Praz kavid straciŭ pracu i ad niama čaho rabić pačaŭ zdymać roliki. Historyja Chabi Łame, samaha papularnaha tyktokiera śvietu

Chabane (Chabi — skaročany varyjant imieni błohiera) Łame naradziŭsia ŭ 2000 hodzie ŭ Sieniehale, ale praz hod jaho siamja pierajechała na poŭnač Italii. Chacia chłopiec vyras u Turynie i zaŭzieje za miascovy «Juvientus», u jaho dahetul niama italjanskaha pašparta — jaho možna atrymać tolki pry ŭmovie naradžeńnia ŭ Italii.

«Mnie nie patrebny kavałak papiery, kab ličyć siabie italjancam», — kaža Łame i dadaje, što nikoli adsutnaść hramadzianstva nie była dla jaho prablemaj.

Paśla škoły budučy karol tyktoku pajšoŭ pracavać na zavod niedaloka ad Turyna, ale ŭ 2020-m poŭnač Italii pačaŭ pałychać z-za karanavirusa. Z-za abjaŭlennaha łakdaŭnu Chabi zastaŭsia biez pracy i byŭ vymušany siadzieć u baćkoŭskaj kvatery. 

Zamiest pošuku pracy, Łame zavioŭ tyktok i pačaŭ zdymać roliki. Spačatku heta byli standartnyja žarty, łecpłei i minijaciury na italjanskaj movie, jakija prynosili padpisčykaŭ, ale nie prynosili papularnaść.

Watch on TikTok

Samy pieršy tyktok Łame

Tak praciahvałasia da kanca listapada 2020 hoda, kali Łame źniaŭ reakcyju na virusny prank: dziaŭčyna nie mahła vyzvalić nahu ź viełasipiednaha zamka, jakim jaje prykuli da kłumby.

Watch on TikTok

Videa nabrała miljony prahladaŭ, a kamientatary dzivilisia hłupstvu pranka i nie vieryli ŭ jaho realnaść. Tak Chabi Łame zrazumieŭ, jaki kantent patrebny hledačam, i staŭ razburalnikam biazhłuzdych łajfchakaŭ i prankaŭ. 

Jon adšukvaŭ bieskarysnyja parady dla prostych zadač (časam iraničnyja) i zapisvaŭ da ich adkaz, u jakim dasiahaŭ patrebnaha vyniku biez asablivych vysiłkaŭ. U kancy rolika chłopiec zakatvaŭ vočy i rasstaŭlaŭ ruki, nibyta pytajučysia: «U čym prablema zrabić voś tak?» Hety žest staŭ fiškaj Chabi Łame. 

Takija roliki byli prostyja ŭ vytvorčaści i amal nie ŭtrymlivali tekstu, što rabiła ich zrazumiełymi pa ŭsim śviecie. Za ličanyja tydni tyktok Łame nabraŭ 10 miljonaŭ padpisčykaŭ, i ich kolkaść pačała raści ŭ hieamietryčnaj prahresii. Na momant, kali jon staŭ lidaram sacsietki, u jaho było 142,5 miljona fałovieraŭ i bolš za 3 miljardy łajkaŭ.

Italjanskaha tyktokiera siońnia viedajuć va ŭsim śviecie, asabliva jon papularny na radzimach, u ZŠA i Brazilii (jon časta zdymajecca ŭ cišotkach zbornych pa futbole hetych krain). Časta razburać łajfchaki Łame dapamahajuć suśvietna viadomyja zorki: futbalisty, honščyki «Formuły-1» i śpievaki. 

Watch on TikTok

Łame nie prajšoŭ mima padziej va Ukrainie. Paśla ŭvarvańnia Rasii jon źniaŭ antyvajenny rolik, u jakim syhraŭ vajskoŭca sa ściaham RF na formie.

A niadaŭna na cyrymonii ŭručeńnia błohierskaj premii ŭ Kanach italjaniec sfatahrafavaŭsia ź viadomym ukrainskim katom-błohieram Ściapanam, jaki z haspadyniaj uciok z Charkava.

Pavialičyć

Papularnaść Łame tłumačać tym, što jon adroźnivajecca ad inšych sielebryci, jakija padychodziać da stvareńnia kantentu z usioj surjoznaściu i sprabujuć upłyvać na aŭdytoryju, raskazvajučy im, što treba rabić i jak vyhladać. A Chabi vyhladaje, jak zvyčajny chłopiec, ź jakim u karystalnika našmat bolš ahulnaha, čym ź niejkimi inšymi niedasiažnymi zorkami.

• 28
• 0
• 5
• 2
• 0
• 1
• 2
• 0