыканскую танцорку Чарлі Д'Амеліа абагнаў малады італьянец Хабі Ламэ, які праславіўся ролікамі з выкрыццём бязглуздых лайфхакаў. Яны настолькі смешныя і папулярныя, што вы дакладна іх бачылі, нават калі ніколі не карысталіся тыктокам.
Хабанэ (Хабі — скарочаны варыянт імені блогера) Ламэ нарадзіўся ў 2000 годзе ў Сенегале, але праз год яго сям'я пераехала на поўнач Італіі. Хаця хлопец вырас у Турыне і заўзее за мясцовы «Ювентус», у яго дагэтуль няма італьянскага пашпарта — яго можна атрымаць толькі пры ўмове нараджэння ў Італіі.
«Мне не патрэбны кавалак паперы, каб лічыць сябе італьянцам», — кажа Ламэ і дадае, што ніколі адсутнасць грамадзянства не была для яго праблемай.
Пасля школы будучы кароль тыктоку пайшоў працаваць на завод недалёка ад Турына, але ў 2020-м поўнач Італіі пачаў палыхаць з-за каранавіруса. З-за аб'яўленнага лакдаўну Хабі застаўся без працы і быў вымушаны сядзець у бацькоўскай кватэры.
Замест пошуку працы, Ламэ завёў тыкток і пачаў здымаць ролікі. Спачатку гэта былі стандартныя жарты, лэцплэі і мініяцюры на італьянскай мове, якія прыносілі падпісчыкаў, але не прыносілі папулярнасць.
Watch on TikTok
Самы першы тыкток Ламэ
Так працягвалася да канца лістапада 2020 года, калі Ламэ зняў рэакцыю на вірусны пранк: дзяўчына не магла вызваліць нагу з веласіпеднага замка, якім яе прыкулі да клумбы.
Watch on TikTok
Відэа набрала мільёны праглядаў, а каментатары дзівіліся глупству пранка і не верылі ў яго рэальнасць. Так Хабі Ламэ зразумеў, які кантэнт патрэбны гледачам, і стаў разбуральнікам бязглуздых лайфхакаў і пранкаў.
Ён адшукваў бескарысныя парады для простых задач (часам іранічныя) і запісваў да іх адказ, у якім дасягаў патрэбнага выніку без асаблівых высілкаў. У канцы роліка хлопец закатваў вочы і расстаўляў рукі, нібыта пытаючыся: «У чым праблема зрабіць вось так?» Гэты жэст стаў фішкай Хабі Ламэ.
Такія ролікі былі простыя ў вытворчасці і амаль не ўтрымлівалі тэксту, што рабіла іх зразумелымі па ўсім свеце. За лічаныя тыдні тыкток Ламэ набраў 10 мільёнаў падпісчыкаў, і іх колькасць пачала расці ў геаметрычнай прагрэсіі. На момант, калі ён стаў лідарам сацсеткі, у яго было 142,5 мільёна фаловераў і больш за 3 мільярды лайкаў.
Італьянскага тыктокера сёння ведаюць ва ўсім свеце, асабліва ён папулярны на радзімах, у ЗША і Бразіліі (ён часта здымаецца ў цішотках зборных па футболе гэтых краін). Часта разбураць лайфхакі Ламэ дапамагаюць сусветна вядомыя зоркі: футбалісты, гоншчыкі «Формулы-1» і спевакі.
Watch on TikTok
Ламэ не прайшоў міма падзей ва Украіне. Пасля ўварвання Расіі ён зняў антываенны ролік, у якім сыграў вайскоўца са сцягам РФ на форме.
А нядаўна на цырымоніі ўручэння блогерскай прэміі ў Канах італьянец сфатаграфаваўся з вядомым украінскім катом-блогерам Сцяпанам, які з гаспадыняй уцёк з Харкава.
Папулярнасць Ламэ тлумачаць тым, што ён адрозніваецца ад іншых селебрыці, якія падыходзяць да стварэння кантэнту з усёй сур'ёзнасцю і спрабуюць уплываць на аўдыторыю, расказваючы ім, што трэба рабіць і як выглядаць. А Хабі выглядае, як звычайны хлопец, з якім у карыстальніка нашмат больш агульнага, чым з нейкімі іншымі недасяжнымі зоркамі.
Каментары